Россияла Президент Владимир Путинна хъарбаркь хIясибли, бекIахъудила къуллукъуни гIердиахънила кьяли гьалабяхI башахъеси программа акIахъубсири. ИшбархIи нушала пачалихълизиб ил халаси кьадрила проектра саби — улкала сагати регионти вавалидяхъяхъес, илдала социальный бяхIчибизла-экономикала бетуцуни ункъдиахъес икьалабируси.
Илди бяхIчибизуназибад бекIлибиубсили бетарули саби устнани сагати хъулри, объектуни, бахъал адамтала хIяжатуни ахъахъес кумекбирути организацияби тIашдалтнила бяхIчибизра.
Наб ишаб бурес дирулра илгъуна санигIятлизив узуси дарган адамличила.
ХIясанов ХIясан ГIялиевич акIубси сай Дахадаевла районна Дибгаликла шилизив 1955 ибил дусла августла 2-личив. 1972 ибил дуслизиб илини Дибгаликла 8 классла школа таманбариб. Школа таманбарили гIергъи, ХIясан Каспийск шагьарла цаибил ПТУ-лизи учIес арякьун ва 1975 ибил дуслизиб ил хъарахъур.
КIинайс Краснодарлизив кIел дус гIярмияла къяяназив къуллукъбирули калун. 1978 ибил дусличибад 1990 ибил дусличи бикайчи Дахадаевла районна Уркухъла шилизив кьисла устали узиб. Илдала хъалибарг ца нешла някъбачицун хъарсири, сенахIенну дудеш гIямрулизивад жявли шалгIевухъунсири.
ХIясай гIямрула кьисмат цабариб сунела шан Багу бикIуси рурсиличил. Илдала шел урши акIуб: ГIяли, Амирхан, Ризван, МяхIяммад ва Шамил. Дудешла у бедибси бегIла халасигъуна урши ГIялини дявила санигIят касиб. Илини Каспи урхьула флотилиялизиб къуллукъбирули сай. Ризвай Дагъиста пачалихъла университетла филологияла факультет таманбариб. БусягIятла замана илинира устала санигIят бузахъули сай. ИмцIаливан илала хIянчи ваяхI далкьарахъниличил дархдасунти сари. Амирхай ва Шамилли Дагъиста пачалихъла шила хозяйствола университетла экономикала факультет таманбарибсири (бухгалтерла учет). МяхIяммад биалли, баягъи факультетла налогунала шайчибси санигIятличи вегIиуб. Лебилра уршби Дагъиста декIар-декIарти шагьуртазиб чула хъалибаргуначил хIеркабирули саби.
Гьанна ХIясан ХIясанов хъулчри дируси, кайзурси уста сай. Илис гьалар илини унза-улкьай дирули ва илди кадалтулира калунсири.
Буралли, сунела гIямрулизир ХIясай дахъал хIянчи дариб. Илини се бехIбуцалра, бузери халаси чебетаибдешличил ва жавабкардешличил гьунчибиркахъусири.
Илгъуна халкьлис багаласи баркьуди дурабуркIуси ХIясан ХIясановлис нушани чIумаси арадеш, бузерилизиб гьамаддеш ва хъулиб баракат дулгехIе.
Рабадан БяхIяммадов
