Сентябрьла 1 мугIяллимтас, дурхIнас ва илдала бегI­тас декIарси байрам саби. Ил багьудлумала БархIи саби. БегIла гьалаб школала унабурхI ихъути биштIати дурхIнас багьудлумала БархIи, дебали мягI­ничебси анцIбукьли бетарули саби, сенахIенну школа дурхIнала анхъ ахIенну, илдала гIямрулизиб гьарли-марси ганзухъ саби. Илди гIяхIцад дусмазиб бу­чIули, багьудлумала дунъялизи гIелабиркур. Илдала гIям­рулизир дахъал дарсдешунира кадиркур: сагати им­канти, гьалмагъуни, пикруми-хIялани. БехIбихьудла клас­сунала дурхIни разили чула юлдашуначил гьунибиур, ка­никултачир дакьибти-чедаибтачила лякьир бумжахъу. Че­дирти классунала дурхI­ни, школа таманбарили гIергъи, чи­дил вузлизи ка­дурхутира или пикрумази гIелабикили би­рар.

Багьудлумала БархIи белчIудила дус бехIбихьниличил ва дурхIни дуцIрумла каникултачибад багьудлумала уч­реж­де­ниебази чарбухъниличил бархбасунси байрам саби. Илини нушала гIямрулизиб багьуди дебали мягI­ни­чебси биъни балахъули саби. Илкьяйдали ил байрамли мугIяллимла санигIятла кьадриличилара чули бучIахъути дурхIнала гьалар жавабкардеш дихниличилара иргъахъу. МугIяллимти агарти биаллири, нушази чили багьудлумала гье делгIутири? Илдани сари дурхIназир дигIянати пагьмурти гьаргдирути, илди ахъанайтачи абацIахъес кумек­бируси. Гьайгьайрагу, байрамли нуша мугIяллимтала хIур­матбирахъес бурсидирулра ва багьудлумачи гъирачердирулра.

Буралли, багьудлумани сай адам гьалавяхI вашахъуси, гIямруличи пикруми-хIерани алкIахъути, культураличи вир­­кахъуси. Сентябрьла 1-ибил бархIили багьуди нушала гIям­ру­ли­зиб сархибдешунала умхьу биъни гьа­чам-гьатIи иргъахъули саби.

Республикала районтала ва шагьуртала школаба­зиб кьяйдали Сергокъалала районнизир ва илала шима­зир багьудлумала БархIи шадлихъла линейкаби дур­адер­кIиб. ХIербикIутала уркIби разидиэсли жагали бегI­биубти ва вавнала халубачилти, атхIебла чатIниван вичIир­ка­бикIути, цаибти классунази аркьути уршби-рурсбани школабала азбурти хIекьли жагадарилри.  Школабала директортани дурхIни ва илдала бегIти белчIудила сагаси дусличил мубаракбариб. Илдас  белчIудилизир сархибдешуни ва бекIла чедиб умуси зак далгун.  БиштIати дурхIнани школалис хасдарибти назмурти саркъахъили делчIун.

Цаибти зянкъличил бехIбихьиб белчIудила дус. Школализив учIути дусми бегIлара гIяхIти, сегъуналра пикри агарти, дурхIядешла дусми сари. Амма бахъалгъунти дурхIни жявли халабаэс, школа чучибад хъярхъли чеббикахъес гьалакли бирар. Илдани иргъули ахIен кьалли, саби халатала гIямрулизи бухIнабухъалли, гьар секIайзир чули жавабкардеш дихес гIягIнили биъниличила.

Багьудлумала БархIи багьудлуми чедирцIахънилис ва гIямрулизиб вегIла мер бургахънилис гьаликIли бетааб!

ПатIимат Мирзаева