Гьалабван Дагъиста пачалихъла университетла филологический факультетлизиб бекIлил хабарагарси гьунибаъни бетерхур.
Дарагантани гIяхIил валуси, дарган рухI хIердируси нушала профессор Муса Расулович кьакьалав къаршиикиб.
— 44 дус гьалаб хIуни таманбарибси факультетлизи ацIес хIейгулрив? – хапли хьарбаиб илини.
— ГIяхIси пикри саби, — викIулра ну. – Сепайда, иш юрт гьанна бацIли бургар: студентунанира мугIяллимтанира дуцIрумла бамсриихъули бургар?
— Леб калунти студентунира, леб сагали бакIибтира. Илдас хIечил къаршибикесра дигули саби…
Марлира, ил бархIи студентунала харидешла бархIили уббухъун: чис хабарри, студентуни-выпускникуни факультетлизи дипломти касес бакIили биънила? Гъамси заманализиб илди школабази учительтили бузес аркьути сабри.
ХIера, Муса Расуловичли сунела бучIанти гьарзаси кабинетлизи жибариб. Илдачил варх – нура.
Выпускникунас гIяхIти гьунби дулгули, преподавательли дипломти дедес пикрибариб. ГIур илини чумал студентлис дипломти набзира дедахъиб.
ХъумхIертур Муса Расуловичли дурхIнази чула челябкьлаличила суалти гьаладихьесра:
— Зарема, дигулрив нешла мезла учительницани ретаэс ва рузес? Яра ил санигIят хIед бегIтани чебигьунси хIебиалли?
— АхIен! Нуни учительла санигIятличи риштIахIелил пахрубирули рираси.
— Зульфия, хIуни кьалли ил хIянчила тIем балуси саби. Иша ручIес ракIайчира школализир рузули кали ахIенрив?
— Рузира. Нушала школализир. Гьанна ила чарра рулхъусира.
— Ну хIечи вирхулра, ГIяйшат, хIянчилизибра хIунихIурмат сархид. Наб хIела бузериличила гIяхIла хабар аргъес дигахъира.
— Муса Расулович, ну багьандан хIу урузхIейрахъури…
— ПатIиматбика кьалли, дила пикрили, шагьарлизир кавлан. ГIе, шагьарла дурхIнасра нешла мез хъумартес асухIебирар. Яра хIела кьас цархIил биэс?
— ЦархIил кьас агара: вегIла мез хIедалутачи дила гьимидулхъули дирар. Сеннира риубсигъуна пай кабихьес пикри саби…
— Баркалла. Детерхаб хIушала кьасани!
БекIлибиубси – выпускникуни разили сабри: саби-бегIси бузерилизи ахъни ил халаси анцIбукь саби адамтала гIямрулизиб. Дипломтира садирхъули, вичIиркабикIути илдачи хIерикIули, наб хIебла мирхъи гьандикиб, чулира, вавначир гездикIули, варъа бурчути. Биаб хIушабра, ахIерти выпускникуни, цаибси хIянчи хIебла варъаван бизили тIембикIуси!
Ихтилат ахирличи бикибхIели, Муса Расулович дугьаизур:
— Нушачи гIяхIлад вакIибси чи саял валулраяв?
— Писатель.
— Нуни илала «Марисуд, Жамилат» бикIуси жуз белчIунсири. ГIяхIбизур.
— Нуни «Турцияла заклиуб» бикIуси роман белчIунра.
— Ил нушала унрашан писатель сай…
— Гьанна сегъуна жуз лукIулил аргъес дигахъира.
— Набра…
Ил бархIи, тяп хIядурбарибхIеливан, набчил барх сагаси «Урехила «ИрхIинзи» бикIуси жузла сигнальный экземплярра цугбикиб.
Студентунани, цализи цали бедлугули, дигиличил жуз хIербариб.
— Наб ил белчIес дигахъира. Чинара ишди жузи? – хьарбаиб ца рурсили.
— Гьачамлис дурадухъи ахIен. Диур жузи хIушачира…
— «ИрхIинзи» се саби? Ил дев агъибси ахIен.
— Ил вацIала у саби. Повестьлизирти тамашала анцIбукьунира илар кадиркули сари.
— Повестьлизиб игитуни-гIяшикьуни лебтив?
Ил дакIу-гьаргси суайчи дукелцIидухъун. ГIур викIулра:
— Лебти саби. Дигай агарти гIямру, дурхIни, хIябилра мискинти дираргу…
Гъайла къантIа, ил ихтилат-гьунибаъни наб дебали гIяхIбизур. Илдигъунти гьанагарти гьунибаънибачир писательлис гьатIира пикридарести дирар, гьайгьайрагу — манпагIяттира.
ХIери гIергъи факультетлизивад кьакьализи дуравхъунхIели, разиси хIяйчив сайри. Ну тIашизурра, ласяхъили, муртрил набра багьудлумала хIебелгъуси гIинизли бетаурси факультетла юртличи хIерикIулра.
Студентла гьарахъти дусми сагали чардулхъухIеливан кабизур…
Ибрагьим Ибрагьимов
