Россияла Президентли багьахъурли кьяйда хъалибаргла Дус дурабуркIнила дазурбазир, Хайдакьла районна «Ореховая роща» бикIуси дурхIнас хасбарибси лагерьлизир гIяхIцад далдуцуни детерхур: «Хъалибаргла анкъила лами – мардешла ва талихIла лишан» бикIуси республикала фестиваль, «Хайдакьла гIядатуни» бикIуси Дагъиста халкьанала миллатла кIунбала байрам, «Хайдакьла устни» бикIуси выставка-ярмарка, «Наслубала мургьила тIуз» бикIути устадешла дурсри ва цархIилти.
Далдуцунала лебилра бутIакьянчиби мубаракбариб Хайдакьла районна бекI ГIялим Темирбулатовли ва иличил барх лагерьлизи бакIибти гIяхIлани.
«ИшбархIи нушала цаладикес кIел сабаб лер. Нушани байрам лагерьлизиб дураберкIибси саби, чила хIурматбирулрал дурхIнази чебаахъес багьандан. БегI гьалабси яргализир илди – Хайдакьла районна гIибратла хъалибаргуни сари. КIиибил сабаб – ишбархIи нушани районна Родниковая шилизибадти Европала боксла шайчибти жагьил чемпионтас гьунидаъни. Илдачи хIербикIули, дурхIнала спортличи иштяхI акIубли, илди, гьарли-марли спортлизи ахъалли, сархибдешуни дирни аргъес вирар.
Хайдакьла лерилра хъалибаргуни наб цали цала уркIи иргъули, талихIчерли хIеркадиубли дигулра! Мурталра хIушала хъулразиб разидеш каммабиаб. Илдигъунти гIибратчерти хъалибаргунани саби ишдигъунти машгьурти спортсменти ва нушала ЧебяхIси ВатIа – Россияла – гьарли-марти патриотуни абилкьути!» — викIи ГI.Темирбулатов.
КIинайс хъалибаргуни районна администрацияла шайзирадти Дипломтачил шабагъатлабариб. Хъалибаргунала гIядатуни мяхIкамли дихIни багьандан, муниципалитетла бекIлизирад шабагъатуни касиб ГIябдусаламовхъала, Валибековхъала, Расуловхъала, МяхIяммадовхъала, ГIялиевхъала, ХIясановхъала, ГIямаровхъала хъалибаргунани, сунела бузериличил Баршамайла шила культурализи белгиси пай кабихьни багьандан, Жаният ХIясановани, илкьяйдали гIулухъа чемпионти Ислам ва Иман абикьурси МяхIяммадовхъала хъалибаргли.
Европала Гьалабдеш багьанданти абзаначиб чедибикибти хайдакьлан боксерти Ислам ва Иман МяхIяммадовхъала хIурматбирнила балбуцра бетерхур. Уршбани абзаначир Россияла цахIнабси командала цалабяхълизир бутIакьяндеш дарибтири. Ислам МяхIяммадов 50 килограммличи абикайчи битIакI хIясибли бегIлара гIяхIси спортсменни увухъун. Илини 4 абз дурадеркIиб, яргаличил Азербайжайзивадси, Румыниялизивадси, Ирландиялизивадси ва Армениялизивадси къаршикартачибад чедибдеш сархули. Илала узи Иман МяхIяммадовли 52 килограммличи абикайси битIакI хIясибли чедибдеш сархиб. Илра 4 рингличи дураухъун, Турциялизивадси, Италиялизивадси, Ирландиялизивадси ва Молдовализивадси спортсментачивад гьалаулхъули.
ГI.Темирбулатовли халаси пахруличил чемпионти мубаракбариб ва районна администрацияла шайзирад илдас савгъатуни дедиб. Баркалла багьахъур спортсментала тренер МяхIяммад Мирзаевлисра ва Родниковый шила школала директор Наида МяхIяммадовасра, уршбас гIяхIси бяркъ бедни ва сархибдешунас хьулчи кабихьни багьандан.
Далдуцунала хIурматла гIяхIланира хайдакьланти ва жагьил спортсменти мубаракбариб.
Байрам концертла программаличил даимбиуб, илхIели далдуцунала бутIакьянчибас миллатла кIунбира чедааэс имканбакIиб. Мажалисла шила культурала Центрла, шимала культурала КIялгIнала, «Хайдакьи» этноцентрла, районна библиотекала ва илала филиалтала, дурхIнала пагьмула Юртла ва дурхIнала искусствола школала хIянчизартани выставкаличир жявхIелла кIунбачир дирути някьишла хазна гьаргбариб.
Хайдакьла районна администрацияла пресс-служба
