ГIергъиси замана Дахадаевла районна мер-мусаличирти гьундури къулайдирнила бузери жигарчеббикIули саби. Заб-маркали дукьдулъахъути ва гIяхIцадхIи далхIедарибти шимала духIнарти ва федеральный кьадрила дебали вайси агиличирти гьундури ремонтдирнила баркьудилизи ахъили саби шимала адамтира.
Илдигъунти баркьудлумазиб мисалли бетаурли саби КIишала шила жамигIятра. КIишала шила бекI МяхIяммад ГIяйнилаев бекIливиубли, шила адамти гьар дуслизиб гьундури къулайдирнила мурадличил цабалги дурабулхъули бирар. Ишди бурхIназибра илди кIел жумягIцадхIи бамсриагарли бузули саби ва някъ-някъли чукълуми агардарили, гьундурачи гъягъя калкьули сари. Ил баркьудилизи ахъибтани бурни хIясибли, хIянчи къулайли детурхули сари.
«Нушани ункъли балулра гьундурала даражализирадли нушала гIямрула къулайдешуни дигахъути диъниличила. Вайти гьундурачирадли машинаби дикесра къиянбулхъули бираргу. Илди ремонтдарниличирли нушала дурхIнала гIямру мяхIкамдаресра имканбикIули саби», — аргъахъиб кIишантани.
«КIишала шилизирти гьундурала кумекличил бет-садбашес адамтас имканти алкIахъулицунра ахIи, шилизибадли архIяличи башути адамтасра къулайдешуни алкIули сари. Гьар бархIи райцентрлизи хIянчиличи башути адамтира камли ахIенгу. Лебтанилра иргъули саби хабарагарти бехIемцIуни кахIедикахъес багьандан, аргъ бугIярбиайчи гьундури къулайдарес хIяжатли биъниличила. Илала дурабадлира, кIишантани Хъярбукла шилизибяхI башуси гьуни ремонтбирнилизира белгиси пай кабирхьуси саби. Иличирли КIишалара Хъярбуклара адамтала бархбасуни дебадирар. КIишантани чула баркьудиличибли мисал чебиахъули саби гIяхIла шайчи гIямру дарсдирахънилизир», — бурули сай шила бекI МяхIяммад ГIяйнилаевли.
Ирагъила, Зилбачила, ГIяштила, Кьункьила, Кудагула ва цархIилти шимала адамтани цахIнарти цIакьаначил чула шимазирти ва ила башути гьундури къулайси агиличи диркахъули сари. Илкьяйдали шила шанти цабиалли, къияндешуни дяхIяэс, адамтала гIямрула ва яшавла шуртIри гIяхIдухъахъести имканти алкIахъули сари.
Дахадаевла районна администрацияла пресс-служба
