Ишдус цугли 25 дус дикили сари Да­гъистайзи Ба­саев­ла ва Хаттабла бекI­деш­лиур ярагъ­ладиуб­ти кьукьни духI­на­дер­хур­­хIей­чи­рад.

Дунъяличир зулмула бар­кьуд­луми ва анар-ханар тIинт­I­­­дирути жалладунас Да­гъис­тайзибра халаси дергъ аби­кьес дигули ахъибтири. Къа­­чагъунани ЦIумадала ва БотI­лихла районтазибси да­зу сегъуналра гьалабиз ва къар­­­шидеш агарли ахъибси­ри. Гьала-гьала ­къачагъунала кьас сабри АнсалтIа, ­Ра­ха­тIа, Тондо ва цархIилти кIа­­­рахъала шими дуцили, Да­гъиста мер-мусализи гьа­тIи­ра мурхьбикес. Амма да­гъис­­танлантани Россияла бур­­гъантачил барх чула Ва­тIан уббедес алавбухъунти вер­­­шабала уряхIти кьасани дарт­­­хIеахъур. Къачагъунала зул­­­муртала лерил мурадуни бу­­ся­гIятал пирхикIлизирад да­рибти хъулри кьяйдали, цIа­ли дигубтири. Дурала улкнала дигIянали дузути хас­ти кабизунани гIеббурцуси дунъяла терроризмали Дагъистайзирра сунела хIячми тIинтIдирули хIилхIи калунтири. Къачагъунала цIябти хьу­лани дартаалри, Дагъиста халкьличи се хIерли бирибал пик­рибаресра кахбилзули са­би… Шукру Аллагьлизи, да­гъис­танланти кахси балагьлизи­бад берциб.

Къачагъунала ярагъ­ладиубти кьукьни Дагъистайзи духIна­дер­хур­хIей­­чирад 25 дус дикнила дазурбазир, 1999 ибил дус­лизир кадикибти кахти анцI­бу­кьунала бикьрили ветаурси адамличил нуша гьунидаира. Ил сай ДР-да Дявила комиссариатла жагьилти гIяр­мия­лизи хIядурбирнила ва жибирнила шайчибси отделла начальникла заместитель Явнус Рабазанович Жамбалаев. Ишди бурхI­назиб, «Дагъистан» Этномедиахолдингла республикала «Замана» газетала сипталичил, Явнус Рабазанович миллатла газетабала журналистуначил гьуниваиб ва илдала суалтас жавабти дедиб.

ВатIайс хIяжатбикибхIели, душ­майс бяхъ чегахъес гьалабизурти гIяхIгъубзназивад сай иш белкI­ла игит Явнус Жамбалаевра.

Я.Жамбалаевли журналистунази 1999 ибил дусла августла 7-личир ярагъладиубти къачагъунала кьукьни законагаршайчир Дагъистайзи духIнадерхес гьа­лар, респуб­ликализир кадикибти анцI­бу­кьуначила, миллатлашалти хIя­­ра­катунала, вагьабизмала хIерани тIинтI­дир­нила зарултачила, Къадарла мер-муса азаддатниличила, Новолакла район «умубарниличила», Чечентала кIиибил компанияличила, Хасавюртла капитуляция­личила (мутIигI­ба­кIахъ­ни­ли­чила) ва цар­хIилти масъултачила гьанбушиб.

Дагъистайзи ярагъладиубти кьукьни духIнадерхнилис се сабабли бетаурсирил гьаргбирули, Я.Р.Жамбалаев викIи: «Лебтанилра балуливан, 1998 ибил дуслизиб Дагъиста пачалихъла Совет къачагъунани буцибсири, оперативный искусствола дарсличиб ну учIуси академиялизир нушани Дагъистайзир кадиркути анцIбукьуни руркъули калунтири: сен кадиркутил илдигъунти анцIбукьуни, сен итхIели миллатла хIяракатуни алкIахъутирил ва цархIилти масъулти. Илдигъунти аги-кьяйда сабабли детауртири Дагъистайзир дявилати анцIбукьуни кадиркнилис. 90 ибти дусми нуни къачагъунала дусмази халдирулра. 91 ибил дуслизиб Советский Союз бехъубсири, гIур илис гIергъи чечентала цаибил кампания бехIбихьибсири, гIур Хасавюртлизиб кабикибси убяхIси мутIигIбакIни (капитуляция).  Советский Союз бехъубли гIергъи, лерил илди анцIбукьуни Дагъистайчира къячдикиб, илхIелира — дебали убяхIси даражаличир. Халкьла някъбазир ярагъ да­кIу­диубтири, сарира хIисаблизи ка­хIесибти, дигIунти. Илди, нушала улка бе­хъубхIели, дявила гIяскуртала складуназирад дикахъибти ярагъ сарри. Лебил республикабазир тIинтIдиубтири къачагъдеш, адамти кабуршни, хъулкидеш. Ну мурталра пикривикIули вираси, сен кадикибтирил Дагъистайзир итди кахти анцIбукьуни, 98 ибил дуслизиб сен пачалихъла Советла Юртлизи къачагъуни бухIнаберхуртирил. ИлхIелира ярагъличил сегъуналра бархбас ­агарти адамтани, някълизи ярагъ касили, па­чалихъла Юрт буцес сен гьирбиубтил аргъес хIейрулри. Лерил илди анцI­букьуни Дагъистайчи къячдикибтири. Сен илкьяйдали бетаурсил бурес къиянни саби. Дагъистайзир дявила анцI­букьуни кадикнилизиб бегI гьалаб хIу­куматла вакилти гIяйиблабарес вирар. Илдала хатIабачирли детауртири илди анцIбукьуни. Илкьяйдали нуни гIядлу-зегъа далтахъути органталара хатIаби чедиулра, чулира къачагъунала организацияби гIердурцули калунти. ХIукуматла ва халкьла тамяхIкардешла сабабра чебиули саби ил шайчиб. ИтхIели Дагъистайзир гьар миллатла хъархIерагарти хIяракатуни алкIес дехI­ди­хьибтири».

Явнус Рабазановичли бурили кьяйда, къачагъуни Дагъистайзибад дугIиъ­нила шайчибси дявиласи балбуц 1999 ибил дусла августла 11-личиб бехIбихьибсири. Илала бекIлибиубси лишанни бетаурсири федеральный центрличил барх Россияла Ярагъладиубти ЦIакьаницун ахIенрину, саби гIяхIъулали бургъантала кьукьнира дурадухъни. Бурес чебиркур, Явнус Рабазановичли саби гIяхIъулали дурабухъунти бургъантала отрядунас бекIдеш дирутири ва дявилашалти бурсидешуни касахъес хIядурбирутири. Къачагъуначи къаршили артиллерия ва авиация пайдаладирутири. ДР-ла Госсоветла хIукму хIясибли, чули саби балтахъантала (самооборонала) отрядуни акIахъубтири, чучира белгити хъарбаркьуни ва мурадуни чедихьибти.

Я.Р.Жамбалаевла гъай хIясибли, Россияла бургъантала цIакьанала кумекличил ярагъладиубти къачагъунала кьукьни дарбадягъиндарес имканбакIибсири. Илдазибад байхъала унраличибси Чечнялизи гьаббухъунтири. Августла 25-личир Россияла ВВС-ли Грозныйла мякьларти шимачи бомбаби чекьуртири. Разведкала баянти хIясибли, илар Хаттабла ва Басаевла дявила базаби мерладиубли дуилри. Августла 28-личир биалли, Россияла гIяскуртани Къадарла мер-мусаличибси чула арилиуб акIахъубси бусурмантала пачалихъла бутIа (анклав) (Кьарамахьи, Чабанмахьи, Къадар) буцибсири.

«1999 ибил дусла сентябрьла 5-личиб Басаевла ва Хаттабла отрядуни сагадан Дагъиста Новолакла районнизи духIнадерхуртири. ЦIакьси дяви бухъянбитIунсири сентябрьла 14-личи бикайчи. Россияла ВВС-ла бургъанти Ножай-Юртовский районнизи дявилати далдуцуни дурадеркIес или чуйнара арцур. Илаб Дагъистайзи духIнадерхес дяхIдиубти къачагъунала кьукьначи бомбаби чекьес ва илди агардарес имканбакIибсири. Сентябрьла 15-личиб Дагъиста ванза тамай къачагъуназибад акьубатурсири», — буриб Я.Р.Жамбалаевли.

Сентябрьла 30-йчиб Чечентала Республикализиб дявиласи балбуц (КТО) дураберкIес кьасбарибсири, илабти террористуни агарбарес багьандан. Дагъистайзиб дявиласи кампания дурабуркIухIели, 275 Россияла солдат ва офицер алхунтири, 720-личибра имцIали – дяхъихъаслабиубтири. Къачагъунала 2500-цад адам камбиубтири.

«Дила пикрили, интребригадабани ва халкьли дявилати анцIбукьуназир бутIакьяндеш дарнили, дебали гIяхIси асар бариб багьахънибалашалси дявиличибад чедибдеш сархнилис. ИтхIели лебил Дагъистан халкьани-ургабти къачагъуначи къаршили дурабухъниличила хабар тIинтIбиубсири. Иличибли нушала душмантира урухбиубтири. Амма иличил барх, 1999 ибил дуслизир нушала республикализи халкьани-ургарти ярагъладиубти кьукьни духIнадерхахъес сабабтира акIахъубтири.

1998 ибил дус гьанбикахъахIелли, ДР-ла Госсовет къачагъунани буцибхIели, хIисаб агарли дахъал ярагъ, сарира дявила частанала складуназирад дигIунти, халкьла някъбазир дакIудухъунтири, илдала лугIилизир черяхIти къуллукъуначибти хIякимталара. Лерилра илди анцIбукьуни хIисаблизи касили, Дагъистан буцес алавбухъунтири нушала душмантира. Илдас дигусири Дагъистан бухIнабадли бехъахъес. Вайнукьабала бекIлибиубси мурад сабри — Северный Кавказлизир, хаслира — Дагъистайзир, вагьабиюнтала пикруми-хIерани, илдала бяхIчибизуни тIинтIдарни. Иличибли Россия улка кьяйдали бехъахъес. Северный Кавказ Россиялизибад декIарбикахъес дигутала уряхIти хьулани сарри илди. Гьаннара илдигъунти кьасани тамай детахъили ахIен. Нушани балулра чинабад дягI булхъулил, США-ла кьялшуби хIедаибси улка агара дунъяличиб. 90 ибти дусмазиб Советский Союз бехъубли гIергъи, улка гьар шайчибад урехилизи бикибсири, дебали чIумаси дявила гIяр­мия тIутIукьякьябиубсири. Узити рес­публикаби дехъниличил Россияла Ярагъладиубти ЦIакьанала гIярмиялизи кабурхути лебил офицерти, бургъанти чула ватIайзи чарбухъунтири, калунси дебали камти бургъантала кьукья саб­ри. Ярагъладарибти ЦIакьанала гIяр­мия бехъубсири, ил багьандан нушала улкара цIакьагарбиубсири. Улкала душмантира, ил анцIбукьличил пайдалабиубли, арагIебли Россиялизир терроризмала хIячми удалтес, вагьабиюнтала бяхIчибизуни тIинтIдирес бехIбихьибтири. Дагъистан биалли, бекIлибиубси, гьар шайчибад стратегиялашал мягIничебси республика саби, ил багьандан ишар гъузгъалдидешла анцIбукьуни кадиркесра дехIдихьибтири».

Капитан, майор, запаслизивси полковник Я.Р.Жамбалаев Сергокъалала районна Къянасирагьила шилизив акIубси сай. Илини М.В.Фрунзела уличилси Одессала чебяхIси даражала артиллерийское командное училище белчIун, гIур биалли — Санкт-Петербурглизибси Михайловскла дявила артиллерийская академия. Ил декIар-декIарти дявилати къуллукъуначив калун — артиллерияла батареяла взводла командирличивад пулеметунала-артиллерияла дивизияла штабла начальникличи бикайчи. Явнус Рабазанович 4 дявилати анцIбукьла бутIакьянчи сай. Ил ургъули калун Афганистайзив (1987-1988), Таджикистайзив (1994-1996), Дагъистайзив (1999), Чечентала Республикализив (2000). Чуйнара декIли вяхъибси сай. Я.Жамбалаев Югла шайчибси дявила округлизив жагьилти дявила къуллукъличи жибирнила шайчивси бегIлара гIяхIси даражала специалист сай.

Явнус Рабазанович «ХIунтIена Зубари», «Арцла къанч» ордентачил ва дахъал цархIилти орденти-медальтачил шабагъатлаварибси сай, илдала лугIилизив — Крым чарбарнилис «Патриот России» бикIуси медальличилра. Илкьяйдали Явнус Рабазанович СВО-ла бутIакьянчира сай, чуйнара дявилати анцIбукьуни кадиркути мер-мусаличи ваиб, бургъантас гуманитарный кумек гIеббаахъиб.

Ил тамашала адамличила чуйна белкIалра, чуйна ил гапваралра — камси са­би. СенахIенну лерилра сунела гIямру илини дявиласи къуллукълис, жагьилтас дявилашалси бяркъ бедлугнилис, Ва­тIайс уркIи кабихьили къуллукъбирнилис харждирули сай. Илала гIямрула бекIлибиубси мурад – сунела улкалис, ВатIайс марли кални саби.

Гъабзадеш, мурхьти багьудлуми, кабизалачердеш, гьала хили секIал пикрибирни, уркIила умудеш – илди ва цархIилти черяхIти адамдешла адуцалаличил ва пергерти къиликъуначил декIарулхъуси сай Явнус Рабазанович Жамбалаев. Марлирагу, иличил ихтилатикIуси адам илала хIял-тIабигIятла жагадешли, чихъти адабдешли тамашавирахъули сай. Ил чинав узалра ва къуллукъбиралра, сунела хIянчиличи ва сунела хIерудилиубтачи жавабкардешличил вяшикIуси сай. Илала баркьудлуми гъайлизирад гьачамалра декIардухъунти ахIен, чесибси таманбирес бурсивиубси сай ил. ВатIайс марли къуллукъбарнилира илис бикьридеш дирули сари. Явнус Рабазановичгъунти адамти чеалкIуси наслулисра  гIибратли бетарули саби.

Дагъистанлантани чули дяхIяэс чебуркъубтачила, республика кахси балагьлизибад берцахъес багьандан халаси яхI, сабур ва гъабзадеш дакIударили, дурабухъунти Я.Р.Жамбалаевгъунти иги­туначила хъумхIерту. ГIяхIгъубзнала игит­дешличила, гъабзадешличила че­ал­кIуси наслулизира буру, илдазир ва­тIай­чи диги адилкьа.

ПатIимат Сулайбанова