Нушала жагьилтани жура-журала бяхIчибизуназир гьар бархIи сагати пагьмурти гьаргдирули сари. Республикали ва абзурли улкали чеалкIуси наслулис ил шайчир дахъал имкантира гьаладирхьули сари. Илди сари жура-журала абзани, телепередачаби, концертуни(шоу), хIязти, фестивальти, мажлисуни….
Иш макьалализирти гъай далайла пагьмулизир сунела устадеш чедаахъибси Сергокъалала районна ГIяймаумахьила шилизирадси Наида ГIялиевачила сари. Сунела къайгъиличирли ва гъираличирли ил гьанна Россиялизирцун ахIенну, дурала улкназирра машгьурриубли сари.
Бара гьалабван Сергокъалала районна бекIлибиубсигъуна библиотекализиб эстрадала сагаси зубари Наида ГIялиевачил гьунибаъни бетерхур.
Школализир ручIухIелил Н.ГIялиевас дебали далайла пагьму дигахъусири ва халаси иштяхIличил илис замана багъишлабирусири.
2022 ибил дуслизиб лебил Россияла фестивальличиб «Россияла студентунала хIеб» бикIуси номинациялизиб илини кIиэсил мер касибсири. Илаб Н.ГIялиевани дарган мезла далай сабри белчIунси.
Илала социальный сетаназир нушани дарган мезличи шурдатурти улкнала гIяртистунала далуйти чедаэс дирехIе. Илди далуйтачибли (каверы) Наидала пагьму лерилра социальный сетаназиб тIинтIбиуб.
«Школализир ва лагерьлизир дурадуркIути далдуцуначир нуни далуйти дучIутири. Илис гьаларра риштIахIелил хъулирти шадлихъуначир ну мурталра далайрикIусири. Дусми аркьукад далайла пагьмулис нуни халаси замана декIарбирес рехIрихьира. Университетлизир ручIухIели «Студентунала хIеб»-лизирра нуни мурталра бутIакьяндеш дирутири. 2022 ибил дуслизир «Лебил Россияла студентунала хIеб»-личи Самарализи рякьунсири ва II-ибил бутIала лауреат ретаурсири», — или бурули сари Н.ГIялиевани сунела ихтилатлизиб.
2024 ибил дуслизиб дураберкIибси «Перепой звезду» бикIуси концертличиб (шоу) илини гIяртистличибра жагали далай белчIун ва арцла шабагъат сархиб.
Илкьяйдали Наида конкурсла финаллизира дурарухъун….
Сергокъалализиб бетерхурси гьунибаънилизир бутIакьяндеш дариб: районна администрацияла вакилтани, халкьли, школабала бучIантани, илала цашилантани ва Наидала пагьму дигахъутани. Жагьилтала къуллукъунала шайчивси бекIливиубсигъуна хIянчизарли районна бекIла къуллукъуни заманалис дузахъуси ГIяхIмад ГIялихIяжиевла шайзибад Н.ГIялиевас Баркаллала кагъар бедиб.
Наида ГIялиевани балбуцла бутIакьянчибала суалтас жавабти дедиб ва халаси ихтилат бариб. Чумал далайра илини зайдухъахъун. Ахирличиб сунела пагьму дигантас ва ил кьиматлабарибтас рурсили халаси баркалла багьахъур.
Нушани биалли, Наида ГIялиевас арадеш, сабур ва разидеш дулгехIе. Сунела пагьмула бегIлара ахъти ахъанайтачи арацIахъес ЧевяхIси икьалавиаб. Нушанира ил гIерруцес къайгъибирехIе.
П.Шахова
