Хъалибаргла БархIила хIурматлис чучила белкIес лайикьти адамтачила гъай бетаурхIели, Ахъушала районна бекIла заместитель Эльвира ХIясанхIусейновани ГIялимяхIяммад Гъапуровичла у гьанбушиб.
ГIялимяхIяммад ГIялимяхIяммадов гьала-гьала районна газетала редакцияличи хIеруди бузахъанни, гIур – багьахънибала управлениеличил редакция цалабяхъибхIели – управлениела начальникли узули калунсири. Нушаб, редакцияла хIянчизартас дебали хIейгибизурсири ГIялимяхIяммад нушачивад арякьунхIели.
Редакторла къуллукъличи ну каратурсири 2003-ибил дуслизир. ГIялимяхIяммад районна администрациялизи 2004-ибил дуслизив, районна администрацияла бекIла заместительла къуллукъличи катурсири.
Илини чисалра децIагеси гъай бурули хIебакьира, чисалра хIейгибизесира хIебариб.
Мурталра дяхI шалали, разили, малхIямли адамтасра гьунивиули, сунечи хъарси хIянчира чебетаахъили бирули, хIянчизартала ургар диги-хIурматра сархили узусири ГIялимяхIяммад. Ил МухIела шилизивад Ахъушала шилизи хIянчиличи вашусири.
Сунечила ва сунела хъалибаргличила белкIахъес хъарбарибси саби или зянкъдяхъили бурибхIели, ГIялимяхIяммад кьабулхIейкиб.
– Набчила хIебелкIадалра белкIести камли хIебургар кьалли, – или гъай къантIкадарес вализур.
Нушани районна администрацияла багьахънибала управлениелизив узуси, сунела рурсила урши МяхIяммадличи, редакциялизи хала дудешличила баянти хахъес хъарбарира.
Илдазибад гIячихъбирули кьяйда, ГIялимяхIяммадли бузерила гьуни бехIбихьили сай 1981 ибил дуслизиб, ДГУ-ла физикала факультет таманбарили гIергъи, БурхIимякьмахьила урга даражала школализир физикала ва математикала дурсри кадирхьули.
Ил 1985 ибил дуслизив Кавкамахьила урга даражала школализи шурухъун ва кIел дус директорла заместительли, 1987 ибил дусличивад директорли узули калун.
Илис гIергъи гъал дусра-сера ГIялимяхIяммадли районна администрациялизир жавабкардеш тIалабдирути къуллукъуначир хIянчи дариб ва къугъати тяхIяр-кьяйдала, мурхьти адамдешла вегI сайливан халкьли вагьур.
Писки МяхIли, бунагь-хатIа урдуцаб сунела, бурибси пикри, адамлис бедибси кьимат, тамай бархьсилизи буйгIуси саби Ахъушала районнизиб. Писки МяхIли ГIялимяхIяммадличила цагьачам ибсири: «МухIела Гарала бяхIцад адамдешла вегI сай». Машгьурси, халаси пагьмула ва пасихIдешла вегI поэтливан чебетаибси кьимат бедес цархIил адам, мажахIят, бажардивикес. ГIялимяхIяммад валуси гьарилли гIеббурцу илала пикри.
Илини 42 дусла бузерила гьуни ахъиб. Илини адамдешла, сабурла, кабизалачебдешла хIерзи датур, барх бузутала баркаллара сархиб.
ГIялимяхIяммад редакциялизи ухIнаухъалли, кабинетуни гьатIира шаладиубтиван, гьарзадиубтиван дилзутири, илала гIяхIти гъайли уркIичердарили, гъираличил хIянчи даимбирусири.
Дахъал сари илини касибти ХIурматла Грамотаби, дигалли районна администрацияла ва багьудила управлениела, дигалли Дагъистан Республикала декIар-декIарти Министерствобала шайзирад.
Касили сай чумилра Баркаллала кагъарра – ДР-ла миллатунала къуллукъуназиб ва динна масъултазиб бузуси Министерствола, лебил Россияла дявила ва бузерила ветерантала организацияла республикала Советла шайзирад – чула далдуцуни гIердурцнилис ва илди детерхахъес халаси къайгъи дакIубирнилис.
Балгунси, къугъаси хъалибаргла бекI сай ГIялимяхIяммад. Сунела гIямрула рархкья ХIяпсатличил 45 дус барх хIербирули саби ва авал урши-рурси абикьурли, гIямрула бархьси гьунчи каили саби. Чихъти адамдешла вегI сайливан вагьурра нушани илала рурсила урши МяхIяммад, – лебилра иличи мешутили бетааб ва бегIтасра хала бегIтасра гьар бархIи чули разидеш бихаб!
Хъалибаргла БархIиличил мубаракбирули, ГIялимяхIяммадлис ва ХIяпсатлис чIумаси арадешра чучибад акIубтала талихIра диубли дигулра!
Редакцияла лебилра хIянчизартала шайзибад белкIунси — П.Маллаева
