Къиянси замана биалра, Лавашала районна духIнарти гьундури сагадирнила ва сагати гьундури дирнила хIянчи камдирули ахIенну, гьатIира жигарчердиубли сари. Ил шайчиб халаси хIянчи бирули саби шимала администрациябани ва халкьли.
ХIера, гьалабван ГIяялахъябла шилизир «Мерличирти сиптаби» бикIуси программала дазурбазиб, шилизибад аркьуси бекIлибиубси кьакьа къирли буциб. Ил программала хIясибли чула шилизирти хIянчи детерхахъес халаси хIяракат барибсири шила администрацияла бекI ХIямид МяхIяммадович Мажидовли. Ца километр гьунила къирли буциб.
БекIлибиубси кьакьализир хIянчи дурадуркIули чедаибхIели, ил шилизибадти бизнесменти узби МяхIяммадгIяли ва Шамил БяхIяндовхъалани шила дайлабад хIябрачибяхI аркьуси Халимбек МяхIяммадовла уличилси кьакьа чула харжаначил къирли буциб. АрагIебли 3000м2 гьунила сагабариб.
ГIяхIцад адамтани кумекбариб. Зурила уди аркьуси гьуни тамай къирли буцес лябкьуси дуслизир харжани кадихьес пикрибарили саби.
Шила жамигIятли халаси баркалла балахъули саби ХIябибуллагьла дурхIни МяхIяммадгIялис ва Шамиллис, илкьяйдали чула шила администрацияла бекI ХIямид Мажидовлис.
Руслан Ражабов
