…ЧебяхIси Чедибдеш 79 дус биънила хIурматлис хIядурбируси газеталис белкIани дурчухIели, наб Цугнила шилизивадси дявила бутIакьянчи, дергълис гIергъити дусмазир Ахъушала районнизир ва республикализир дахъал жавабла хIянчи дарибси МяхIяммад ХIяжимурадовличила макьала къаршибикиб.
— М.ХIяжимурадовла дебали гIяхIси, бахъал адамтала баркалла сархибси СалихIят бикIуси рурси лерси сари, — иб газетала корректор ПайтIма Шейховани. Иличилара белкIес гIяхIсири.
— Бархьси пикри саби, — ира нуни. — Гьари, СалихIятличил бархбас баргая!
ИшбархIи, марлира, дебали гьамадли саби гIягIниси адамличил бархбас кабизахъес. Чумал бархIила гIергъи столличир дакIудиуб къугъаси хьунул адамла суратра, иличила сари рузуси мерличиб белкIунси характеристикара.
…ХIяжимурадова СалихIят МяхIяммадовнани 1970 ибил дуслизиб Цугнила урга даражала школа таманбариб ва тах шагьарлизибси мединститутлизи карерхур, 1976 ибил дуслизиб ил хъараахъур. Илис гIергъи кIел дус ручIули калун субординатурализир, акушерствола ва гинекологияла шайчибси интернатурализир.
С.ХIяжимурадовала бузерила гьуни бахъхIиагарли шуцIали дусличи абиркур. Ил заманала бухIнаб пагьмучерси тухтурли сунела санигIятлизиб гьуни ахъиб акушер-гинекологличибад бехIбихьили, ДР-ла арадеш бихIнила Министерствола акушерствола ва гинекологияла шайчирси бекI специалистличи бикайчи.
СалихIят рузес рехIрихьибсири 1978 ибил дуслизир МяхIячкъала шагьарла «къалабаси кумек»-ла тухтурли. ГIур вецIал дус хIянчи бариб МяхIячкъала шагьарла биштIати биркьуси цаибил больницализиб.
1989 ибил дуслизир МяхIячкъала шагьарла хьунул адамтала хIябъибил консультацияла заведующая рариб. ХIябал дусла гIергъи ДР-ла арадеш бихIнила Министерстволизи шурратур — акушерствола ва гинекологияла шайчирси бекI специалистла къуллукъличи. 1996 ибил дуслизир республикала арадеш бихIнила Министерствола ва ФОМС-ла бархси экспертный Советла председательли рикIиб. Дебали жавабкарси къуллукъличиб хIябал дус хIянчи барили гIергъи, сагали ДР-ла арадеш бихIнила Министерстволизи шуррухъун ва 2003-ибил дусличи бикайчи илар рузули калун. ГIур урегал дус хIянчи бариб МяхIячкъала шагьарла кIиибил биштIати биркьуси юртлизиб бекI тухтурла къуллукъличиб. ГIячихъси саби, биштIати биркьуси мерличирти жавабкардеш дегIлара ахъти диъни — бекI тухтурли жавабкардеш дихути диъни багьандан гьарил хIянчизарла баркьудилис.
«2009-ибил дуслизир СалихIят МяхIяммадовна гIилмула хIянчизар ретаур — Россияла Федерацияла медицинала гIилмуртала Академияла Дагъистан Республикала Правительстволизибси филиаллизир…
…2016 ибил дусличирад ишбархIиличи бикайчи С.ХIяжимурадова рузули сари арадеш бихIнила Министерствола ДГМУ-лизир акушерствола ва гинекологияла кафедрализир доцентли.
С.ХIяжимурадовани жигарла бутIакьяндеш дариб республикала кьадрила дебали мягIничерти программаби хIядурдирнилизир ва илди гIямрулизир детурхахънилизир», — белкIи саби СалихIят МяхIяммадовнас хасбарибси характеристикализи.
Сунела санигIят гIяхIил бяркъурси ва чекаризурли рузуси ил тухтурли бутIакьяндеш дарили сари дебали мягIничерти, республикала кьадрила учреждениеби алкIахъухIели ва дузесиухIели. Илди сарри «Республиканский Центр планирования семьи и репродукции человека» ибси уличилси ва республикала лерилра шагьуртазир акIахъубти республикала Перинатальный Центрла филиалти.
1995 ибил дуслизибал илис кабизахъурсири акушерствола ва гинекологияла шайчиб чебяхIси категория, 1999 ибил дуслизиб Дагъиста рурибси тухтурла у касиб. Илини гIурра арадеш мяхIкамбирнила хIянчи дурабуркIнила шайчибси специалистла ва «Акушерство и гинекология» ибси санигIятла шайчирси специалистла кIел сертификатра касили сари.
2002-ибил дуслизиб С.ХIяжимурадовас Россияла медицинала гIилмуртала Академиялизибси акушерствола, гинекологияла ва перинатологияла гIилмула центрла диссертационный Советла хIукмуличил бедили саби медицинала гIилмуртала кандидатла у.
СалихIят МяхIяммадовна — сунела санигIятлис марси, сунела гIямру нешанала ва сагали акIубти биштIатала арадеш мяхIкамбирнилис харждируси, паргъатагарси, дуги-хIерила чидил–дигара сягIятлизир кумекличи музарухъес хIядурси, сунела багьудлуми чедирцIахънилизир чекаризурли рузуси тухтур сари. Илала бузери лайикьбикили саби дахъал ХIурматла Грамотабачи ва бахъал адамтала баркаллаличи».
Халаси хIурматра, дахъал шабагъатунира сархили гIямру деркIибси дудешла илгъуна машгьурриубси тухтур рурси лернира цахIнабли районнис разидешла лишан саби, сенахIенну пагьмучерси тухтурла кумекличи хIяжатбикибти ва илис баркалла балахъути адамти районна шимазибра лебхIели!
СалихIят МяхIяммадовна, арали ратаби хIу, гьаннала гIергъира гъираличил рузахъес!
ПатIимат Маллаева
