КьярбачIимахьила ши Дахадаевла районнизирти бегIлара ахъти дубуртачи мерлабиубси саби. Дусла лерилра манзилтазир ил ши-алавти мер-мусала жагадешли адам хIяйранвирахъу. Ил шилизиб хIербирути адамти дебали балгунти, бахълис гIибратли бетаурти саби. Ишди бурхIназибра кьярбачIимахьилантани цахIнарти цIакьаначил чула ши жагабиахъес ва адамтала яшавла даража гIяхIбухъахъес багьандан къайгъни дакIудариб.
Шилизирти гьундури вайси агиличирри. Иличирли шантас дахъал къияндешунира алкIулри. Заб-марка дарибхIели, илди гьундурачирадли машинаби дашес къиянбулхъулри.
БегI гьалабси яргализир илдани гьундури къулайдариб. Илдигъунти багалати баркьудлуми мисалли детарули сари цархIилти шимала халкьлисра. Шантала уржибдеш биалли, шила чебаъра гIяхIцадла барсбарес имканти алкIули диъни ашкарси саби.
Илала дурабадлира, мицIираг шинни далхес хасдарибти шараби умудирниличи ва къулайдирниличи халаси пикри бяхIчиаиб шантани. Илгъуна гIяхIбаркьличирли мицIираг дужахъес гьанна умути шин лер. Илдигъунти баркьудлумачирли шилизиб хIербирути адамтала яшавла шуртIри гIяхIдулхъан ва мицIираг адилкьни жигарчеббирар.
Шила шанти илкьяйдали цабиалли, сегъунти- дигара багалати баркьудлуми дурадеркIес вирар. ХIера, кьярбачIимахьилантанира жамигIятла гIямру ункъдирахънила баркьудилизи чили сегъуна кумек гIеббаахъес вирарал белгибариб. ЦабехIли бузерила гIягIниахълуми тIалабдариб, цархIилтани арцличил кумекбариб. Амма цахIнабси бузерилизир лебтанилра иштяхIличил бутIакьяндеш дариб.
Дахадаевла районна администрацияла пресс-служба
