ХIясайни ГIяппаев нушала унраличибси Гьунахъарила шилизив акIубси сай. Шилизир бехIбихьудла школала авал класс таманаибси ил Кьялкнила гехIел дусла школализи учIес вашусири. 1973-1977-ибти дусмазив ну илав урус мезла ва литературала учительли узусири. Ил багьандан сай ХIясайни наб сунела учитель викIусира.
«Набзир литератураличи бегI гьалар диги акIахъубси, дила бегIла дигуси учитель, дила дагьрилашалси гьавкья…». ХIера, ишди дугьбачил вехIихьили, лукIули сай илини багъишла наб пешкешбарибси сунела цаибил жузлизи. Илдигъунти багъишлаби лер ишдус дурадухъунти авторла кIел гьатIи жузлизирра.
Ил гьарра шайчивад наб гIевваили сай. Ну тяхIярли Дагъиста урибси учительра сай, Россияла журналистунала Союзла членра, Россияла гIяхIтигъунти учительтала конкурсличиб илини нуниван Президентла Грантра касили сай. Нуван хIябал жузла авторра сай.
Ил ахIену адамла игъбар: вегIли бучIахъули калунти вегIлис гIеббаъни? Сунени бурни хIясибли, ХIясайни нуни чебаахъибси гьунчивад вашули уили сай. ХIебиалли ну гIяхIси учительра талихIчевси адамра уилра. Ил багьанданра баркалла хIед, ХIясайни.
ХIясайни ГIяппаевла «БихIена нешла уркIи» бикIуси жузличила сунела пикри белкIи леб РФ-ла журналистунала Союзла член, «Замана» газетала хIянчизар ПатIимат Кьурбановани. Илини ХIясайни ГIяппаев сунечи мургьи-арцла някьиш делкIунси шанда ханжайчил цугурцули сари.
Жузлизиб гьалагъайван Дагъиста халкьла поэт Аминат ГIябдулманаповала «ХIясайни ГIяппаевла поэзиялизиб нешла сипат» бикIуси макьалара леб. Илар Аминат ГIябдулманаповани ХIясайнила жузличила сунела пикруми дурули сари. «Рирхулра ХIясайни ГIяппаевла сагаси жузли даргала ва Дагъиста ишхIелла литературализиб лайикьси мер бурцниличи», — рикIули сари Аминат ГIябдулманапова.
Сунела хIябэсил жузлис ХIясайни ГIяппаевли «Далуйтала жуз» бикIуси у бихьили сай. Илизирра поэтли нешлис багъишладарибти дахъал назмурти лер. Илдала дурарад – дигайличила назмуртира. Гьайгьайрагу, ила кадерхурти назмурти далуйтиванра дучIес вирар. Ил биштIаси жузличилара кIелра нушала поэтунани (А.ГIябдулманапова ва П.Кьурбанова) чула пикри бурули саби.
ХIясайни ГIяппаевли бегI гьалаб наб пешкешбарибси жузлис «Сен ахIенара Африка ишаб?» бикIуси саби. Ил сунела куцличилра гьар назмула бухIнабуцличилра биштIати бучIантас гIяхIбизеси жуз саби. Саби белчIес хIяздулхъахъуси у саби ил жузла. «Чи саяра ил Африка ишаб биубли дигуси адам?» — жуз някълизи касибмадан алкIули саби бекIлизиб пикри.
Нуша лебталалра лебти саби илдигъунти уршбала ва рурсбала дурхIни. Заманалис хIечил барх хIербирути. Гьар секIал багьес дигути. ХIед анцIхIебулкьахъути ва цацахIели хIед диргаларабулхъути. ХIу телевизорличи хIерикIахъес хIелтути. Биалра, хIед бегIлара дигути биштIати дурхIни – хIела дурхIнала уршби ва рурсби.
Илди гьар секIал дагьес дигути саби. Нушала ХIясайнила жузлизив илцадра дахъал секIал дагьес дигуси виштIаси адам ХIясайнила рурсила урши Рабазан сай.
Жузла цаибси бутIалис авторли «Илди дургар суалти лебилра никIабала!» бикIуси у бедили сай. Ила каберхурси ца назмулизив хала дудешличи ва дудешличи Рабазан ишди суалтачил дугьавилзули сай: «Сен Африка Аллагьли нушаб бархIебарибси?», «Носорог ва бегемот сен чедаэс хIейруси?», «Пилани ва зебраби – илди чинар дирути?», «Нушачиб урхьу лебли, океанти агартив?», «Пальмаби, кокосуни, маймунти ва питонти – илди чинар дирути?» (ГIуррара дахъал илдигъунти суалти лер ХIясайнила жузлизирти цархIилти назмуртазирра).
«ХалаваибхIели, Африкализи укьесра вируд ва илди лерилра мицIираг чедиид», — викIули сай илизи вамсурси хала дудеш. Уршила халаваайчи сабур биули ахIен. ИлхIели сай ил «Сен Африка Аллагьли нушабра хIебарибси?» викIуси.
Гьар секIал дагьес дигуси уршили тамашала секIайзи халбирули саби вулкан.
-Дудеш, — викIар Рабазан, —
Дубур халаси вара
Яра халасив вулкан?…
— Чидил илдазибадли
Ахъри-цIакьла халаси?
Халаси иштяхIличил бучIулра нуни «Дудеш, ури кайсехIе, нешлис пешкешбирехIе» бикIуси назму. Гьари, иларадти ца-чумал къяй хIушабра гьаладирхьис:
-Дудеш, ури кайсехIе,
Нешлис пенкешбирехIе.
-ВирхIейрар кьалли, урши:
Саб ил дебали ахъси.
— Хъалчличи адицIехIе,
Ила ганзи биршехIе!
Илавад ахIейалли,
Дубурличи айцIехIе…
-Дубурличи диршехIе
Лебталалра ганзурби.
ИлхIелилра хIейрусив
Ахъиэс зубартачи?
ГIур Рабазан хьарикIули сай, гъагултачивадра зубартачи ваэс хIейрусив викIули. «Итдуги чебаибси дирихьри къадалабси. Гьарли – марли гъагулти гIурра гIяхIцад сар ахъли», — чарбирули сай дудешли жаваб.
Нешлис ури пешкешбарес хIейрули, шишимтази викибси Рабазайзи дудеш гIурра викIули сай:
-Гьарил инсан дунъяла
Мешуси сай урмачи.
Ури ветаэс хIура
Вирусири, дигадли.
Неш хIулкIули хIеррара,
ГIяхIси урши ветаи,
ГIямулти гьарахъдара,
Мурталра вирен вархьли.
ИлхIели хIела нешлис
Ветаруд хIу зубари.
Мурталра ил пахрули
Рирар хIечи рицIили.
Телевизорлизиб Рабазай «Могикантазивад бегIла гIергъиси» бикIуси кино чебиули сай. ИлхIелира дахъал суалти алкIули сари илала биштIаси бекIлизир. Илди лертасалра дудешли жаваб баргес гIягIниси саби.
«Рабазайс гьар мурталра
Дигахъу мультикуни.
Илдала игитуни
Саб илис гIибратуни», — викIули сай поэт цархIил назмулизив. ИмцIадикIули сари дудешлизи суалти ва хъарбаркьуни. Назмула ахирлизив Рабазан халаси, дебали духуси адам тяхIярли пикривикIули сай:
— СейкIулри гъари, дудеш,
Вайбаркь, гьими, гIясидеш
ТанбихIлахIедарасли,
Леву танбихIбареси?
Жузлизирти назмуртазир дахъал гIурра лер Рабаза суалти. Хала дудешли (жузла авторли) илдас вируси тяхIярли жавабти дедлугули сай. Сунела гъамси юлдашличилван гъайикIули сай ил Рабазайчил.
КIел гьатIи бутIаличи дутIили сари поэтли жузлизи кадерхурти назмурти. Наб лерилра илдачила гъайикIес дигахъаси. Ил барасли, ХIясайнила ил жузлизи кадерхурти назмуртачила дила пикруми делкIунси сагаси жуз дураэс гIягIнибиркур. Дила илдигъунти имканти агара.
Ахирличибра нуни чебетаахъили бурулра: дебали жагали балкьаахъурси жуз саби «Сен ахIенара Африка ишаб?». Мурт-биалра илинира даргала литературализиб сунечи лайикьси мер бурцу.
ХIяжимурад Ражабов
