Бутрила шилизиб Малик ва Паризат ШяхIбановхъала хIурматла хъалибарг хIербирули саби.

Паризат Бутрила шилизибси школа таманбарили гIергъи, медучилищелизи карерхур. ГIяхIти кьиматуначил илини медучилище хъараахъур ва сунела бузерила гьуни бехIбихьиб.

МалхIямси, дяхI шаласи  Паризат декIар-декIарти мераначир  рузули калун, районна больницализирра ва цархIилти шимазирра. Ил чинар рузули риалра сунечи дугьабилзути зягIиптачи  уркIецIиличил хIеруди бирули сари.

Гьанна  дахъал дусмазир Паризат  рузули сари Бутрила шилизибси медицинала  пунктлизир.

Бутрила шилизиб хIербирути халкьла шайзибад илини халаси баркалла ва хIурмат сархили сари. Дугели кьанни биалра ил зягIиптачи хIеруди барес, уколти дирес, капельницаби кадизес рашар.

Малик МяхIяммадович жура-журала къуллукъуначив узули калун, духIнарти къуллукъунала отделлизив ва цархIилтира организациябазив.  Илини халаси, хIялалси бузери бариб. Гьанна биалли ил пенсияличив сай.

Паризат ва Малик  43 дус барх хIербирули саби.  Илдани авал урши-рурси абикьур, дурхIнас гIяхIси бяркъра бедили, чебяхIси даражала багьудира касахъили, гIямрула гьунчи дураиб.

Гьанна илди дурхIнала дурхIни абикьахъес кумекбикIули, манпагIятбиэс кьаслизиб саби.

Гьаннала гIергъира чула дурхIнани разибирули, гIямрулизир ва бузерилизир сархибдешуни имцIадикIули хIербиэс кьадарбиаб чус!

С.ГIябдуллаева