Юрт лушусини хьулчи чIумаси кахIебихьалли, ил гъятIбиръур. Ил багьандан дубурлантани чIумаси хьулчи кабирхьули бирар чула юртанас. Илдани дарибти юртани дусмадли тIашли чедиухIели, илдала къайгъни чедаэсли сари. Шимазибадли адамти гечбиубли, калунти юртанала луцри даимдешла бикьрумиван ва хала бегIтала гIелаб калунси чебяхIси давлаван ишхIелла манзиллизирра хамли тIашли сари…
ЖамигIятла кьисмат «лушухIелира» гIямрулис умутчебси хьулчи кабихьес хIяжатли биъни балуси саби дубурлантани. Илкьяйдали улкалис бегIлара къиянти дусмазиб дубурла гьарахъти шимазиб акIубти гIяхIгъубзнани чеалкIуси наслулис гIямру къулайдиахъес багьандан чула цIакьанира багьудлумира харждирули, дуги-хIери хIебикIули бузули, яшавла шуртIри гIяхIдулхъахъутири, республика ва улка вавалидяхъяхъес кьасаназибтири. Илдигъунтала лугIилизивадсири Сергокъалала районна ХIурхъила шилизивадси ХIяжиев МяхIяммадсягIид ЛугIмановичра.
…Р.ХIямзатовла уличилси республикала Миллатла библиотекализир краеведениела отделлизир рузуси адаб-хIяяли жагарарибси Салимат ХIяжиевачил тянишриубхIели, нуни аргъибсири ил кабизалачебси хъалибарглизирадси риъни. Ил секIал марбариб дубурлантала гIямру къулайдирахънилизи халаси пай кабихьибси хабарла хIурхъан Хадижат ГIялиеванира. Илини мурталра Салиматлизи бурули рири: «ХIурхъила шилизиб бурибси хIурматла хъалибарглизирадси хIуни гьарил секIал ахъси даражаличир дирни балуси саби нуни…».
Гьарли-марли Салиматла бегIти шила къакъбяхъуни ва жагьилтала хъарихъунили бирутири. Илдала пергерти баркьудлумачила саби иш белкIра.
ХIяжиев МяхIяммадсягIид ЛугIманович МахIаргила бехIбихьудла школализив мугIяллимли 1940 ибил дусличивадли узули калунсири. ГIур 1943 ибил дуслизив УбяхI МулебкIила шила советлизи кабурхуси БахIмахьила бехIбихьудла школализив заведующийли узахъес вархьибсири. КIинайс Чечняла областьла Шурагъатла районнизи вархьиб. Багьудлуми тIинтIдирнила шайчибси Министерствола хIукму хIясибли, 1947 ибил дуслизив мугIяллимла хIянчилавад акьуватур, ва илхIели Дагъиста шила хозяйствола техникумлизи керхур. Ил 1950 ибил дуслизиб таманбариб. Ил дуслизир иличи ХIурхъила ветучастокла заведующийла къуллукъуни хъардарибтири.
— Будайчи Мажидовра дудешра барх бузули калунтири. Илдала хIянчила мер мурталра нушала юртлизибри. ХалахIерхуси дила дудеш мурталра адамтачил валкайкибси вири. МулебкIила шилизибра дудешла халаси хIурмат бири. МулебкIан ГIяхIмад Сулайбановра дудешличил варх хIяйвантала тухтурли узули вири. ХIямид ТIалхIятла уличилси совхозла ва ила кадурхути лерилра шимала адамтала мицIираглис илдани медициналашалси къуллукъ гIеббиахъусири. Дебали пергерти хIял-тIабигIятла вегI ГIялихIяжи ГIялиев ит замана районна ветучастокла заведующийли вирусири.
Куйбышевла уличилси МулебкIила ветучастоклисра дудешли бекIдеш дирутири. Шилизир 4 телефон сарри лерти: шила советлизиб, больницализиб, школализиб ва нушала хъулиб. Дуги-хIерила сегъуна-дигара манзиллизиб зягIипбикибси хIяйван берцахъес дудешличи адамти дугьабилзутири. Итмадан, урчи балкьаахъурли, дудеш дураулхъи. Зянкъ дакIалри, нуша хъалибаргра мурталра чериргъутири. Узби-рузбани чебяхIси даражала багьудлуми касиб ва гьанна илди чердикIибти санигIятуни хIясибли, хIурматличил бузули саби. Дудешла санигIят чеббикIес цалра дурхIя хьулхIевхъун. ЧIянкIли регIлара халасигъуна Раисатли тухтурла санигIят касиб.
Шилизибра бурибси Гадай-жанайхъала жинслизив акIубси сай дила дудеш. Берхъибси хъалибарг сабри нушала, — бурули сари Салиматли, — неш КьадигIялила ГIямаршала ва Аминатла рурси ПатIимат сарри. Илала дудеш КьадигIялила ГIямарша кIел Георгиевла къанчличи лайикьикибсири. Ил ХIямид ТIалхIятличил варх ГIяякьакьалаб кабикибси дергълизив ургъули калунсири. Избербашла музейлизир иличила баянтира лерти сари. Илала кIел рурсилизирадли ца дила неш сари, нешла рузи ГIябидат Верховный Советла депутатли рирусири. Дагзэто заводла гьаркьяси крановщицали рузусири.
БиштIахIейчибадли унрубили бирути Салиматла бегIтани 1944 ибил дуслизиб кьисмат цабарибсири. Илдала авал урши ва авал рурси — Раисат, МяхIяммад, Мухтар, ХIябиб, Сарат, Салимат, ЛугIман, Аминат — бегIтигъунти гIякьлу-дагьрили жагабарибтили, адабчебтили халакабаиб.
Хъалибарг ункъли хIербарес багьандан, халаси къайгъибирусири МяхIяммадсягIидли. Илини, чина укьяллира, дурхIнас савгъатуни дихули вири. Илкьяйдали МяхIяммадсягIидли хъалибарг гьарил секIайчил гIеббурцутири. Яшавла шуртIрира ункъдарес къайгъилизивсири.
ХIера, Будайчи Мажидовлира сегъунти пикруми дурулил имцIатигъунти гIямрулизив сунечил варх узули калунси МяхIяммадсягIид ХIяжиевличила: «УркIила халаси дигиличил гьануршули вирус сунела хIялалси бузериличил хIурхъантала ва алавти шимала адамтала бархли хIурмат сархили, гIямру деркIибси дила марси юлдаш, набчил дарх дахъал хIянчи дарибси мицIирагла тухтур МяхIяммадсягIид ХIяжиев. Ил устадеш, азгъиндеш агарли узи, илала кайцIуси гьарил ганз, буруси гьарил девла кагибдеш набра гIибратли детаур. Ил набзи, гьалакхIейкIахъес, сабурличил узахъес маслигIятикIи. Нушала гьар шилизиб юлдашунира бири. МяхIяммадсягIид илдас дебали вигахъи. Ил левси къушумра мурталра жагасили ва разисили бири.
Гьарли-марси асилси ва гIибратчебси сабри илала гIямрула гьуни. Дила юлдаш сабур мургьила, хIял-тIабигIят арцла адам вири викIаслира, хатIахIеркус. Илини сунела ПатIиматличил барх 8 дурхIя абикьур, илдас гIяхIси бяркъ бедиб, чебяхIси даражала багьуди касахъиб ва гIямрула бягIуси гьунчи дураиб. ДурхIнира, бегIтигъунти малхIямти, духути, ши-шанти биганти бетаур».
МяхIяммадсягIид къайгъилизивсири сунела дурхIнази къиян чехIебаахъес ва илдала гIямрула гьуни игъбар-талихIли шалабарибсили бетаахъес.
— Кьарличи мадашудая викIусири ил, — гьанбиркахъули сари Салиматли, — илкьяйдали къияндешунала дукIлиуб къакъла чIала изескабиэс асубирар ва ил гьамадли сагъбарес вируси ахIен. Рахли рурсбачил дарх кьарличи дукьес хьулдухъадалли, мах анхълизиб батирая, нуни урчила уркурличи кабихьили лебхисну.
— Дудешли нушази цархIилти къиянти хIянчира хIедирахъи.
МяхIяммадсягIи савли-жявли айзурмад, алавти шимази хIяйванти дармадарес вашусири. Ил МулебкIила, МахIаргила ва цархIилти шимази виусири адамтала жи хIясибли ва сунечи хъарти хIянчи дурадеркIес багьандан. МяхIяммадсягIидли сунела урчиличил мурталра шими алавдирутири ва санигIят хIясибли сунечи хъардарибти масъулти ахъси даражаличир арзес бажардииркусири. Илини сунени чеббикIибси санигIят илцадра ункъли бяркъурлири ва хIурхъантала умутчевси хъарихъли ветаурсири.
МяхIяммадсягIид хъулив агархIелира, хъалибаргли хIяжатбикибсилис дарман бедес балусири.
ПатIиматлира шила хозяйствола техникум муруйчил барх белчIунсири. Ветфельдшер ва санитарка сарливан, илини белгиси хIянчи дурабуркIусири. ХIяйвантала хIи адилтIухIелира, пробиркабачил хасси хIядурдеш хIяжатсири. ИлхIелира кулпетли кумекбирусири.
ГIяхIял-шантас дяхI шаласи хъалибарглизиб мурталра адамти камбирути ахIенри.
— Нушала хъулиб гIяхIли агарли гьанхIебиркур наб, — рикIули сари Салимат, — дудешлира лаг вашусира катхIел аркьусира хъули хIекили валтуси ахIенри. Илкьяйдали ХIурхъила шилизирхIели нушала юрт мирхъила тIакьаван вахкабикIули бири. 1970 ибти дусмазиб дила дудешли МяхIячкъалализиб юрт асибсири. Шагьарлизиб тухумти лебли биалра, илис чичилра хъарахъес хIейгахъи.
— Жявлил МяхIячкъалализи гечиэс дигули хьалли, дудеш сунела илцадра дигуси хIянчи батес хIейгули, шилизив калунсири. Илала дурабадра, сунела бегIти батурли, чиналра укьес кьасхIебариб.
ПатIиматра адаб-хIяяла ва ламус-хатирла регI рири. Сунела мура бегIти ХIяжикьадила ЛугIмайс ва ХIуриматлис ил дебали дигахъи, чус гIяхIси къуллукъбирни багьанданра: гьаланачи беркала илдас бурхьусири, кIинайс — кулпетлис кабирхьусири.
ХIяжикьадила ЛугIман бахъли валусири. Илини дахъал хIянчи дарибтири. Ил Къаякентлизив бялихъунала батагъализив узиб. Итди къиянти дусмазир илини хъуми исутири. Ил багьандан кулакварили, илис дахъал къияндешуни чекасесра чебуркъубсири. ВегIла къияйчил цалабяхъибси яшавла даража гIяхIбухъахъес асухIебируси бурги итхIели. Илала авал уршира ца рурсира лебтири. Илдачил варх ХIяжикьадила ЛугIмай ИсмягIил бикIуси цIуръа уршира ца хъулив хIерварибсири. Ил хъайчира катурли, хъура унцира дедили, бекIварибсири. Ил гIяхIцад дусмазив Къаякентла районна Краснопартизансклизив хIерирули калун. Гьаннара илаб илала хъалибарг леб или, гьанбиркули саби.
Шила хозяйствола хIянчизарти-ургаб хIяйвантала тухтуртала халаси хIурмат бири итхIели. 25 дусцадхIи шилизив хIяйвантала тухтурли узули кали гIергъи, 1978 ибил дуслизив МяхIяммадсягIид хъалибаргличил МяхIячкъалализи гечиуб. Кьанни биалра, Дагъиста шила хозяйствола институтла ветеринарияла факультет таманбарили, илини чебяхIси даражала багьуди касиб. 1978 ибил дуслизив шила хозяйствола Министерстволи Каспийскла ябнала заводлизив узахъес вархьиб. Иличи «Дагестанский» совхозли бекI тухтурла къуллукъуни хъардариб. Ил совхозла ипподромлизир Ахалтекила жинсла ябни адилкьутири ва илдас гIяхIси къуллукъ гIеббурцусири.
ХIяйвантала тухтур сайливан, урчи адилкьнила кьяли гьалабяхI башахънилизи дудешли мекелли халаси пай кабихьибсири.
— Дудешла хIерудилиурти ябни чуйнара абзаначир чедидикибтири. Илдани лебил Союзла абзаназир ва выставкабачир цаибти мерани сархутири. Ахалтекила хабарла урчи гIяхIцад дусмас гьалар Дагъистайзи кибтири. Каспи урхьула мякьлаб илдас 800 гектарла мер декIарбарибсири ва «Дагестанский» ибси совхоз акIахъубсири. КIинайс ил мерличиб урчи адилкьуси машгьурси завод бетаахъурсири. Ил заводли халаси хайрира бихусири республикалис. Туйри дирцутири халкьани-ургарти турканачир (аукционтачир). Гьайгьайрагу, илди дурхъали исутири. ХIейгеси биалра, СССР пашбехъубли гIергъи, илди адилкьнила баркьуди бузахъули ахIен, — гьанбиркахъули сари Салиматли.
ИтхIели илав машгьурси Владимир Петрович Шамборант бекI зоотехникли узусири. Владимир Петровичли сунела лерилра гIямру Ахалтекила жинсла ябни адикьес харждарибтири. Илра МяхIяммадсягIидра барх бузутири ва гIяхIти юлдашуни бетауртири.
МяхIяммадсягIидли сунечи хъарти хIянчи ламусличил дирутири, амма сунечила сегъунтилра гапла гъай хIейгахъи, я сунес шабагъатунира хIурматла умира дедахъес или чиналра дугьахIейзур. Сунечила макьала бархли белкIахъес разихIерки.
Гьарли-марти дубурланти илдигъунти адаб-хIяяличилти, ламус-хатирли жагабарибти бирар. Чус ута бикахъес, шабагъатунира хIурматла умира гахъес багьандан, чучила гапла гъай дурестала гьалаб лявбикIутира ишхIелла манзиллизиб къаршибиркухIели, илдани дубурлантала гIядатуни ва баркь-бац сегъунти дирутил балули хIебургар или гьанбиркули саби.
ГIяхIгъабзала хъули цалабиркутира сайгъунти бирар ва илкьяйдали дубуланти-ургар узидешла бархбасуни чIумадирар. Хъулибти дурхIнас илдигъунти дубурландешла бегIлара черяхIти къиликъуни гIерисес имканти алкIан. Гьарли-марли, МяхIяммадсягIид ЛугIмановичла дурхIнира илкьяйдали хала бегIтала адаб-яхIла бетуцуни хIясибли бяркъличи бикахъибти ва кабизалачебтили халакабаибти саби.
Илкьяйдали бахълис гIяхIдешуни дарибси ва пергер дурхIни абикьурси адамли сай итил дунъяличи арякьи гIергъира ванзаличир мурхьти къел гIелар датур или умутличил бурес вирар. СенахIенну бегIтала гIяхIбаркьуни дурхIнанира даимдирули сари.
Ишдус МяхIяммадсягIид ЛугIманович акIубхIейчирад 100 дус дикили сари. Ил тылла ва бузерила ветеран сай. МяхIяммадсягIид ЛугIманович хIукуматла шайзивад дахъал шабагъатуначи, Баркаллала кагъуртачи лайикьикибсири. Илдигъунти пергер адамтала баркьудлуми ва гIямру чеалкIуси наслулис гIибратлис гьаладирхьни нушала чеблализи халбирулра.
Тамара ГIябдусалимова
