Нушала Дагъистан цархIилти регионтазиб, республикабазиб ва улкназиб машгьурбарибти дахъал далилти лерти сари.
Хабарлизибра «гIяхIти гъубзнала ВатIан» или бурусигу нушала республика. Гьарли-марли дунъяличир лерилра дусмазир кадиркути дявила ва цархIилти жура-журала анцIбукьуназир гъабзадеш ва игитдеш чедаахъибти дагъистанланти дебали бахъал саби. Ил багьандан бургар цархIилтани Дагъиста халкь шандан кьяйда чIуматази, чIакни кьяйда азадтази, айгъиртиван хъярхътази халбирутира.
Гьанна бусягIятла манзилра чедир гьандушибти баянтас бикьрили бетарули саби. Улкала хъархIерагардеш ва умуси зак калахъес багьандан, бахъал дагъистанлантани чула жан кьурбандариб.
Нуша, гIелар калунти, цаванзаланти илдигъунтачи пахрули дицIилра. Даршдусми ардукьялра Игитунала уми халкьла уркIбазир кавлан. Къанч бедибсицун ахIенну, лебилра илди Игитуни саби.
Улка ва илабти халкь багьандан душмайс бяхъ чегахъес дергъла цIализи дураухъунси адам итира Игит сай.
ХIера, иш макьалализир гъай илдигъунти гIяхIгъубзнала къяйлизивадси хасси балбуцлизир бутIакьяндеш дирули алхунси МяхIяммадов Мурат МяхIяммадовичличила сари.
Ил акIубсири 1984 ибил дуслизив Сергокъалала районнизив. Муратла хъалибарг Къаякентла районнизиб хIербирутири. Гьеч, виштIаси Муратла кьисмат кьутIкьусили уббухъун. Ил шел дус виубхIели, дудеш гIямрулизивад шалгIевухъунсири. Шелра уршира сарира неш калунсири. Муратли шилизибси школа таманбарили, мургьи улканна(сварщик) санигIят руркъуси мерличиб белчIуди даимбарибсири.
2002 — ибил дуслизив Мурат гIярмиялизиб къуллукъбарахъес арукибсири. Дальный Востоклизив дазу балтахъан виубли (пограничник) ил калунсири. КIел дус гIярмиялизив кали, хъули чарухъунсири. ГIур хъайчикайибхIелира, ил нешличил ца юртличив хIерирусири. Дебали нешличи дигичевси, иличи уркIецIичевси урши вири или бурули саби лебилра илала тухумлира, унра-хунранира…
2022 ибил дусла сентябрьла 22-личив М.МяхIяммадов хасси балбуцлизир бутIакьяндеш дарахъес живарибсири. Хъулиб иличи хIерли неш, хьунул ва 5 дус риубси рурси калун.
Гьаланачив ил дебали чIумали дергъ бемжурси мерличи къаршиикибсири ва чумра баз илди аги-кьяйдализив калунсири. Ца дусра чумал бархIира дикили гIергъи, ил алхи сай ибси хабар бакIибсири. Кахси хабарли хъалибарг хIяйранбариб ва илдала уркIбачи сагъхIебируси дяхъи бариб.
Машина цIали бигубли ва жаназа агарли уббухъи, къел-хIерзи агарли дявила авлахъличив ил веткахъиб. Муратла рурсира сари кьяйдали жявли дудешлизирад мяхIрумриуб. АнцIкьи-децIли руцили нешра зягIипкарикиб. ХIябал базла рухIнар илала нешра гIямрулизирад шалгIеррухъун.
Илгъуна кьутIкьуси кьисмат чумра хъалибарглизиб тикрарбиубли саби. Ил багьандан лебилра СВО-ла бутIакьянчиби — нушала Игитуни жяв-жявли арали хъули чарбухъахъес Аллагьлизи балга бирехIе.
П.Шахова
