СирхIяла шими Дубуртар Улкала бегIлара жагати мер-мусаличир сари викIалра, хатIа бетхIерар. Илди шими тяп ванзаличи тIутIудиубти жавгьар духуриличи мешули чедиур Зенала ва цархIилти ахъти дубуртачивадли хIерикIалли.

Илцадра цаличи ца гъамли мерладиубти шимала адамтира ца кьамлизибадти биэс асубирар. СенахIенну, илди гьар секIайзиб лебгIеб мешути саби. ГIе, жявси заманаличибадли дунъяличиб сирхIянти балгундешличибли, гьунартачибли, гъабзадешла баркьудлумачибли, кьуватчебдешличибли,… машгьуртира саби. Дила халаси узи Рабадан МяхIячкъалализив учIухIели, бегI гьалаб аргъибсири нуни «сирхIян» ибси дев. «Къалмакъар яра жал бетаалри сирхIяла гIяхIгъубзнани ми­хъирличи някъра чебуцили, «Ну сирхIянра!» или тIамадирутири. Илкьяйдали лебтанилра балусири сирхIян виубли гIергъи я илис удивикес, я гIела витIакIес асухIебирниличила», — или бурусири дила узини. Илкьяйдали ну риш­тIа­хIейчирадли сирхIяла гIяхIгъубзначи пахрули рицIибсира.

Дигеси саби, замана-заманаличир сирхIян­тани спортла, шадлихъла яра цархIилти далдуцуни дурадуркIнира. Илгъуна баркьудили чебиахъули саби сирхIянти Дахадаевла ва Ахъушала районтази кабурхули биалра, саби-ургаб уржили хIербирниличила.

Ишди бурхIназибра республикала физкультурала ва спортла Министерстволи Дахадаевла ва Ахъушала районтала, МяхIячкъала шагьарла администрациябани гIеббуцили, «Цадеш» бикIуси организацияли Каспийск шагьарлизиб культурала-спортла цаибси халаси фестиваль дураберкIиб. Ила 1000-личибра имцIали адам цалабикиб. Фестиваль дураберкIнила мурад сабри нушала бегIтала ва хала бегIтала манзиллизибван улкала декIар-декIарти мераначиб хIербирути сирхIянти цабиахъни. Нушани тарихла бетуцуназиб сирхIянти-ургаб гьачамличиб-гьачам чIумабикIуси культурала ва гIядатунала бетуц ишхIелла манзиллизиб вавалибяхъяхъили, чеалкIуси наслуличи баахъес хIяжатси саби.

Нушала дурхIнира цабехIличил цабехI уржили хIербиэс хIяжатси саби. Иличирли нешла мез, культура ва гIядатуни мяхIкамдаресра чараагарси саби. Арбякьунси, ишхIелла ва челябкьлала манзилла вакилти цабиахъес, лебилра сирхIянтала узидешла бархбасуни къяб­хIе­дердахъес багьандан, акIахъубси саби «Цадеш» ибси организацияра.

Балбуцлизир хIурматла бахъал гIяхIлани бутIакьяндеш дариб. Илдани спортсменти илгъуна мягIничебси балбуцличил бархбасахъи, мубаракбариб ва чедибдешуни диубли дигниличила багьахъур. Илдигъунтазибадтири республикала физкультурала ва спортла министр Сажидов Сажид ХалилряхIманович, МяхIячкъала шагьарла депутатунала собраниела председательла цаибил заместитель ГIялиев Хиби Кьурбанович, Ахъушала районна бекI ГIябдулкаримов МяхIяч Кьадиевич, Дахадаевла районна бекI ГIябдулкьадиров МяхIяммад Абубакарович, сирхIяла халкьла шайчивадси вакил МяхIяммадов Рабадан ХIяжиевич.

Балбуц ибхьухIели гъайухъунси Дахадаевла районна бекI МяхIяммад ГIябдулкьадировли бахъла бутIакьяндешличил дурадуркIути абзанала мягIничебдешличила буриб. «Даргала жамигIят цабирахънилизибра илдигъунти далдуцунала кумек халаси саби. — МяхIяммад Абубакаровичли жагьилти илдигъунти абзаназир бутIакьяндеш дирахъес жибариб. — ИлхIели чеалкIуси наслула вакилти аратили, цабалгунтили бетарар ва илдани жамигIят гьалабяхI башнилизи белгиси пай кабирхьу», — викIулри ил.

Балбуцличир армрестлингла, волейболла, къар­къа иргьнила, гьарахъдешличи тIяхI­булхъ­ни­ла, гьая зузбирнила, гиря иргьнила абзани ду­ра­дер­кIиб. Гьайгьай, илди абзани ибкьли детерхур. Армрестлингла абзаназив УргIерила шилизивадси Низами Рабаданов чедиикиб, хIябэсил мер би­киб дугIахъаривадси ГIялихIяжи Кьурбановлис. Во­лейболла командабазибад цаибил мерличи лай­икьбикиб Гъуладтила шилизибадси команда. Гьая зузбирнилизиб хIябъибил мер буциб дугIа­хъарлантани.

СирхIяла шимазирадти командаби-ургаб цаибили мер сархиб «Кьассагу» командали.

Гьаларти мерани сархибти лебилра спортсментас грамотаби, медальти ва арцла шабагъатуни дедиб.

Фестиваль спортла абзаначиблицун ахIенри мягIничебсили бетаурси, ил культурала ва гьалмагъдешла къугъаси шадлихъличира шурбухъири. Цалабикибтас гIяхIдизур республикала машгьурти эстрадала гIяртистунани делчIунти далуйти.

Гьарли-марли сирхIянтани дураберкIибси ил пергер балбуц гьаннала гIергъира дурадеркIес хIяжатти декIар-декIарти спортла, культурала, пагьмула ва цархIилти бетуцунала бехIбихьуд биъниличи вирхес вирар. ИлхIели жагьилтала кьуватчебдешцунра ахIи, пагьмучебти адамтала устадешра белгидарес имканбикIур.

Тамара ГIябдусалимова