Нешла мез далнили нуша хала бегIтала культураличи гъамтили детарахъулра, сенахIенну нешла мезличил гъайикIухIели миллатла къиликъуни дакIудирути сари.
Дебали мягIничебси саби шимазирти школабазир нешла мезла дурсри кадирхьни. Гьарли-марти шуртIри акIахъес багьандан, белчIуди бехIбирхьухIели, гьаланачи дурхIнази нешла мез дагьахъес чараагарси саби.
ХIейгеси биалра, гIергъити дусмазир нешла мезла дурсрала кьадар камкабарили саби. Шимала школабазиб нешла мезла дурсри кадирхьути учительтала алапа халаси ахIен, имцIаливан 15 азир къурушличи халбирули саби. Учительтала бузерила устадешра, илдани бедлугуси багьудира дебали дурхъали кадилзути сари. Илди дурхIнани, челябкьлализир, чеалкIутази чула багьудлуми дедлугути сари. Мезли адам чи саял, сегъуна саял бурули бирар.
ЖамигIятла ургаб вегIла мер баргес гьарил адамлис чараагарси саби. Нешла мез хIейги или викIуси, сай-алавти халкьличил валикес вирули ахIен, сунени сай чи саял вагьес вирули ахIен. Мез дарсдарес имцIаливан къиянси саби, хIерируси улка, яра гIямрула даража барсбаресичибра. ВегIла мез калахъни яра агардарни илди мезли гъайбикIутазибад дигахъуси саби.
«Нешла мезла кьадри сен бетахъибси?» ибси суаллис жаваб гьамадли баргес вирули сай. Буралли, РФ-лизир лебтанилра урус мез дузахъули сари, илди мез лебтанилра иргъули сари. Илдани чула мезра далули сари. Нуша Россияла Федерациялизир хIердирухIели, сунезирра дахъал миллатунира, культурабира сунезир лерси, байхъалара-сера улкала халкь кIидехI мез далули халабаили саби. Илдигъунти халкь леб Дагъистайзиб, Кабардино-Балкариялизиб, Осетиялизиб, Чечнялизиб. БегI гьалаб, декIар-декIарти миллатунала халкь саби-ургаб гъайбикIути урус мез сари. Нешла мезличил илди чула тухумтачилцун ихтилатбикIули саби.
Ил багьандан вегIла мезли дурсри кадирхьни дебали гIяхIси пикри саби, дурхIнази чула мезани дагьахъес, хала бегIтала мез хъумхIертахъес, чула культуралис марли калахъес багьандан. Учительтани дурхIнала уркIбазир нешла мезличи диги адикьес бирар.
БелкI таманбирули бурес дигулра вегIла бегIтала мез дални дебали мягIничебси саби, илди чеалкIутасра гIелар датес гIягIнити сари. Илкьяйда баралли, нешла мезла кьадри сеналра бетхIейхъур.
ПатIимат ХIусейнова – ДГУ-ла журналистикала факультетла 2-ибил курсла студентка
