«Дубурла мер-муса къулайдирни» ибси проект гIямрулизиб дурабуркIули, ХудуцIла шилизиб машинаби тIашиэс хасбарибси мер хIядурбарили саби. Иличибли шилизиб адамтас гIяхIцадла кункдешра акIубли саби. Проект бяхIчиаибси саби дубурла шимазир яшавла-экономикалашалси бетуц гIеббурцнила ва гьалабяхI башахънила баркьудиличи. Илдигъунти къулайдешунани шилизи лябкьути адамтасцунра ахIи, гIяхIласра кункдешуни алкIахъули сари.

Шила бекI Рабазан Ибрагьимов викIи: «Шимала мер-муса къулайси даражаличи диркахъни пачалихъла пикрила дайлабси масъала саби. ХудуцIла шилизиб машинаби тIашиахъес хасбарибси мер балкьаахъни гIяхIти шуртIрачилси челябкьлализи ганз кацIни саби. Илдигъунти баркьудлумачирли дубурла шими гьаладяхI дашахъули ва вавалидирхъяхъули сари. ЦархIилти шимала адамтира худуцIлантала баркьудили уркIичеббирниличи ва ил гIяхIбаркь гIебисниличи нуша дирхулра. Илдигъунти баркьудлуми шила шантала гIямру къулайдирахъниличи дяхIчиаибти сари».

ХудуцIланти шила бекIлис ва подрядчик А.ЯхIъяевлис, илини бекIдеш дируси устнала кьукьялис ламусличил чучи хъарси хIянчи дураберкIни багьандан баркалла бикIули саби.

ГьанбиркахъехIе, ХудуцIла ши кабурхуси саби «ГIяштила» шила советлизи. «Мерличирти сиптаби» ибси проект гIямрулизиб дурабуркIнила дазурбазир арбякьунси дуслизир ГIяштила шилизир машинаби тIашиахъес хасбарибси ва адамтази бармсриихъахъути мер-муса далкьаахъуртири. Илдигъунти багалати баркьудлумачирли шантас къулайдешуни имцIадиуб. Илкьяйдали тIабигIятла жагати мер-мусаличиб гIяштанти умуси гьаваличил пайдалабикIули, ихтилатбикIести имканти акIахъни дигеси ва баркаллаличи лайикьси баркьуди саби.

Дахадаевла районна администрацияла пресс-служба