Савли батбирхьуси МяхIячкъала – Москва поездли наб дебали дигахъуси шагьарлизи кира. Ил саби Астрахань. Илаб жявлил хIербирули саби нушала цаванзаланти-дагъистанланти ва, Астраханьна область чула кIиибил ВатIайзи халбируси саби. Илдачилти дила гьунибаъниби дяхI шалали, уркIби разили детурхули дирар. Ишаб дила очеркунас ва документуначи хъарахъили, цаладирхъути жузас игитунира баргира. Буркьа шагьарла кьакьурбикад къунзухъалли, чула сарил назмула тахтаби алкIули дирар.
ХIера, садаира Астраханьнизи. Вокзаллизив наб гьуниваиб ГIябдуллаев ГIябдуллагь МяхIяммадович, 60 дус виубси, ахъси, кегIебси чархла вегI мурул адам. Астраханьна областьлизивси ДР-ла вакил Юсуп МяхIяммадович викIуливан: «ГIябдуллагь МяхIяммадович къугъати гIяхIялдеш дируси, адаб-хIяяличилси адам сай».
ГIябдуллагь МяхIяммадович акIубси сай 1955 ибил дусла июльла 12-личив Ахъушала районнизив, МяхIяммад ва Музират ГIябдуллаевхъала халаси хъалибарглизив. Илала дудешла хала дудешла верхIел узи лебтири. Илдазивад ца Деникинна гъармукабачил ургъусири, цархIил – шилизибси мижитла имам вирусири. ГIябдуллагьла дурабад, хъалибарглизиб цархIилти дурхIнира халабиулри. ДурхIнала дудеш шила колхозла фермализив заведующийли узусири, нешли биалли – хъали-цIа къугъали бекIдирутири ва дурхIни жагали абилкьутири. БиштIали лебай дудешли дурхIназир бузериличи диги адикьур. ДурхIнани бегIтас хозяйстволизиб кумекбирулри: мазаличил дуки башули, урцул кавдули, мура удули, атхIеблизир картошка делгIули, гIебшни илди луцIули. 8 класс делчIи, ГIябдуллагь халасигъуна рузичи гIяхIладли Ногъайла районнизи арякьунсири. Илис илаб рузила муруйчил варх букIунни узес гIяхIкабизурсири ва, гIярмиялизи укьес замана баайчи, илав калунсири. ГIябдуллагь ВатIа гьалабси чебла ахъес арякьунхIели, илала рузила хъалибарг Астраханьна областьлизи гечбиубсири.
ГIярмия ахъили, хъули чарухъунси ГIябдуллагь хъайчикайбсири. Илдала акIуб кIел дурхIя, кIинайс ил рузичи гIяхIладли Астраханьнизи арякьун. Мургьила гIебшни сарри. Заманали ГIябдуллагь чIумали кIапIуциб ва ватхIеиб. ИшбархIира ил Астраханьна нигIматла ванзали хъябруцуцили сай. ИтхIейчирад 40 дусцадхIи ардякьи сари. ГI.ГIябдуллаевли сунела хъалибаргра Астраханьна областьлизи гечбарили, бузерили ахъиб. Ил мазала букIунни калун, илини дашахъути помидортала журали Москвала ВДНХ-лизиб бетерхурси выставка-ярмаркаличиб цаибил мер буцибсири. ГIябдуллагьла бузери Наримановский районни ахъли кьиматлабарибсири. Илис Наримановский районна бекIла шайзибад Баркаллала кагъар, дахъал дусмазив хIялалли узни багьандан, Астраханьна областьла шила хозяйствола Министерствола шайчирад ХIурматла Грамотаби, РФ-ла шила хозяйствола Министерствола Диплом дедиб. Илкьяйдали ВДНХ-лизиб бетерхурси выставка-ярмаркаличир жигарла бутIакьяндеш дарни багьандан, ГI.ГIябдуллаев Москвала мэр Ю.Лужковлира шабагъатлаварибсири.
ГI.ГIябдуллаевла «Дерхъаб» ибси уличилси хозяйстволи Наримановский районнизир дурадуркIути байрумтас кумекбирусири. Совет хIукумат пашбехъубли гIергъи, мицIираг адилкьнила баркьудилизиб вегIдешла бизнеслис гьуни баргес умцIерухъун. Лерилра дяркъурли, ГI.ГIябдуллаев бизнесла дунъялизи тамай гIелаикиб ва гIяхIси хайри кайсес вехIихьиб. Хайри имцIабикIуцад, бизнесла дазурбира дягIудикIулри. 2014 ибил дуслизиб Наримановский районна Сольянка бикIуси шилизиб 70 адамлис хасбарибси, «Дагъистан» ибси уличилси хIябдерхIла гостиница тIашбатур, сунезирра ункъли бамсриахъес виэсти шуртIри акIахъубси. Илаб Ираннизи, Казахстаннизи, Северлизи дашути халати камазунала шофёрти мурталра тIашбилзути саби. Гостиницализир далкьарахъути Азияла ва Кавказла хурегуни наб дебали гIяхIдилзан.
Халаси хозяйстволизиб ГIябдуллагь ГIябдуллаевлис уршбани кумекбирули саби. ГIябдуллагьли сунела хьунул ПатIиматличил барх 4 урши ва 3 рурси абикьур, гIяхIси бяркъ бедиб, багьуди касахъиб ва гIямрула бягIуси гьунчи дураиб. Халасигъуна урши МяхIяммад дудешла балуй някъ сай. КIел рурсили юристла санигIят касиб, ца урши журналист сай.
ГIябдуллагь МяхIяммадович Аллагьличи вирхуси адам сай, илала хала дудеш шила имамли вирусири. 2016 ибил дуслизиб хIяж дураберкIили, ГIябдулла-ХIяжи ветаур. Бамсриагарли узуси, гIяхIси уркIила вегI ГIябдуллагь хIяжатсилис кумекла някъ гьабатес гьалакли вирар. Адамла уркIи аргъни ва илис кумекбарни «Бедлугусила някъ мискинхIебирар» бикIути хала бегIтазибад гIебасибси къиликъ саби.
Астраханьна областьлизиб шайчи шали чебетаахъили, дагъистанлантира, казахунира, татартира, урусунира бузули саби. Лебтанилра ГI.ГIябдуллаев ункъли вала, илала хIурматбиру, насихIят гIеббурахъес дугьибилзан, чула уркIи-кIацI дуру. ВегIла халкьла дурхъати гIядатуначивли халаваибси адам, рухIлашал давлачевси вирар. Илдигъунти адамти-алав шалати нур пярдикIар ва макьлатисли мегьван цархIилти адамти чучи битIикIу. Ил сабабли саби нушала цаванзалан ГIябдуллагь МяхIяммадовичлира адамти сунечи битIикIути.
ГIябдуллагь МяхIяммадовичгъунти дагъистанлантала баркьудлумачи ва сархибдешуначи пахрубируси саби нуни. Илдани Астраханьна областьла тарихлизи белгиси пай кабирхьули саби, илаб хIербирути халкьла гIядатуни дузахъули, цазаманализир чулара хъумхIертули. Лебтасалра ашкарливан, дагъистанлантани ва астраханлантани дахъал дусмазир чIумати гьалмагъдеш дузахъути сари. ГI.ГIябдуллаев кIелра узидешла республика челябкьлализирра культурала ва экономикала шайчир гьаладяхI дашниличи вирхули сай.
Бикеханум ГIялибекова
