Лавашала Чедибдешла анхълизиб ЧебяхIси ВатIа дергъла дусмазив алхунси ургъан ШяхIбан МуртазагIялиевла лига-кьякья хIяридирхьнилис хасбарибси балбуц бетерхур.
Илаб лебри Лавашала районна бекI Мухтар ХалалмяхIяммадов, районна бекIла заместительти, районна депутатунала собраниела председатель Юсуп ГIялибеков, ДР-ла жагьилтала къуллукъунала шайчивси министр Камил СягIидов, Крымлизивси ва Севастопольлизивси Дагъиста вакил Мурат СалихIов, ДР-ла умцIлаби дурадуркIуси хIяракатлис бекIдеш дируси ХIяйбуллагь ГIумаров ва цархIилтира.
Лавашала шилизивадси, 1912 ибил дуслизив акIубси ургъан ШяхIбан МуртазагIялиев 1942 ибил дусла майличив, Крымла мер-мусаличир кадикибти дургъбазив къел-хIерзи агарли веткахибсири.
2024 ибил дусла июньничир «Гьанбикунала вахта» бикIуси дявила-патриотизмала балбуц дурабуркIуси замана Севастопольла мякьлар илала лига-кьякья даргибтири. Илдачи гъамли лерри илала сай-вегIти ваяхIра: кисализиб бихуси, биштIаси дис, ХIунтIена гIярмияла (красноармейская) зубари. Амма баргибси бекIлибиубси секIай бетаур хасси бланкличилси медальон. Иличир ургъанни сунела у, фамилия ва хьуна адрес делкIири. Илди белкIанала кумекличил ил виъни кабизахъесра имканбакIиб.
Балбуцла бутIакьянчибачи дугьаилзули, районна бекI Мухтар ХалалмяхIяммадовли ЧебяхIси ВатIа дергълизиб сегъуна багьа бедили чедибдеш сархибсирил гьанбикахъиб, илкьяйдали бегIлара къиянти замунтазир халкьли дакIударибти гъабзадешличила буриб.
ШяхIба хъалибаргли гIяхIцад дусмазир умцIерила далдуцуни дурадуркIутири, амма сеналра гьарбилзули ахIенри, ва чула игит ургниличи бирхауди беткахъахъилри. Гьанна солдат ШяхIбан МуртазагIялиевли ахIерси ванзаличиб паргъатдеш бургу.
Ца минутлис лехIдеш багьахъурли гIергъи, ярагъ цагьакIли къяйкдарнила тIамалиур солдат ШяхIбан МуртазагIялиевла лига-кьякья хIяридихьиб. Дергъла игитлис даимси асилдеш!
Лавашала районна администрацияла пресс-служба
