Гьанна нушала библиотекали «Хъалибаргла акьути бурхIни» бикIуси проект гIямрулизиб бетурхахънила шайчир гIяхIцад далдуцуни дурадуркIули сари. ХIера, илдигъунтазибад ца бетерхур ишди бурхIназибра.
Ил балбуцлизир бутIакьяндеш дариб поэт, журналист, Кавказла пагьмула ва гIилмула интеллигенцияла Ассоциацияла президент Аминат ГIябдурашидовани, Дагъистан Республикала халкьла художник Амирхан МяхIяммадовли, ДР-ла халкьла гIяртист, дявила анцIбукьунала ветеран ГIябдуллагь Фаталиевли, «Ихтилат» бикIуси социальный бяхIчибизла-психологияла центрлис гьуни чебиахъуси Зайнаб Рашидовани ва илала кумекчибани, МяхIячкъала депутатунала Собраниела гьалабси жагьилтала Парламентла председатель ГIялигъалбицI ХIусейновли, илала бекIдешлиубти кумекчибани (волонтеры), МяхIячкъалала 38 ибил гимназияла 3-ибил классла учIан Даниял ГIяхIмадовли ва бахъал цархIилтани.
Нушани балкьаахъурси жузала выставкала кумекличил балбуцлизир бутIакьяндеш дируси гьариллис республикала тарихличила, гIядатуначила, наслулизирад наслуличи диути бакьалабачила багьес имканбакIиб. Выставкаличир гьаладихьибти жузазибад адамтани Дубуртар Улкала тамашала мер-мусаличилара багьур. ХIушани балуливан, нушала республика машгьурси саби илдигъунти гIур чинаралра къаршихIедиркути, машгьурти къярданачил, дубуртачил, жявхIелила къалурбачил, шимачил. Илдазибад гьарилли республикала дахъал шалубарси культура чебирцIахъули саби.
Жузачил дарх, илкьяйдали нушани гьаладихьира отделлизир лерти газетаби-журналтира. Выставкаличи гъамбиубтас илди акIнила тарихличилара аргъес имканбикIулри.
КIинайс патриотический тяхIярла балбуцра дураберкIибсири – кIапIбируси, дигIянбируси души балкьарахънила шайчибси устадешла дарс кабихьибсири. Илдигъунти душиби дузахъути сари бургъанти дигIянбикахъес, дявила гIягIниахълуми кIапIдарес. Буралли, илдани гIямрура уцахъути сари. Устадешла дарсла замана души балкьарахънила тяхIяр-кьяйдара пикридариб. «Ихтилат» бикIуси, сунечила чедибра бурибси центрлис гьуни чебиахъуси Зайнаб Рашидовани кумекчибачил дарх СВО-лис илдигъунти душиби далкьарахънила МяхIячкъалилизирти пунктанала адресуначилти ва телефонтачилти кагъурти дутIиб. Балбуцла бутIакьянчибани нушала бургъантас душиби хIядурдирнилизирра бутIакьяндеш дариб.
Ахирличиб илди лерилра далдуцунала бутIакьянчибас уркIи-уркIилабадси баркалла багьахъес дигулра. Нушала лебталалра къайгъначибли саби чеалкIуси наслулис лайикьси бяркъ бедес имканбикIусира!
Салимат ХIяжиева, Р.ХIямзатовла уличилси Миллатла библиотекала край руркънила отделла хIянчизар
