«Устахана. Нешла някъби» бикIуси проектла руководитель Зубайдат ХIясановани Дагъистан Республикала БекIла шайзибад яргаличилси Грант касиб.
Гражданинтала сиптаби гIердурцес ибси мурадличил ДР-ла БекIла Грантуни гьаладирхьнила шайчибси советли 2024 ибил дуслизиб дураберкIибси конкурсла баянти каиб. Конкурсличи 101 гIярза кьабулдарибтири. Идазирадли 30-йчирра имцIали проект чедидикиб.
Чедиб гьанбушибси советла хIукму хIясибли, «Устахана. Нешла някъби» бикIуси багьудила ва насихIятчила проект гьаларти мераначи дурадухъунти проектунала лугIилизи каберхахъур.
«Ил советличил барх бегIлара гIяхIтигъунти проектуни декIардарахъес арагIебли улкализибад 50-йчибра имцIали эксперт битIакIиб, чулара илдигъунти баркьудлумала шайчир халати устадеш лерти», — багьахъур ДР-ла Правительствола Председательла заместитель ГIябдуряхIман МяхIмудовли.
«Ириъ нушани культурабала сиптабала Президентла фондла лебил Россияла конкурсличи «Устахана. ГIямрула галга» бикIуси проект гьалабихьили, чедибдеш сархибсири. Ил проект хIясибли ишдусла сентябрьличи бикайчи дузутира. Иш гьакIлизибра нушала «Устахана. Нешла някъби» бикIуси проект гIеббуцниличи дебали разилира. «ГIямрула галга» бикIуси проект жявхIелила Хайдакьла халкьла культура «мицIирбарниличи» ва мяхIкамли бихIниличи бяхIчиаибси саби. Буралли, иш 12 эсил Грант саби нушани касибси. Илини нушала проектуни гIямрулизир детерхахъес икьалабиру», — буриб Зубайдат ХIясановани.
«Устахана. Нешла някъби» проектла дазурбазир школабазир, культурала учреждениебазир, халкь бекIахъудила хIяжатуни тамандируси Центрлизир, «ГIямрула галга» ибси проект хIясибли абхьибти майдунти дузули сари.
«Сентябрьличиб Хайдакьла някьишличи ва илдала мягIна иргъниличи бурсибиэс дигути рурсбала кьукья цалабирхъуси саби. Гьаларла проектунала дазурбазир багьудлуми касибти устнани сари майдунтас бекIдеш дирути. Арбякьунси дуслизиб Хайдакьла някьишличи бурсибарили, дураибти рурсбас «ЭтноДизайнер» бикIуси студия абхьили бирар. Иличибли урхIмешули ахIенси культура мяхIкамбарес, 14-личибад 24 дусличи бикайчити жагьти рурсби дизайнерла баркьудиличи бурсибарес имканбикIур. Хасти майдунтала руководительтас ва бутIакьянчибас Р.Ченсинерла «Кайтаг: Искусство текстиля из Дагестана» бикIуси жуз кумекчили бетарар.
Лерилра майдунтала, этно-дизайнертала студияла бутIакьянчибани, руководительтани ва устнани республикала кьадрила «Сагаси наслу» бикIуси выставка-фестивальличир чула ваяхI гьаладирхьу», — баянбариб «Кайтаги» этноцентрла директор З.ХIясановани.
Хайдакьла районна администрацияла пресс-служба
