Дагъистан Республикала БекI Сергей Меликовли ДР-ла Халкьла Собраниеличи бархьибси Дугьабизлизиб хасси пикри бяхIчиаиб 1999 ибил дуслизиб Дагъистайзибад халкьани-ургарти къачагъунала кьукьни тIутIукьякьядарибхIейчирад 25 дус дикнила анцIбукьниличи. ИтхIелла анцIбукьуначила дурхIнази ва жагьилтази багьахъес, Дагъиста халкьла цадешличила ва чIумадешличила, Россияла гIяскуртала бургъантала гъабзадешличила, Дагъистан берцахъес багьандан Владимир Владимирович Путинни ва Россияла гIяскарла бургъантани барибси къайгъиличила аргъес гIягIнили саби или буриб.
1999 ибил дуслизир ну республикала «Замана» газетала собкорли рузусири ва Лавашала районнизира рашусири. Лавашала район биалли, ит манзиллизиб «прифронтовой» — фронтла мякьлабси сабливан багьахъурсири. Лавашала шилизирад шалгIердулхъутири БотIлихла районнизи ва Къадарла мер-мусаличи аркьути гIяскурти. Иларадри ярагъ ва берк-бержла продуктуни гечдирути.
Къадарла шайчиб бургъути милицияла хIянчизарти ва Россияла гIяскуртала бургъанти берк-бержличил гIеббуцахъес хъарбарибсири Лавашала районничи. ЦахIнабли район «прифронтовой» ибси девла тIалабуни хIясибли, дуги-хIери кьяшмачи тIашсиван бири. Фронтлис кумекбирнила баркьуди гIеббурцуси хасси штаб акIахъубсири ва ил дуги-хIерилизиб бузусири.
Къиянси заманализиб чула чебла ламусличил ахъибти гIяхIгъабза адамтазибад ишбархIилис чумилра мицIирли агара: НурбяхIянд ХIяпизов, МяхIяммад БяхIяндгIялиев, ГIямар ХIясанов, Шамил МяхIяммадов, Байгиши Байгишиев, Юсуп ГIялибеков…
Аллагь чевверхаб чула бунагь-хатIаличивад ва чемадуркъахъаб илдигъунти дуги-хIери чучибад акIубтачи!
Мегьла кьапIнира чедиили, бронежилетунира чегьурли, МЧС-ла районна отделла начальник МяхIяммад БяхIяндгIялиев ва Лавашала шила бекI Идрис ХIяжимяхIяммадов берк-бержла продуктунани бицIибси машиналичиб дяви бетурхуси мерличи биутири…
Бахъал адамти дуракабухъи, шилизи ляркьути лерилра гьундурачир дебадешуни дарибтири, блокпостуначиб тIашаили, лябкьути-аркьути ахтардибирутири. Дявличи бегIлара гъамси блокпостличиб дергъла тIама бикьусири, мер-мерличирад заки ахъдиубти гав чедиутири.
БотIлихлизи ва Къадарлизи аркьути дявила колоннаби Лавашала шилизир тIашдилзули дири. Тукентала, кафебала бегIтани бургъанти кьацIли балхутири. Гъану шура дус гьалар Лавашала шила дублар гьанналагъунти вачарла центрти ва ресторанти хIедири. ДиштIа-диштIати тукентала ва кафебала бегIти, базарличиб вачуртази ахъибти, цIедешли ва цархIилти продуктунани пакетуни дицIили бургъантас гьала дуцIбулхъутири. Заябиубси техника биалри, жагьилти кумеклис музабухъи, бусягIят балбирусири.
Штабла вакилтала гьарилла чучи хъарси баркьуди лебсири ва ил бетерхахънилис жавабкардеш дихутири. Штабла начальник, Лавашала районна администрацияла бекI НурбяхIянд ХIяпизов ва районна газетала редактор ГIямар ХIясанов районна бекIла кабинетлизиб ихтилатбикIули, чебиули рираси.
Илдачил барх бири штабла вакилти районна собраниела председатель ГIусман ГIусманов, районна бекIла цаибил заместитель МяхIяммадхIяжи МяхIяммадов, РОВД-ла начальник МяхIяммад ГIисаев, гьундурала управлениела начальник Багьаутдин МяхIяммадгIялиев, налогунала полицияла начальник ГIяли ГIяхIмадов, налогунала инспекцияла начальник Руслан Арсланбеков, районна собраниела депутат МяхIяммад БяхIяндов, районна медобъединениела бекI тухтур Рукьият Зайпутдинова, школабала директорти — Шамил ЗубагIиров ва ГIябидат Даудова, бузерила ва адамти хIянчиличил гIеббурцнила Центрла руководитель Байгиши Байгишиев, «Водстрой-2» бикIуси организацияла руководитель Шамил МяхIяммадов ва цархIилтира жавабла хIянчизарти.
Сецад-дигара гапбарес лайикьсири районна больницала коллектив. ЦацабехIти тухтурти ишабад базличибра имцIали хъули архIебякьун. Къадарла мер-мусаличирти дявтазибад гьар бархIира-сера бяхъибти, дяхъи-хъаслабиубти сабихутири. Илдас къуллукъличиб дуги-хIери тIаштири больницала тухтурти ва лебилра хIянчизарти. Илдас кумеклис Ахъушала районна больницала тухтуртира, МяхIячкъалализибад специалистунира башутири.
Аргъра итди бурхIназиб бугIярси, хIябцси сабри, гьаман забли ургьусири ва мусидирихь чебихьунсири. Цагьачам, сентябрьла 7-личир, хъярхъти заб дехIдихьиб ва илди дахъхIи духъяндитIун. Дявлизибад бяхъибти дурасес ва больницализи баахъес гIягIнили хьалли, аргъла шуртIри вайти сарни багьандан, вертолетуни арцес дирули ахIенри.
ИлхIели штабла начальник, районна бекI Лавашала шилизибадти, чула КамАЗ-фургон машина лебти адамтачи кумекбарахъес дугьаизур.
Байхъала сягIятла духIнар авцIайчирра имцIали машина дурадухъун ва Къадарла шайчидяхIли гьайдиуб. ДахъхIиагарли илди чардиуб, районна больницализи вецIну гехIра бяхъибти ва хIябал кабушибти бургъанти баахъили…
ГIергъила бархIи савли дявила вертолет бакIиб, кабушибти ва декIти дяхъурбала бегIти бургъанти МяхIячкъалализи арбукиб. Илди гьуниббатес гIяхIцад адамти дурабухъун. Хьунул адамти бисутири. «Чебарбукагу, Аллагь, дургъбала балагь!» или булгутири.
…Сентябрьла 23-личиб штабла бегIла гIергъиси заседание бетерхур. Дергъ таманбиубли, гIяскурти дураилри. Район сунела гIядатла гIямруличи чарбулхъулри. Ца базличивра имцIали дуги-хIери адамтази гъайикIуси штабла начальник НурбяхIянд ХIяпизовли ил бархIи дахъал гъай хIедариб. Сунела кабинетлизи цалабикибтачи яргали хIеризур, халаси гьигь абатур, дяхIличибад някъ чедиберкIиб ва иб:
— Шукру АлхIямдулиллагь!
Итди дуги-хIери гьамадти ахIенри Ахъушала районнисра. Ишарра митингуни детурхулри, дебадешуни дирулри. Ит къиянси замана районнис бекIдеш дируси духуси, яхIчерси хьунул адам Хамис ШяхIбанова, районна дявила комиссар Сулайбан Варачанов, прокурор Наби СалихIов, районна больницала бекI тухтур ГIябдуряхIман Казиев — илдира итди бурхIназиб паргъатдеш ва чула районнизиб мяхIкамдеш, унра районнис кумекра гIердуцес кьасличил бузутири.
ИтхIелла РОВД-ла начальник, Къадарла мер-мусаличирти дявтазир бутIакьяндеш дарибси, кайзурси, гIяхIгъабза ГIябдуллагь ГIялиев гьанна нуша-ургав агара, бунагь-хатIа урдуцаб сунела!
Дурабадти душмантачибад чедибдеш сархес багьандан, бухIнабтала балгундеш, цадеш, бутIацугдеш диэс гIягIнити диъни чисалра дигIяндеш ахIен. Ил багьандан Дагъиста халаси игъбар саби — Россияличил барх биъни. Россияла бургъантани жан дедиб Дагъистан багьандан. Россияла гIяскуртани ва Россияла Президент Владимир Путинни 1999 ибил дуслизиб Дагъистан берцахъиб. ИтхIели Дагъистан сабицун биалри — чина биркил, се бетаэс асубирил пикриухъалли, аргъес къиянни ахIен, США-ли цацадехIти улкниван бархахъили, буртIули, бирцули, билгIули бири. «Шукру АлхIямдулиллагь—Дагъистан Россияличил барх биъни!» или эс саби кавлуси.
ХъумхIертехIе Дагъистан багьандан 1999 ибил дуслизир жагьилти гIямру харждарибти урусла уршбира!
П.Маллаева
