МяхIяммадзагьир дудешла ва нешла хъалибаргуназив бегIлара халасигъуна дурхIяла дурхIя сайри ва виштIали левалли тухумтала дигили ва къайгънани алавуцибсири.
Дигилизиб халабаибти дурхIни гIямрулизиб гьарбизурти, сархибдешуначилти, чучи саби бирхути бетарути саби или пикририкIули рирус.
ЧебяхIси ВатIа дергъ бехIбихьес гьалабси дуслизиб, илала неш Хаттала ГIяйшатли ХIурматла грамоталичил верхIел классла багьуди касибсири. Школала директорли узуси нешла узини, дергълизи арукьес гьалав, илизира, неш-дудешлизира шула кьиматуначилси багьуди каснила свидетельство халаси давла биъниличила бурибсири.
ГIур бехIбихьибси дергъли, багьуди каснила свидетельство кьанила лутIилизи мурхьли дигIянбарахъиб — 17 дус риубси Хаттала ГIяйшат Гитлерла гъармукабас гьалабизуни дарес, Моздокла мякьла къанавти дуркъахъес рархьиб. Челябкьлализиб белчIуди даимбарес, илис бетхIеур. ЧебяхIси ВатIа дергъ таманбиубли гIергъи, дергъла бутIакьянчи Зайпуллагь ГIябдуллаевличил хъали-цIа цадариб, дурхIни акIуб. ГIур мурулра, жявли итил дунъяличи арякьун, лерилра нешла хьулани-кьасани халалгъуна МяхIяммадзагьирличил, ГIябдуллагьличил, ХIябибуллагьличил, ГIяллайличил рурси Разиятличил дархдасун.
Лебилра нешанас чула дурхIни дурхъати ва ахIерти саби. Бирар нешани, дурхIнази чус къуллукъбирахъутира. Илдала неш, дила дудешла рузи, Хаттала ГIяйшат, уршбачи караматла дигила регI хьунул адам сарри. Илини сунела уршби кабатес мер хIебалули, дурхъатили чебиули рири.
Гьайгьайра илданира, нешла дигира, хьуланира мархIедарес хIебири. Нешлис илди ункъли бучIули дигулри. Илди лебилра, шила школализиб, белчIудила гьабкьянаби бетаур. Чула мурхьти бугьудлумачи хъарихъули, чебяхIси даражала багьуди бедлугути институтунази ва университетунази бучIес каберхур. Лебтанилра чебяхIси даражала багьудлуми касиб. Авалра узира рузира гапличи ва баркаллаличи лайикьли, бахълис гIибратли биубли, къуллукъла хIянчурбачиб бузули, халкьличил цабалги хIербирули саби.
МяхIяммадзагьирлира, нешливан, шула кьиматуначил, шилизибси гехIел дусла школа таманбариб ва Дербентлизибси медучилищелизи учIес керхур. БелчIуди хъараахъурли гIергъи, 1971-1972-ибти дусмазив, КьярбачIимахьиличибад верхIел километрла гьарахъси СурсбукIлизив медпунктла заведующийли узес вехIихьиб. МяхIяммадзагьирлис ургадаражала тухтурла багьуди баили ахIенри. Илини гIурра белчIуди даимбарес, багьудлуми чедицIахъес пикрибариб ва 1972 ибил дуслизив ДГМИ-лизи учIес керхур.
Урга даражала медицинала багьуди лебниличил пайдавиубли, хIерели больницализив узули, бархIехъуназив мединститутлизив учIес даимиуб. Институтлизир дедлугути чебяхIси даражала багьудлумачил барх, больницализив узули тухтурла бурсидешра кайсулри, дебали секIал балуси тухтур ветарулри. МяхIяммадзагьирла белчIуди бара бехIбихьибхIели, декIли зягIипикили дудеш итил дунъяличи арякьун, хъулиб лебалти узбачила ва рузичила къайгънира сунечи чекасес чебуркъуб, нешлис гьарил шайчивад хъарихъ ветаур.
МяхIяммадзагьирра илала юлдаш ва шан, гьанна нушачил варх агарси,(сосудистый хирург) ГIябдулла Кьадиевра Центральная больницализиб академик Р.П.Аскерхановла кафедрализиб бучIули ва бузули гIяхIти хирургуни бетаур.
МяхIяммадзагьир Зайпуллаевич, мединститут таманбарили гIергъи, 1979-1981-ибти дусмазив, ЧИАССР-лизи, Грозныйлизи клиническая больницализив хирургли узахъес вархьибсири.
Амма, нешла ва тухумтала гIямал аги, ил чучивад гьарахълив узахъули ватес. Халатала, тухумтала тилади хIясибли чарухъунсири ва 1981 ибил дуслизив Кубачила участковая больницализив тухтурли узес вехIихьибсири.
ИтхIели Кубачи, 500 адам сунезиб бузуси, мургьи-арцла устнала комбинат мерлабиубси, шагьарла журала посёлок сабри. Бахъал бажардичебти, жагьилти адамтани чула челябкьла посёлокла челябкьлаличил бархбалсахъулри.
Гьанна халкьла гьанбикуназиб СССР гьалжанаван чебиули биалра, итхIелира гьамадли селра сархес вируси ахIенри.
МяхIяммадзагьирли, сунела гIямрула рархкья Шахсаланничил 1974 ибил дуслизир хъали-цIа цадарибтири, халалгъуна рурси Наида 6 дус риублири. Илдас Кубачиб саби-бегIси юрт тIашбатес гIягIнисири.
ИтхIели бахъал кубачиланти шила дураб хIербирулри, илар, чилра хIерхIебирули жагати юртани лертири, дурабад Кубачи бузес бакIибти, илди юртаназиб хIербирулри. ИлхIели МяхIяммадзагьирра, хъалибаргра сайра, хIериэс къулайти шуртIри лерси юртлизив мерлавиуб ва сай-вегIси юрт лушесра вехIихьиб.
Шахсалан комбинатла столоваялизир поварли рузулри. Илини, мургьи-арцла устни букахъес шагьарла журала, бизити хурегуни хIядурдирулри. Хурегуначи ялчни разилири.
Сунезиб бахъал халкь хIербируси Кубачила посёлоклисра, хала хIеркIла чедирти, дубурла махьурбала адамтасра секIал балуси тухтур мурталра хIяжатиркулри. МяхIяммадзагьир, дуги-хIерила сегъуна-дигара замана, зягIиптас къуллукъличиври. Дебали паргъатагарси хIянчили вамсахъурхIели, чичилра лехIизес гIягIниси ахIенри, Грозныйлизив узесра гьамадли бири, хIукуматли хIериахъес хъалира луги или пикриикIулира калун итхIели.
МяхIяммадзагьирли сай-вегIси халалиахIенси юртра белшун, акIуб дурхIни Зайпуллагь, ГIяйшат, Жамиля. Зайпуллагьла ва ГIяйшатла дудешлара нешлара уми сари. Наидачибад бехIбихьили, лебилра Кубачила школализиб шула кьиматуначил бучIулри.
Сунела хъалибаргличил барх биштIати узбала ва рузила хъалибаргуначила къайгънира МяхIяммадзагьирли сунечи чейсулри. Гьарилла кьисматлизиб гIяхIла шайчиб асар бирулри. Сунела хъалибаргла, тухумтала, шантала гIямрулизирцун ахIи, лерилра СирхIяла махьурбала адамтала гIямрулизирра илини бутIакьяндеш дирулри, бебкIа-мекъхIели, зягIипбикили къияндикибхIели, мурталра халкьличил варх сайри, гьанна бусягIятра халкьличил варх сай, ва бахълис агарли чараагарси адам ветаурли сай.
МяхIяммадзагьир Зайпуллаевич Зайпуллаев 1981-1990-ибти дусмазив Кубачила больницализив тухтурли узиб, 1990-2023-ибти дусмазив бекI тухтурли узули калун. Гьанна тухтурли узули сай. Ил бекI тухтурли узес вехIихьибхIели Кубачила посёлоклизиб, дахъал дусми гьалаб тIашбатурси, буркьбиубси больница сабри лебси. 1990 ибти дусмазиб сагаси больница барахъес улкала имканти лерти ахIенри, гьалар лертира итхIели гъятIдиръулри. Гьанна Кубачила шилизибси больница, итхIели районнис бекIдеш дируси МяхIяммад ГIябдуллаевич ГIялиевла сипталичил, кумекличил, кьасличил, гIур ил гIевуцибти халкьла кумекличил, МяхIяммадзагьир Зайпуллаевичла ва илала юлдашунала кумекличил (методом народной стройки) тIашбатурсири. Илар хIяжатдиркути гIягIниахълуми тIалабдарибтири. ГIур, дахъал дусмазиб, бузерила лайикьти шуртIрачил, шинничил, ванадешличил, канализацияличил, гIурра дахъал секIайчил больница гIеббуцес МяхIяммадзагьир Зайпуллаевичли халаси къиян кабихьибсири. Илцадра хIянчилизи вархили виалра, сунела хъалибаргличилара илини хъумуртуси ахIенри.
МяхIяммадзагьирла ва Шахсаланна дебали жагаси хъалибарг бетаур. ЦIуба арцла медальличил Кубачила школа таманбарили, Наида ДГПИ-ла биологияла-химияла факультетлизи ручIес карерхур. Чедибдешличил белчIуди хъараахъур, сунела хъалибаргличил хIеркарирули сари. Илала халабаили хIябал урши леб. БусягIят Дербентла кадетский корпуслизир учительницали рузули сари. Зайпуллагьли ДГУ-ла экономикала факультет таманбариб, Дагъиста Правительствола контрольно-ревизионное управлениялизив узули калун, гьанна Москвализив узули ва хIерирули сай.
ГIяйшатли ДГТУ-ла «Информатика, управление сервис» бикIуси факультет таманбариб, Кубачир сунела хъалибаргличил хIеррирули ва рузули сари.
РиштIалгъуна Жамиляни ДГМИ-ла лечебный факультет белчIун. Чейхъуси вирусла изала тIинтIбиубси замана, Москвализир ординатурализир ручIуси Жамиля, зягIиптала «ХIунтIена зона»-лизир рузахъес жирариб. Сунечи хъарбикибти Москвала зягIиптала дурабад, нушачибти зягIиптасра илини халаси кумек бариб. Илини, чейхъуси изайчилти зягIипти арабиахъес кумекдирути тухтуртала далдуцуни (протоколы лечения) иша дурхьутири ва иличибли нушала зягIиптасра халаси кумек бетаурсири. Илкьяйдали кумекдиуб дила хъалибарглисра, зягIипдикибхIели илини гIеббурибси бирули, больницализи кахIедихьи, нуша сагъдиубра. Жамиля, гьанна бусягIят, Москвализир Иноземцеволизибси больницализир тухтурли рузули сари.
ГIяхIцад гапла гъай дурес вирар илдала неш Шахсаланничилара. Ил булеги нешлара дугIахъарлан дудешлара рурси сари, гьаланачи Гъумекала шилизир гIур МяхIячкъалализир халараибси сари. Шахсалан МяхIячкъалала бялихъунала консервобала комбинатла гьаркья хIянчизар, шагьарла советла депутат сарри, хабарли руруси исбагьиван, жагасири. Илала бизиси хурег, хъали-цIализибси ибгибдеш, гьарил бирусилизиб устадеш царх1илтас гIибратли дурести сари. Нушала тухумтала ва лебилра кьярбачIимахьилантала ургабра Шахсаланни хIурматра дигира сархиб. Ил гьарли-марли тухумтас ва шантас дигахъусили ва дурхъасили ретаур.
Кубачила комбинат хIебузанбиубхIели, илини халали ахIенси, сари-регIси тукен абхьиб. Ил мурталра рузули, хъали-цIализир рархили рирар, акьули руэс хIебала.
МяхIяммадзагьирла неш Хаттала ГIяйшатлис биалли, ил бегIлара дигахъуси уршила хьунул ретаур, уршиличил шилизи ракIибхIейчирад, уркIи-уркIиларадли илини кьабулрарибсири.
МяхIяммадзагьирра Шахсаланра лерилра дусмазиб уржили хIербиуб, ца бархIиван дуцIли дусми ардякьун. Чечнялизир дявти диубли, Грозный гъятIкаибхIели, тухумти бархьли биъниличи, вегIла мер-мусаличиб, вегIла халкьла мякьлав хIериъни бархьси биъниличи МяхIяммадзагьирра вирхаур, гIур имканти лерли диалра, чиналра арукьес хьулхIевхъун.
Бахъал адамтани, чула гIямрулизир дагьархIедарили уркавлути, сунела гIямрула зилантачи, юлдашуначи диги илала баркьудлумазир дагьардирули дирар. ЖагьхIели вайтира гIяхIтира дарх дуртIули калунти юлдашуни дунъяличиб бахъхIи кахIелни, тухтур сайливан багьурхIели, баргили замана, илдачи гьаввакIили, сунела пикрумира дурили, илдани дурутачира лехIизурли, абзур бархIи юлдашуначил варх калири. Илра, багьа баахъес хIейруси, баркьуди саби.
МяхIяммадзагьир Зайпуллаевич Зайпуллаев Дагъистан Республикала урибси тухтур сай.
ГIямрулизиб гьачамалра цали-цала уркIи хIебамкьахъурти, диги-хIурматличил хIербирути хIябал узила ва рузила халалгъуна узи сай.
Илцадра дахъал къайгъни лерси МяхIяммадзагьир Зайпуллаевич дахъал жузи делчIунси, гьаннара дучIуси, дунъяла классикала художественная литератураличила мурхьти багьудлуми лерси, белкIанас бархьси кьимат кабатес балуси учIан сай.
Жагьли вирухIели, илини уркIиличир далути даргала халкьла хIябкубти белкIлизи дуцибти диалри, илди нушала халкьла фольклорла хазна детари, гьанна уркIиличир далулил хьархIебаира. Тухтурла санигIятлизир детарути анцIбукьуначила лукIуси виалри А.Чеховлагъуна хабуртала жузи детари. Илгъуна барес гьаннара кьай ахIен.
РиштIахIейчирад дахъал жузи дучIули, бекIлил агарси замана, сен-биалра баргили, лукIули риасра, бегI гьалар нуни делкIунти назмурти кадяхъяхъес редакциялизи хибхIели, ну авцIали дус риублири. Илди халкьлизи делчIахъес газетализи кадяхъяхъес МяхIяммадзагьирли маслигIятбарибсири.
МяхIяммадзагьирлара Шахсаланнара дурхIнала 8 уршира кIел рурсира леб, гьариллис илди дебали дигахъути хала дудеш ва хала неш саби. Илдала пикруми ва челукьути аргъес, биубсигъуна кумек гIеббаахъес МяхIяммадзагьирли ва Шахсаланни имканти ва замана бургули саби, дурхIнала дурхIнира, илдачи шадиб букьес даим хьулбикIули саби. Кубачи хала дудешхъалачи шадиб букьес бикалли, дурхIнас ил бегIлара халаси талихI ва савгъат бетаурли саби.
МяхIяммадзагьир Зайпуллаевичла халаси юрт, дурхъаси машина, мас-давла агара. Илала лерти сунес баэси ибгибси юртра, хIяжатбикибхIели архIяличи букес машинара, сунела халкьлис къуллукъбирули деркIибти гIямрула дусмира, хIялалси бузериличил, духули вяшбикIули хIербирути хъалибаргра сари лерти. Илди сари илала гIямрула давлара дурхъадешра. ДурхIнала дурхIнала мукърачир делхъ дарес бикалли ил саби гIямрула бекIлибиубси мурадра.
МяхIяммадзагьир Зайпуллаевич Зайпуллаевлис ва илала лебилра хъалибарглис ара-сагъти, къугъати гIямру, хъалибаргла бухIнаб бизи-ванадеш, дунъяличиб даршудеш, гIурра дахъал гIяхIдешуни дулгулра. Лебилра хъалибаргра сайра, кацIибси ганз гьалабяхI башули, уркIи хумархIебиубли, ЧевяхIси Аллагьли, гьарил шайчивад ахIераварили дигулра.
Муъминат Хаттаева
