Шанти агар Баршазиб
Хъявгъума тIашбизурла,
Кадяхъибти лямцI кьяйда
УрегцIали дус дикиб.
Сентябрь баз чесабиухIели балулри 2024 ибил дус Сагаси Баршала ши 60 дус бирни. Агь, замана, замана! Сецад хъярхъли шалгIеббулхъули буилил ил. Шакалра хIедикили, ит дус (1964 ибил дус) акIубти уршби-рурсби гьанна пенсионерти бетаурлигу.
Иш макьала белкIес вализурхIели, ну МяхIячкъалализибси грязолечебницализив арадеш къулайбиахъес кайхьири. Набчи дила шан Рашидла МяхIяммадли зянкъдяхъиб. Арадешличила хьархъардяхъили гIергъи викIар:
— СултIанбег СултIанович, гьанбиркуру 2019 ибил дуслизивра хIу грязолечебницализи кайхьунхIели, нушала ши 55 дус биъниличил бархбасахъи, хIуни белкIунси макьала сентябрьла 20-личиб дурабухъи? Баркалла биаб «Замана» газетала агьлулис, хаслира Салимат ГIялиевас ва ПатIимат Кьурбановас, итхIели нуша халаси хIурматличил кьабулдарнилис. Илди нушаб дяхI шалали гьунибаибтири. Гьаннара нушала ши 60 дус биубхIели, хIу ил больницализив къаршиикири. БелкIенгу гIурра макьала, СултIанбег СултIанович. Дила чумал назмура лер шилис ва шантас багъишладарибти.
ХIуни ахIенрив, гьатIи, Хъявгъума бацIкабухъунси Барша шила къараулли калунси тIабигIят, биштIаси къаркъа-гъума хъябличиб Кьудратла ВегIла кумекличил тIашбатурси журуга шури сипатдарибси? ХIуни ахIенрив ил жагадеш хIела далуйтазиб мицIирбарибси? ИшхIелла манзиллизиб илаб ахIену баршалантани бамсриихъуси? ХIуниригу Сагаси Баршала жамигIят дубуртазиб хIербирули калунти илдала бегIтала ва хала бегIтала бузерила сархибдешуначил ва дявила бутIакьянчибала игитти баркьудлумачил тянишбарибти.
ГIе, ишбархIи Сагаси Баршала шила тарих газетабала бяхIяназибцун калун. Дигахъира шиличила «Сагасибаршаланти» («Новобаршаминцы») ибси МяхIяммад ШяхIбановли урус мезличил дураибси жузлизирти баянти даимдарили, дарган мезличил «Сагаси барша – дурхъаси ши ва ахIерти шанти» бикIуси жуз балкьаахъесра. Ил секIал барес гьанна дила имканти агара. Илгъуна жуз дуракаахIеллири, гьарилла хъулиб хIябилра балбикили бииши ил. ЧеалкIуси наслулис илгъуна савгъат хIядурбаресил адам мажахIят дакIуухъес.
Шакалра хIейкили, ардякьигу дила гIямрура. ИтхIели 23 дусла гIямруличивхIели, 2 дурхIяла дудеш гьанна январьличив 84 дус вирусира. 58 дусла бузерила стажличилси наб школа бархьбатес чебуркъуб. ИтхIели базцадхIи калунра савлила манзиллизив школализи укьес хIядурикIули, дурсрачи кьанхIейэс къайгъилизи викили. Хабчабла «Чина аркьусири? ХIукIун школализив узули ахIенри», — ибти гъайли гIур паргъатирахъусири.
Гьамадли ахIенри кьалли къябвердес дила дигуси коллективлизивадли, наб дебали ахIерти дурхIназивадли. Школализирригу дила къугъати жагьдеш шалгIердухъунти. Илавригу пенсияла дусмачи ваайчи закличил зубариван школаличил вархвалгунси. Ил чебяхIси категорияла мугIяллимтала коллектив бахъ гъамсиригу наб. Педагогуни илдигъунтили бетаахъес багьандан нунира камси пай кабихьибси ахIенригу. Сепайда… Бурули бираргу: «ЦабехIтани анхъ убалта, цархIилтани цIедеш дука. ЦабехIтани юртани тIашдалта, цархIилтани дарибтира гъятIиу» или. ХIейгеси биалра, сагали бакIибти «сагакьянчибани» ил коллективла бузерила даража чебетаахъили даимбарес хIебиуб. ДекIли саби уркIилисра… Се биру…? Илдигъунти суалтас жавабти агара…
Жагати мер-мусаличиб саби дила Сагаси Барша. ХIяйван-къача, маза-мас адикьес, илдас янилис дугени хIядурдарес лебгIеб аваданси мер саби ил. Сепайда, цархIилти мераначибван нушачирра адамтала баркь-бац дарскадиубли сари, хIяйванти азадли чинар-дигара гIяйдикIули сари. Гьалар майла ахирличирадли июньна 20-личи бикайчи мура дердили, дугени хIядурдирнила лерилра хIянчи тамандирутири. Гьанна биалли, адамтас дугени хIядурдарес дигули ахIен. Ил багьандан мура удути мер-мусаличир хIяйванти гIяйдикIахъес далтули сари. Гьалар шантала 250 маза-мас дирутири. Гьанна дуки башес хIейгули, илдира бекIлил агардарили сари.
БегIлара вайси, жагьилтас бузес дигули ахIен. Шилизир гьести гIямрула (дургъбала дусмазир акIубти) кIел адам сарра лералти – 84 дусла гIямрула духънаби — нура цархIил учительра.
Ардякьунти дусми пикрилизи касалли, шилизир дахъал гIяхIла шайчи дарсдешунира кадикили сари. Гьалар совхозла хъумачир ва ургубалар дарес дахъал хIянчи дири. Лебилра биштIа-халати гIяхIси яшав бетаахъес багьандан, бузерилизи ахъили бири. Гьанна гьарил юртлизир шин (ванзализирадли адитIунти) лер. Газличил гIеббуцили саби шанти. Лебталалра юртаназир баняби далкьаахъурли сари. Шилизирти гьундури гъягъяли дуцили сари. Мажалислизибадли Янгъикентлизи баайчи гьунира къирли буцили саби. Нушала шилизи башуси гьунила байхъала бетарули саби ил. Калунси гьунира ишдуслизиб къирли бурцуси саби. Медпунктлис юрт балкьарахъули саби.
Сепайда, ши мицIирбирули ахIен. 60 дусла духIнар делшунти 2 юртцун сари. 32 хозяйстволизирадли 12 юрт дацIкадухъи сари. Илди юртанала къапуличир мегь сари. Муйли бебкIили калунти 80-90 дусла гIямрула бухънабала юртанира цункадухъунтиван кадизурли сари.
1976 ибил, ну школала директорли узес вехIибси дуслизиб, 157 дурхIя бучIули бири. Гьанна кIелра шила (Тумаярла ва Сагал Баршала) 35 дурхIя саби школализи башути.
Илдигъунти гIямрула вайра гIяхIра гьанна дубурла гьарил шилизирра лер. Амма ну разили вирус дила Сагаси Баршала шилизир шила дурхIначил, жамигIятличил дубуртачил шурмиван уржили хIериэс кьадарбиъниличи. Илкьяйдали дила ахIерти шантачил дила жагьдешла ва гьести гIямрула дусми деркIни игъбарлизи халбирулра.
Шилизиб хIербирути лебилра нуни бучIахъули калунти саби. Гьанна илди дудешуницунра ахIи, хала дудешуни ва хала нешани бетаурли саби. Илдани дила халаси хIурматра биру, шагьарлизабадли бакIибтира мурталра набчи гьаббикIули бирар. Илдани гьалабла школала (2007-ибил дуслизив ну директорла хIянчилавад акьуухъунсири) педколлективла бузери, школализирти низам-кьяйда, школала юртла жагали балкьаурдеш, школала администрацияла бузериличи чекабизурдеш, педагогунани ва бучIантани сархути чедибдешуни гьандиркахъули бирар. Илдигъунти гьанбикунани, гьайгьайрагу, дила уркIира хIулбуркIахъу. ГIур се хIяжатли гьатIи адамлис, вегIли бучIахъули калунтала шайзирадли баркаллала къугъати гъай илкьяйдали зайдикIалли?
АхIерти ва хIурматла дила шанти, набчил дарх дузули калунти мугIяллимти, шилизир ва цархIилти мер-мусаличир хIердирути баршаланти! Нушаб ахIерси Сагаси Баршала ши 60 дус бирнила юбилейличил хIуша нуни уркIи-уркIиларадли мубаракдирулрая.
ХIушаб арадеш, ВатIайс даршудеш, хIушала дурхIнас талихIчерти гIямру дулгулра.
Нушала шанти ва унруби-ургаб балгундеш, хIурмат-кьимат имцIадикIаб!
СултIанбег МяхIяммадов
