ХI

ябал миллиард­личир­ра имцIали кагъар, посылка, лугIурби (счета) дашули сари почтала отделениебазирад. Ин­тернет гьалабяхI арбякьи хьалли, илар хIянчи камдирули ахIен.  Почтализирад газетаби-жур­налтицун ахIенну, дунъя­ла декIар-декIарти мер-муса­ли­чирад дархьибти секIал  дур­чути, декIардирути ва хIяжатти мераначи диахъути сари.

ГIергъиси замана почтали дурадуркIути хIянчи  дахъ­даили сари. Почтальонна бузери, гIядатлибиубливан,  им­цIатигъунти анцIбукьуназиб пик­ри бяхIчихIеили кавлули саби халати шагьуртазиб. Амма шимала мер-мусаличиб биалли, почтальонна мер чилилра буцес хIейрар, сенахIенну шимазиб илала хIянчи дебали кьадричебсили бетаурли саби. Илдигъунти хIянчизарти гьар шилизиб камли ахIен.

Наб дила макьалализиб бурес дигуси хьунул адамра почтализир рузуси сари. Рукьият ГIябдуллабековна Багъатирова 1960 ибил дусла ноябрьла кIиличир Дахадаевла районна ЧIишилила шилизир акIубси сари.  Илини сари акIубси ши­ла урга даражала школали­зир 10 класс тамандариб. ЧIи­шулан урши  Сулайбайчил су­нела гIямру-кьисмат цадариб. Илдала кIел урши ва кIел рурси акIуб. Илдас бегIтани  гIяхI­си бяркъ бедиб. Рурсби: Ленара Бариятра хъаллабиубли саби. Чула хъалибаргуначил Дагъиста декIар-декIарти ша­гьуртазиб хIербирули саби. Халасигъуна урши МяхIяммад военныйли  Чечнялали­зив  къуллукъбирули калун. Ил дебали серхурси,  сунела хIян­чи дига­хъуси, къияндикибсилис  кумекбарес хIядурси адам сай. Гьанна ил отставкаличивси (пенсияличивси) офицер сай. БусягIятла замана ил сунела узи ХIясайнира сайра  чула хъалибаргуначил  Дербент шагьарлизиб хIербирули саби.

Рукьият дахъал дусмазир почта буртIуси хIянчизарли ру­зули сари. Ил акIубси хъалибарг дебали халасири. Урегал рузи ва ца узи. Рузби: Хадижат, Зулайхат, Тайбат, Кьанитат, Анисат ва узи МяхIяммад. БегIлара халаси рузи Хадижатли МяхIячкъалализиб шила хозяйствола техникум таманаиб. Илала мурул ГIябдусалам даргала декIар-декIарти районтала прокуратурабазив узули калунси сай. Мурул узути мераначир сарира хIялалли рузусири. Чинаб бузули калалра, илдани барх бузутала ва хIербирутала хIурмат-хатир сархутири. Рузби Зулайхатра, Тайбатра, Кьанитатра ЧIишилила «Маяк» совхозлизиб бузутири. ХIябалра рузи Россияла декIар-декIарти шагьуртазиб чула хъалибаргуначил хIербирули саби. Узи МяхIяммадра Дербентлизив сай. БегIлара риштIаси Анисат Ставропольский крайла Степное шилизир хIеррирули сари.

Дудеш ГIябдуллабек колхоз­ла унцала букIун вирусири. Неш ПатIиматли биалли, хъа­ли­-цIа­ли­зирти хIянчи бекI­ди­ру­ти­ри.

Рукьият Багъатирова 39 дус почтализир рузули сари. Илини бурни хIясибли, ил заманала рухIнар ил декIар-декIарти къияндешуначи ряхIягиб. Поч­тала бузерила тяхIяр-кьяйда дарсдикIулри, гьаладяхI дашулри, амма сегъунтилра къияндешуначи хIерхIеили,  Рукьият сунела хIянчиличи чекаризурли рузусири. ИшбархIира ил почтализир халати жавабкардешличил рузули сари.

Р.Багъатировани бурни хIя­сибли, сунела хIян­чилизир сари сегъунти-ди­гара адамтачил къарширир­кули рирар. Ил­кьяйдали де­кIар-декIарти гIямрула анцI­букьунала бикьрилира ретарули сари.  Рукьият Багъатировани адамтас багалариэс ибси пикри бекIлибиубсилизи халбируси саби ва сунечи дугьаизурсила мурад арзес къайгъилизир рирар.  Лебтанилра балуливан, шимазибти бахъалгъунти  адамти гьести гIямрула саби. Рукьиятли буриливан, илдас бучIес дигахъу, хаслира — газетаби ва журналти. Сегъунти-биалра аги-кьяйда сабабли диубли, га­зетаби-журналти шилизи заманаличир хIехалли, илди кьакьадешлизи бикили,  итмаданал почтализи дугьабилзули бирар.

Почтальонна тавра бар­хIехълис бацIбируси саби, илар­ти газетаби, журналти ва цар­хIилти секIал чула бегIтачи даахъили. Почтальонна бузерила бархIи илкьяйдали кабурхуси саби ва гIергъиси бархIи ил савли бархбасла (связьла) отделениелизив виэс гIягIниси сай. Балуси гьуникад вашули, халкьличи сагати хабурти ва разидеш даахъес багьандан!

Рабадан БяхIяммадов