Муминат Хаттаева
Дагъиста халкьла поэт Сулайбан Стальский акIубхIейчирад 155 дус дикниличил бархбасахъи 2024 ибил дуслизир поэтла хIурматбирути далдуцуни дурадеркIахъес республикала БекI С.ГI.Меликовли культурала Министерстволичи хъарбариб.
«Дагъистайзив цаибил халкьла поэтцун ахIенри Сулайбан Стальский, илала поэзияличила, пагьмуличила хабар лебилра дунъяличиб тIинтIбиубсири. Илини чеалкIутачи ВатIан ахIерабарахъес, халкьла ургар диги калахъес хъарбарибсири», — викIулри С.ГI.Меликов С.Стальскийла Дус балахъули гъайулхъухIели.
С.Стальский 1869 ибил дуслизив Кюрала округла Ашагъа-Сталь бикIуси шилизив акIубси сай. Илини лукIес, учIес балуси ахIенри. Назмурти лезгибала ва азербайжантала мезли уркIиличир дурутири. Неш-дудеш жявли агарбиубли, цIуръали халаваибси урши, беркес кьацI баргес, дурала мер-мусаличи узес арвашусири. Илини Бакула набтла буругъуназив, Самаркандла мегьла гьундурачив, давлачебти адамтачив узули, гьарилра шайчирад мискин адамла гIямру дяркъур. Сунени далути гIямруличила, халаси пагьмуличил назмурти цаладирхъес вехIихьиб.
Совет хIукумат кабизурли гIергъи, илала поэзия ахъли кьиматлабарибсири, дахъал назмурти урус мезличи шурдатуртири. Илди СССР-ла бучIантани дигиличил кьабулдарибтири. Илини, 1934 ибил дуслизир, СССР-ла писательтала съездличир бутIакьяндеш дарибтири.
УчIес, лукIес хI****уси поэт Ленинна орденничи лайикьикибсири, СССР-ла Верховный Советла депутатли викIибсири. 1934 ибил дуслизиб илала чердикIибти назмуртала цаибил жуз дурабухъунсири.
1937 ибил дуслизив поэт итил дунъяличи арякьун.
С.Стальскийла «Дагъистан» бикIуси назмули нушала хъалибаргла гIямрулизирра бутIакьяндеш дарибти сари. Сунела пикруми, назмулизирти пикрумачил цугдикибхIели биэсра асубирар, инстаграм бузуси замана, дила муруй, авторла у гьанхIебушили, урус мезличи шурбатурси «Дагъистан» бикIуси назму сунела инстаграмла бяхIлизи кабихьибсири.
ВяхI, Муъминатли илгъуна назму белкIи сари или бахъал нуша далути уркIбухъунтири. Рахли нуни белкIунси риасри, гIяйиблизи руцесра, туснакъраресра бархли асубири.
С. Стальскийли делкIунти назмуртазибад урухкIути, илала пикрумачи къаршили кабизурти гьаннара лебал. 2016 ибил дусла мартла 21-личиб С.Стальскийла хъали-музей цIадушили хяса-пусул бетаахъурли бигубсири.
БахъхIи агарли, гIяхIбаркьла фондла, ва «Рычал-Су» бикIути минеральный шинна заводла кумекличил хъали-музей, ил-алавти мер-муса, мякьлабси анхъ, юртличи аркьуси гьуни сагадариб.
Дунъяличив сай агарвиубхIейчирад 80 дус дикили гIергъира, илала назмуртазибад цацабехIти урухкIули биалли, ил чевяхIси поэт сай.
БусягIятла замана Интернетла Стихи.ру бикIуси сайтличир илала 58 назму лер. Илди 40500 адамли дучIули сари.
С.Стальскийла «Дагъистан» ва «Булбул» бикIути назмурти дарган мезличи шурдатурли хIушаб гьаладирхьулра. «Дагъистан» бикIуси назму бучIухIели, ил белкIунхIейчибад нушачиб селра барсбиубли ахIен или гьанбиркули саби.
Сулайбай нуни, жуз хIебагьурра,
Амма цархIил секIал гIяхIли багьурра,
Назмурти къияйчил, къияйчил алкIан,
ДацIти гъайлизибад, назму адхIелкIан.
Дагъистан
Рах-магли хIяннири, дубриб дяхIиван,
Паргъатли ухънаван, дила Дагъистан,
Рахли багьбирулри. Някъбазиб ярагъ
Бетарулри вайси, багьи Дагъистан.
Гьунар камсиванри, ряхIятлихIели,
Гьунчив аркьусини хIу итулири,
ГьигьбикIулри гьачам дявила цIали,
Дергъличи гъаргълири, гIурра Дагъистан.
Гьачам вахъ серхурси гIулухъаванри,
Дубурти ихъули дуцI-тIяхIикIуси,
Гьачам кабилхьулри вяшхIебулхъули,
Паргъатли, дубурла гIелаб, Дагъистан.
УбяхIли, кьиркьирли, бирулри рахли,
Къара бистIи багьа хIед кабирхьулри,
Чурхлира бирулри, хIу малхIямлира,
Балагь, балагь саби, хIечил Дагъистан.
Гьачам лачинтази жибикIулри. ГIур,
Уктемти чIакнасра пукьни лушулри,
ХIела ахIентасра, кьяшма белкунси,
Бетарулри хIу дякь, дила Дагъистан.
Гьачам хIечиб халкьла, бекIа бетарар,
Рах-рахли вявбикIуд: «Агь бетахъира»,
Бетарулри гьаман урхIлатас гьамбал,
Даим кьуцур бацIтас, дила Дагъистан.
Илди хIечи башар кьукьнадбиубли,
ХъуцIари хIяршбиру, хIечил держ дужа,
Камси багьаличи бирар разили,
ХIела багьаличи, дурхъал Дагъистан.
Чедибад чебаэс, сукъур ахIенри,
Кавказ. Гьачам ахIен хIела абхьибти,
ХIулбазиб абалки цIа чебаибси,
РухI сукъурли сари, хIела Дагъистан.
Гьачам хIу халалри, гьачам биалли,
Дила гьалаб виштIал, уршиван сабри,
ЛихIби лерлихьалли, даим гIянцIлири,
ВиштIаси ва гIянцIси хъяша — Дагъистан.
Сулайбанни нуни, назму белкIунра,
Бархьдешлисцун нуни къуллукъбирулра,
Бикьулрив? Агара, гIур хIериэс цIакь,
Илцад балагьличил, аргъа Дагъистан.
Булбул
КIапIри, цIедеш агара,
Дила гIинцла галгала,
Илаб далайбикIулри,
Сабурагарси булбул.
Гьари сен сабри? ГIурра
Анхълизиб шятIбикIуду,
Нуша мучлахIейруси,
ХIед хIу баибси булбул.
ГIурра вичIирбикIулри,
ХIерли баргес хIейраргу,
Анхъ кIарали бяхъялли,
Агь бахъ уктемси булбул.
Къачагъ, гьалакмабикIуд,
Яни сен хIербиубри?
Гушбиубрив, гьарахълаб?
Азаддеш дигул булбул.
Гушдеш агу, шурмазиб,
Яни кьяркьси хIебурги,
Палтар лер гIянтIикIати,
ГIямру дигахъул булбул.
ВацIализибяхI арци,
ХIу берцахъес хIейрусну,
Къаршимабиаб къиргъу,
Дила гьалакси булбул.
Бахъ ахъли займабикIуд,
РяхIятли далайбикIен,
Граммофон ахIенри хIу,
БучIуси чяка – булбул.
ГIур хIу децIхIебикIесли,
Манзил дугIли мабуркIид,
Пукьа белшес чевкъарну,
Бахъ гапмабикIуд, булбул.
Гьачам ванабиайчи,
МабикIуд ахъли далай,
Сулайбан хIеризахъа,
ХIечи, уктемси булбул.
Назмурти шурдатурси М.Хаттаева.
