Ишдусла дуцIрумлизиб нушала факультетлизиб «Литературное редактирование и перевод» бикIуси практика бехIбихьиб. Ил дарган мезли дурабулхъуси республикала «Замана» газетала редакциялизиб дураберкIибсири.
Практика бехIбихьибси бархIи нуша редакциялизи дякьунра. Газетала хIянчизарти нушаб разили гьунибаиб. Практикала жавабкардеш дихуси ПатIимат Сулайбановани конференц-заллизи дукира. Практикала бекIлибиубси мурад – дарган мез далнила даража ункъбарни, гъайла устадеш ахъдарни ва гьаладяхI ардукни сабри. Нушазивад гьарилли практика таманбиайчи газетализи макьалаби делкIес ва кадяхъес, урус мезличирад текстани шурдатес ва белкIаназир хатIаби даргес хIяжатлири. Иличирли нуша дарган мезличил белкIунси текстличил дузес бурсидиубра, нешла мезличил макьалаби, назмурти лукIес, художестволашалти произведениеби дучIес иштяхI акIуб. Дила пикрили, ишбархIила аги-кьяйдализир нешла мез руркъес ва гьаладяхI дашахъес багьандан бекIлибиубси саби ил.
Газетала хIянчизартачил тянишдиубли гIергъи, илдани нушаб макьалаби делкIахъес декIар-декIарти темаби гьаладихьиб. Бархьли буралли, газетала хIянчизарти-ургав ХIяжимурад Ражабов къаршиикниличи ну дебали разивиубра. Нуни ил авал жузла автор сайливан валусири. «Коньяк в сапоге», «Абик» -урус мезличил, «ГIурра хабардерхаб хIечила», «Абик» — дарган мезличил дурадухъунти сари. Дила бусягIят пагьмучевси публицист ва журналист ХIяжимурад ГIяммаевич Ражабовличила макьала белкIес ибси пикри акIуб. Дила ва набчил варх левси юлдаш МяхIяммадшапила практикалашалси бузери ХIяжимурад ГIяммаевичли къелгIеббикулри.
ХIяжимурад ГIяммаевич Ражабов акIубси сай 1947 ибил дуслизив Дахадаевла районна Дибгашила шилизив. Илала дудеш, ЧебяхIси ВатIа дергъла бутIакьянчи ГIяммала Ражаб, дергълизивад чарухъунхIели, Дибгашила Кировла уличилси колхозла хала букIунни узусири.
ХI.ГI.Ражабов верхIел дусла школа таманаили гIергъи, Сергокъалала педучилищелизи керхур ва гIяхIти кьиматуначил ил хъараахъур. Сунела шилизи чарухъунхIели, илини кIел дус арифметикала дурсрала учительла санигIят бузахъи.
1966 ибил дуслизив ДГУ-ла дурала улкнала мезанала факультетлизи керхур. Илав кIел дус учIули калун, гIур гIярмиялизи ВатIайс къуллукъбарес арякьун. ГIярмия ахъили чарухъунмад, белчIуди даимбариб ва филологияла факультетла бархIехъла отделениелизи шурухъун. 1973 ибил дусличивад 2013 ибил дусличи бикайчи ХIяжимурад ГIяммаевич школализив урус мезла ва литературала дурсри кадирхьули учительли узиб.
Учительла санигIят бузахъуси манзиллизив ил Бузерила Асилдешла 3-ибил даражала орденничил шабагъатлавариб. Ил «Дагъистан Республикала урибси учительла» хIурматла уличи лайикьикиб. «РФ-ла чеббикIибти мугIяллимтала» конкурсличив чедиикни багьандан илис ДР-ла ва РФ-ла багьудила Министерствобала ХIурматла Грамотаби дедиб. 2009-ибил дуслизиб илини Президентла Грант сархиб.
Пенсияличи дураухъайчи, ил дахъал дусмазив Дибгашила урга даражала школализив мугIяллимли узусири, гIур директорла къуллукъ бузахъи. ХIяжимурад ГIяммаевич сунени бучIахъули калунти дурхIнала ва шила шантала халаси хIурмат сархибси адам ва педагог сай. Илизиб лукIнила творчестволашалси пагьму лебнира тамаша ахIен, сенахIенну лерилра гIямру илини чеалкIуси наслу багьудлумачил бегIбирнилис ва илдас бяркъ бедлугнилис харждарибти сари. ГIямрула хIял-хIякьикьат дяркъурси адамла халкьлизи дурестира камли хIедирар…
2016 ибил дусличивад ХIяжимурад ГIяммаевич «Замана» газетала корреспондентли узули сай. Ил урус ва даргала мезличил лукIуси дахъал белкIанала автор сай. Илала макьалаби делчIес вирар «Замана», «Дагъиста гIямру», «Дагестанская правда», «Литературная Россия» газетабазир ва «Народы Дагестана», «Кавказский экспресс» журналтазир. ХIяжимурад Ражабов РФ-ла журналистунала ва писательтала Союзла член сай.
Наб нушала цаибил гьунибаъни гьанбикиб. Ил бетерхурсири нушала факультетлизиб. Нушала преподаватель М.БяхIяммадовли гьала-гьала илала «Абик» уличилти жузи дутIибтири, гIур ХI.Ражабовличил студентунала гьунибаъни дураберкIибсири. ИлхIели илини нушази сунела гIямрулизир кадикибти дахъал хабурти дурибтири. Наб итхIели преподавательли бурибси гIяхIил гьанбиркур: «Сергокъалала педучилище белчIи гIергъи, ХIяжимурад Ражабов сунела шилизи чарухъун ва илав кIел дус учительли узули калун».
Чедиб гьанбушибси студентуначилси гьунибаъниличила макьала белкIунсири дила юлдаш МяхIяммадшапини.
Ца бархIи практикала суал хIясибли, иличи нуша гьардакIира. ХIяжимурад ГIяммаевич нушаб разили гьуниваиб ва сунела кабинетлизи жидарира. ИлхIели нушази илини дахъал багаладиэсти насихIятуни дуриб. Нушала практика жявли ахирличи бикиб. Нушала белчIудилизир, гIямрулизир илини гIердурибти пасихIти насихIятуни нушаб багаладирнила шайчир ташмишдеш агара. «Замана» газетала редакциялизирра ХIяжимурад ГIяммаевичличил нуша къаршидикниличи пахрубирулра ва илис халаси баркаллара балахъулра…
МяхIяммадрасул НурмяхIяммадов
