Бара гьалабван, Сергокъалала районна библиотекализиб даргала машгьурси поэт Айдимир Каймаразовлис хасбарибси шадлихъ бетерхур. Ил багъишлабарибсири Айдимир акIубхIейчирад 75 дус дикнилис.
Шадлихъличи илала рурсби, барх бузули калунти ва ил валути цалабикилри. Балбуц дебали гIяхIси бетаур. Даргала машгьурти гIяртистунани далуйти зайдухъахъун, назмурти делчIун, А.Каймаразовличил кадикибти анцIбукьуни гьандушиб. Зубайру ГIумаров, Ибрагьим Ибрагьимов, Замира ГIямарова ва гIурра цархIилтира Айдимир Каймаразов дигиличил гьануршули, гъайбухъун.
ГIядаблири илцад пагьмучевси адам жявли гIямрулизивад арукьни. Илини камти гIямру деркIили виалра, гIямрула гьуниличила гъайикIалли, делкIестира дахъал сари. Илини нушаб пергерти назмурти гIелар датур. Айдимир Каймаразовла назмуртала верхIел жуз лер. Дахъал дурахIеибти жузира калун илала.
Ил валутани гьанбуршулри, назму гIягIнибикибхIели, илини кисаларад кагъурти кайси ва декIар-декIарти назмурти дучIи или. Илала гьар кабиркуси анцIбукьлис хIядурти назмуртала тахтаби дири. ХIера, гьари, гьалар илини ахъдуцибти темаби гьаннара нуша-ургар мягIничертили кавлули сари. Гьарил адамлис ЧевяхIсини лукIнила пагь бедлугуси ахIен, амма пагьму лебли биалли, ункъли пайдалабиресра балес гIягIниси саби. ХIябкубти пикридирес ва дучIес гьарилли вирар, амма илаб сунес бурес дигуси гьарилли аргъахъес хIейрар. Иличивли декIарулхъулри Айдимир цархIилти адамтазивад. Илала назмурти делчIес ва дагьес гьамадти сари, далайикIусилис биалли, гьарил макьамличил цугдиркути. МулебкIила шилизиб сайгъунти бахъал аги, амма чумал гIурра лебри. Илди сабри Ражаб Адамадзиев, МяхIяммадшапигI БяхIямгIялиев, ГIумарасхIяб Ражабов ва Казимбек Рабазанов. Илди лебилра пагьмучебти адамтазибад гьанна калунси ца К.Рабазанов сай, гIуррара лукIахъес арадеш бедаб сунесну, нуша-ургаб агарти ЧевяхIсини гьалжанализи кабатаб. Илала гъай хIясибли, бегIла гIергъи сунези Айдимирли дурибти дугьби сарри: «ЛукIен! Гьанна ну аркьулрану, хIуни дила мер буца!» Гъай хIясибли, багьесли саби сунела пагьму илис бархьбатес хIейгни, илис халкьлис назмурта лукIес цIакьли дигахъни. Бархьсира саби, белкIунси кавлан, гIелаб калунтани ил гьаниркахъули бучIа.
Макьала ахирличи биркахъули, наб баркалла багьахъес дигулра ил шадлихъ дураберкIибтас, хаслира сиптакарчи Замира ГIямаровас. ВегIли вегIла адамти гьанбуршалли, илди цархIилтанира хъумхIерту.
Анжела Мутазова
