ХIейгеси биалра, гIергъиси замана нушаб гьанагарти ва кахти анцIбукьуни кадиркули сари. Гьалабван акьути бурхIнала цализиб республикала тах шагьарлизир ва Дербентлизир чузир адамдешла кIантIалра агарти вайберхунани хIиллаби дурадеркIиб. Чузирра гIяхIцад адамтала гIямру къябдердибти ва цацабехIтала арадешлизир нукьсандешуни акIахъубти. ГIядлу-зегъа далтахъути органтала хIянчизартани халкьла паргъатдеш багьандан, чула гIямру кьурбандариб, цацабехIти дяхъи-хъаслабиубли больницабази бикиб. Наб дила макьалализиб бурес дигуси, илди анцIбукьунала бикьрили ветаурси цаличила саби.
Нуни иличил барибси ихтилат къантI-къантIли газета бучIантасра гьалабирхьулра. ГIумаров Надир ГIусманович 2000-ибил дусла июньна 13-личив МяхIячкъалализив гIядатла хъалибарглизив акIубси сай. Дудеш Руслан ГIумаров «Фигаро» бутикла къараулли, неш Зульфия ГIумарова – тах шагьарла 38 ибил дахъал шалубарси гимназиялизир мугIяллимли рузусири. БусягIятла замана хъулир сари. Надирла сунечир риштIаси рузира лер. Надир, сай шагьарлизив акIубси виалра, илала хала бегIти Сергокъалала районна УбяхI МулебкIила шилизибадти саби.
Надир виштIахIелил серхурси, секIал багьес дигуси, жигарчевси урши вири. Илини шагьарла 38 ибил гимназия хъараахъурли, халкьла хозяйствола институтлизиб белчIуди даимбариб. 2020-ибил дуслизив ВатIа гьалабси чебла ахъес гIярмияла къяянази арякьун. Надирли Забайкальский крайлизиб, Чита шагьарлизиб, Большая Тура шилизиб къуллукъбирули калун. ГIярмиялизивад чариубли гIергъи гIядлу-зегъа далтахъути органтазир (ППСП) бузерила гунзри дехIдихьиб. Ил полклизив хIябъибил ротала мобильный взводла сержант сайри, полицияла водительли узусири. Ит бархIи хIу чинав сайри ибси суайс Надирли ишдигъунти жавабти гиб.
— Ит бархIи нуша Буйнакъскийла уличилси кьакьализи кумекличи жидарира. Набчил кIел гьатIи хIянчизар лебри. Амма нушани гьарли-марли илаб се бетаурли жидарибтирил балули ахIенри. Нушази рациялизибад ВАЗ-2114 ибси автомобиль тIашаахъес хъарбариб.
Хапли ил автомобиль нушала ургабад шалгIеббухъун. Ну, машина ласбарили, илис гIергъиикира. Илди биалли нушачи тапанчабазибад иртес бехIбихьиб. Дила ца вархкья левси мерличив таманкайуб, итилра вяхъиб.
— Илдазир ярагъра леррив?
— ГIе. Илди гIяхIцадла ярагълабиублири.
— ХIушаб кумек мурт бакIиба?
— Илди къяйк-къуйклизиб нушала хIянчизартира чебакIиб. Нура декIли вяхъира.
— ХIед гьар секIал гьандиркулив?
— ДекIли вяхъибкъира, дила аргъала хIедуун, ил багьандан лерил секIал гьандиркули сари. Илавад ну центральная больницализи ваахъира.
— Илцадра декIли вяхъирив?
— Ну някълизивад, канилизивад ва хъяб кьяшлизивад вяхъира.
— ХIу кумекличи живарибхIели, хIела бекIлизи сегъунти пикруми дакIиба?
— Ну хъарбаркь таманбарес пикриикIулри.
— Больницализиб секьяйдали къуллукъбариба, тухтуртачи разилирив?
— Наб гьала-гьала шагьарла больницализир операцияби дарибтири. КIинайс Москвализи шурватурсири. Дигалли Дагъистайзир, дигалли Москвализир наб устадешчебти, чула санигIят ункъли балути, пергер тухтурти къаршибикиб.
— ХIед чинабалра тухтурлис магарич бедес чебуркъубу?
— Юх. Наб ишабра Москвализибра матъал сабри кумек гIеббаахъибси.
— ХIед полицейскийла санигIят чеббикIахъес чили гIеббуриба?
— Наб дила хала дудешла дякькад укьес дигусири.
— Сегъуна санигIятличив узусири хIела хала дудеш?
— Дила хала дудеш ГIумаров ГIяхIмад ГIумарович гIяхIцад дусмазив экономикала шайчирти такьсирти гьаргдируси отделлизив узусири.
— Надир, ил санигIят чеббикIниличи хIу гьачамалра пашманхIейубрив?
— ХIейубра. Нуни балулри, ну чина ва се барес аркьулрал.
— ХIед гьаннала гIергъира гьарбизунира, къаркъагъуна арадешра дулгулра.
Халкьла паргъатдеш балтахъути Надиргъунти гIяхIгъубзни лебалли, ванзаличиб даршудешра бирар. Илала гъабзадешла баркьуди пачалихълира пикрила дураб хIебатур. Вайнукьабачил дяхI-дяхIли къаршиикили, игитдеш дакIударни багьандан, Россияла Президент Владимир Путинна ХIукму хIясибли, гьалабван Гьалмагъдешла Юртлизиб ДР-ла БекI Сергей Меликовли Надир ГIумаров Гъабзадешла орденничил ва «Дагъиста хIурмат ва асилдеш багьандан» медальличил шабагъатлавариб.
БусягIятла замана Надир, арадеш къулайбирахъули, хъулив сай. Илала пикри саби сунела гьаннала бузерила мерличивад ГАИ-лизи шурухъес.
Гьардизаб хIела пикрумира кьасанира, Надир!
Раисат МуртузагIялиева
