Адамлис кири сархес мерра заманара чинаб-дигара лебси саби. БегIлара халаси кирила хIянчилизи халбирули саби гьуни барни, шин кадукни, хIябрала мер балбарни ва цархIилти.
Гьанна дусра-сера Цугнила шила шантани имцIаливан жагьилтала кьукьяли, илгъуна адамтас багалабиэси, Аллагьла шайчибадра кирибаэси хIянчи бирули саби. Дахъал сарри шилизир челукьути масъулти, даари шин аги, Совет хIукуматла замана 1965 ибил дуслизир кадихьибти турбаби заякадиубли, имцIатигъунти шин шантачи диули ахIенри, янила замана бекIлил детихъулри. Шантани чула чули, билхъаби дирули, дучили гIяхIцад арцра, шила духIнарти лерилра шинна турбаби дарсдирули бузули саби. Илди бекIдиубли гIергъи халаси гьамаддеш алкIан шила шантас. Шантас держес ва хозяйстволис пайдаладарес даари шин дирар. Ил халаси лигIмат саби шила шантас. Шин агарли сегъуналра жан хIербиэс бируси ахIенгу.
Шилизибад 3 километрлара-сера гьарахъси «Чядярин» бикIуси мерличирад шилизи даайчи кали сари турбаби дарсдарес. Нушани халаси игьдибар бирхьулра, районна ва шила администрацияли, илкьяйдали «Умути шин» бикIуси программа хIясиблира кумекбирниличи хьул леб.
ГIурра шила хIябрази хIяйванти духIнахIедулхъахъес багьандан, заякабиубси хIяри балбариб, кадикибти мерани сагадан делшун, хIябрала бухIнаб садакьа бутIес, кьулгьу барес кабируси мер биштIаси биъни багьандан, урзухIелира, янила заманара бахъал халкь кахIебурцухIели, ил масъалара арзиб, кIинали ил халабариб. Илкьяйдали шила бухIнаб адам вебкIибхIели тIашбилзес, дехIибала дарес жагали хIядурбарибси мер леб. ГIурра дахъал секIал лер илар дарибти, чус хIялалдиъ.
Шинна суайчил барх гIурра челукьусили кавлули саби хутIличил бархбасунси масъалара. Ил шайчибра нушаб кумекбарили дигахъаси. Камли ахIен гIурра дарести, дирхулра илдира камси заманала духIнар бекIдирниличи.
Бурес чебиркур, лерилра харжани шантани чучи чекасили сари. Гьарил харжбарибси къуруш азирнали чарбиабну чус.
Чула хIянчурбира датурли, шагьарлизибад гьар сут ва алхIят бархIи кумекбарес башутасра, шилизиб хIербирутасра, арцличил кумекбирутасра халаси баркалла багьахъес дигулра.
ЖявхIейчибадал цугланти балгундешличил ва цадешличил декIарбулхъутири, ишбархIи ил цадеш нушани чебиулра. ГIурра гIяхIдешуницун дирес къаркъагъуна арадешра, гIямрулизир гьарбизунира диаб хIушала.
Кьади ГIялисултIанов
