Ши — кIел хIярплизибад бетаурси дев саби, сунечилра лерилра адамла гIямру дархдасунти. Гьарил адамла сай акIубси, хIерируси, уркIилис ахIерси ши бируси саби. Сай шагьарлизивадси виалра, бегIти, хала бегIти шимазиб акIубти саби. Лерилра шимала сари-ургар декIардулхъахъути къиликъуни дирар. Халаси талихI саби, илди къиликъуначил хIу тянишси виадли, илди чердикIили халаси иштяхIличил цархIилтази дурадли. СенахIенну хIелаван шиличи диги цархIилталара алкIан. Илдасра дигахъу чула шиличила ца адамлилра хIебаргибси, яра чехIебаибси къиликъ баргес, хIялумцIлаби дурадеркIес. Гьаннала замана илдигъунти камли саби.

ХIушанира балуливан, шимазир дахъал мер-муса дирар. Илди хIедирхахъес багьандан нушала хала бегIтани гьарил мерлис у бедлугусири. Сегъуна-биалра мерличиб кабикибси анцIбукьличил илди дархдасунти дири. АнцIбукьуни цализи цали дурули, хабурти детарутири. Дусми ардякьункъира цацадехIти нушачира даиб, цацадехIти бекIлил хъумартурли урдухъун. Гьарил шила сунела айтубира буралабира дирар, сарира дебали тамашадизести. Илкьяйдали адамли се-биалра чеимцIабарили дурути анцIбукьунира къаршидиркур. Или биалра, хала бегIтани чули далути нушачира даахъили сари. Нушачи хъарси илдигъунти секIал детхIехъахъни ва хъумхIертни саби. Гьанна нушала наслуличир сари шимала тарихуни тIашти. Нушала чебла – илди мяхIкамдарили, чеалкIуси наслуличи дааахъни саби.

Макьалализиб наб бурес дигулра УбяхI МулебкIила шила мер-мусаличила. Бархьаначи бурасли, ручIес шагьарлизи ракIайчи шила тарих руркъниличила ну пикрилра рулхъуси ахIенри. Карерхурли гIергъи, дила шиличи диги имцIадиуб. Рахъ гьарахъли хIериаслира, биштIал ВатIайзи уркIи гьалакбикIар. ВегI хIерирухIели мурталра чедиути мер-муса чисалра тамашахIедилзан. Илкьяйдали — набра. Амма чинаб-биалра вегIла шила сурат чебаалли, иличиб жагаси мер гIур хIебургар или гьанбиркур. Илкьяйдали шила тарих бяркъес, шиличил дархдасунти сегъунти-биалра масъулти ирзес диги акIуб набзирра. Ил шайчиб дарган мезла нушала преподаватель Муса Расуловичла асар агарлира кахIелун. БегI гьалаб илини сабри шиличил бархбасунси хIянчи гибсира. Нунира дила шиличила илис гьалар къаршихIедикибти чумал тамашала баян даргира. Дигалли, адамли къаркъубира гъайдулхъахъути сари. Даргибтазирадли чумал, газета бучIантас гьаладирхьулра.

«СултIанзала хIяб»

Гьалабла замана адамти шилизибад дурабухъи, цархIилти мер-мусаличи бякьунхIели, гьава барсбиубли, вабаъла изайзи биркутири. Гьачам СултIанза бикIуси ца жагьил рурси урхьула дубличи рякьунхIели, зягIиприкили сари. Шила халалли шилизи ил хьурарирахъули руили ахIен изала тIинтIбирар или. Рурси шилизи карукес дигули неш дугьаризурхIели, ил викIули сай: «Рилкьуй чудни хинкIи-мага дирулрив илизирад хIуни?» Илини бурибси децIагибси рурсила нешли диргала бурили сари:

«ЖумягIла гIергъи, бекI агар кьаркьала абухаб хIела», — рикIули. Къадаларад дашути шинничил рирцили, рурси дудешлира узинира Къярдмахьилизи ухIнаулхъуси мерличи хIяририхьили сари.

ЖумягI дикили гIергъи, ХIурхъила шила халкьличил къалмакъар детаурли сари. Ца хIурхъан адамли шушкали бяхъили, шила халалла бекI арцахъурли саби, илала кьакьала, рурсила нешли ибси тяхIярли, шилизи бекI агарли абухибсири.

Ил хабар нушала шантани гьарли–марли кабикибси кьяйдали бурули бирар…

«ХIяжигантIа Ада»

Шилизив УматгIисахъалара Баркахъалара жинсла ца адам левли уили сай ХIяжигантIа бикIуси. Ил дурхъаси адам сайри. Цагьачам ил викIули сай:

«Ну вебкIибхIели, цIудара лагьнала хIенкь лябкьян, илдазиб ца цIуба гIя­раб­ла лагьара бирар. Ил чина кабиили халтI­баралра, ил мерличи ну хIярии­хьа­бая».

Ил вебкIили гIергъи, бурибси тя­хIярли лагьни дакIили сари. Ца цIуба лагьа декIарбухъи, шила уди кабииб ва халтI­бухъун. Ила хIяриихьили сай ХIяжи­ган­тIара. Ил дурхъаси адам виъни багьандан хIяб хъа бухIнаб барибси саби. Ил-алав хIя­рибихьили биштIати дурхIнира лебти са­би, амма илди хъа дураб саби. Ила сада­кьа бутIес, дурхъати бурхIназир дулгес, дашутира нушара. Ил мерлис нуша ХIя­жигантIа Ада дикIули дирехIе.

«БицIла шява»

Шиличи бяхIчиси музаличиб, хIяйванти дуки дикуси мерличиб, лебси саби ца шява, сунесра «БицIла шява» или бикIуси.

Сен илкьяйда бикIуси? Гьачам кьяш бячи, башес хIебируси бецI, ил шявализи кабатурли кьяшра сабира бускаи буили саби. ГIергъиси бархIи аракабиубли кьяшра сабира, башескабиили саби. Илаб ил чилирил чебаилри ва илала гIергъи илис «БицIла шява» или у бедибсири. Се–биалра изуси лебли биалли, ила вякьи шиннизи кабалтули бирар. Шин шурмаурад дашути сари ва дарма шиннизи халдирути сари.

«БукIун дурхIя»

Цагьачам шилизивси жагьил дурхIя нешли дуки вархьили сай. Ил замана мерсдакьунхIели, иличи Кьани шурила къаркъа гербухъи саби. ДурхIя шури сунечи чекабиуси замана гьавухъес бажардихIейкили, викIули сай: «Ва, бацла шала, ша тIамадара!Ва, шалал ури, абази жиа! ХIала букIун урши шурли вячIун а!» Ил замана аргъ бамкьурсири ва берхIи цIяббиубсири. ИлхIели неш шакрикили, дуцIрухъи сари, амма се гIяхIдеша, дурхIя мицIирли хIергиб.

«ХIяж барибти адамти»

УбяхI МулебкIила шилизиб машгьурбиубти халкьра лебтири, ХIясанхIяжира ва МуртазгIялихIяжира. Илди башули хIяжлизи бякьунтири. Илди гьунчиб хIябал баз калун. Чарбиубли бакIибхIели, ХIурхъила шилизи илдас лебил шила шанти гьалабякьунти саби.

«Къалмакъар»

ХIясанхIяжихъалара УматгIисахъалара ургар къалмакъар кадикибси замана, ХIясанхIяжихъала жинсла адамли УматгIисахъалази хIушала рурсби дураая или бурили сай. Илдас бурибси дебали децIагили, илди-ургаб янила замана шурайла миъличиб къалмакъар дикибтири. УматгIисахъала хIябал узи кабушибтири, кIел узи ХIясанхIяжихъала. Гьалаб рурсбачила гъайили хIебалтутири.

ЦархIилти чябхъинтала дурарад шила къатIани сари-ургарра дургъули калунтири. БурхIикъатIра ЯнцIакъатIра или бутIили, цабехIличил цабехI гъайбикIути буили ахIен.

«Нешла бебкIа»

ГIурра шилизиб буруси хабар леб, ца хьунул адамла хIябал дурхIя гIярмиялизи арбукили саби. Замана бикили гIергъи хабар бакIили саби хIябалра дурхIя кабушниличила. Марайдешлизи рикибси неш, илала гIергъи мехIуркариубси тяхIярличи рикибсири.

Дургъбазиб уршби, муйли, узби кабушибти дебали децIлизи биркутири. Вайси хабарла аргъибси хьунул адам сунела хIяйчи рикес рирули ахIенри. ЦагьатIи хабар бурули бири, ца махьилизирадси хьунул адамличилара. Илала гьалмагъ гIярмиялизи арукили чархIевхъунхIели, ил чисалра шери рякьунси ахIенри или.

Марти диалра, къянала диалра, гьалабла халкьли цализи ца дурули нушачи даибти хабурти сари нуни  гьаладихьибти.

Дила белкIличибли наб гьарил адамла шиличи, шила тарихличи, илар кадикибти анцIбукьуначи диги имцIадиахъес дигулра. Сен дикIадалли, бурис. Дусличи-дус шимазиб хIербирути халкь камбикIули саби. Лебилра шагьуртази гьуцIбикIули саби. Илкьяйдали чузиб хIеркабирути халкь кахIели, дацIкадухъунти мер-мусаличи шуркадулхъули сари илди. Чум лера гьатIи илдигъунти ши? Гьалаб шилизиб бацIси юрт хIебири. Деткайхъули сари шимачила далилти, сарира нушала хала бегIтани къиян кабихьили, нушачи даахъибти. Ил баркьуди дебали гIядаббилзули саби наб. Ил багьандан илгъуна аги нушани барсбарес кьасбирехIе. Шагьарлизир хIердирули диадалра хъуммартидая нешла мез, мезличил барх хIуша акIубси шира. ХIушала дурхIядеш чинар ва секьяйдали ардякьунтирил хабурти дуреная биштIатазира.

Иш макьалализирти баянти хIушани делчIадалли, дила пикрили, хIушабра се-биалра бекIлизи лябкьян, хIушази дурибтира гьандиркур. Илди биштIатанира дикьу, иштяхIличил лехIирхъур. Багьла-багьлали гьарил секIал гьунчидиркур. Гьанбикахъая бурала: «Вашусини бирар гьуни ихъуси!»

Анжела Мутазова