Гьанна чина хIеризаллира, чина лехIизаллира нешла мез деткайхъниличила гъай сари. Школабазир вегIла мезла дурсрала сягIятуни камдикIули сари. БегIти чула биштIатачил урус мезли гъайбикIули саби. Гьаннала биштIатани нешла мезван ахIи, урусла ва англияла мез гIяхIил далули сари. Илди шимазибра цаличил ца урус мезли гъайбикIули саби.
Нешла мез хъумхIертахъес, илди гIяхIли дяркъурли чеалкIуси наслуличи даахъес ибси пикриличил кIел рурси ДГУ-ла филологияла факультетлизи каберхур ва илаб илди ункъли бучIули саби. Иш дила белкIра илдачила саби.
Мутазова Анжела ГIяхIмадовна Сергокъалала районна УбяхI МулебкIила шилизир акIубси сари. Шила урга даражала школа ункъли таманаили, ил ДГУ-ла филологияла факультетла урусла-Дагъиста отделениелизи карерхур.
Анжелани факультетлизирти гIилмула декIар-декIарти конференциябачир бутIакьяндеш диру. Илгъуна ца конференцияличиб илини чедибдешра сархибсири. Илала доклад университетла гIяхIтигъунти макьалабала ва хIянчурбала жузлизи каберхахъур.
ИлхIели ил макьалаби лукIес рехIрихьибсири. Гьала-гьала илини И.Ибрагьимовла «ЦIализиб ва хIилизиб» бикIуси жузлис рецензия белкIун.
ГIур илини сари акIубси шила тарихличила ва гIядатуначила макьала белкIун. Илкьяйдали ил багьла-багьлали журналистикализи рухIнаахъиб. Гьанна Анжела Мутазовани жагати ва уркIилизи атIести назмурти лукIули сари. Илала цаибси назму сунела шила жагаси тIабигIятличила сабри.
Анжелани сунела макьалабазир ва назмуртазир жура-журала темаби ахъдурцули сари.
Илини «Замана» газетализир рузес рехIрихьилра или бурибхIели, ну дебали разивиубра.
Дила белкIла кIиэсил игит ГIяликьадиева Ирина МяхIяммадрасуловна Дахадаевла районна Кудагула шилизир акIубси сари. Кудагула урга даражала школа таманаили гIергъи, ил ДГУ-ла филфаклизи карерхур.
Нуша цаибил курслизир дучIухIели, илини назмурти лукIниличила багьурра. ИлхIели нуни хьарбаибсири:
— Ирина рузи, бурагу хIу мурт назмурти лукIес рехIрихьибсири?
— 4-ибил класслизи рашухIели белкIунсири нуни цаибси назму. Ил назму белкIесра пикри акIубсири наб рахъ дебали ригуси хала неш гIямрулизирад шалгIеррухъунхIели. ИлхIели дила уркIи лебгIеб кьакьабакIибсири, ва нуни илис назму багъишлабарибсири. РиштIахIейчирад дила Дагъиста халкьла поэтесса ретаэс пикри лебсири. Дила дахъал назмурти кадерхурси тетрадь лебсири. Амма ил нуни мяхIкамбарес хIебагьурра, ва ил беткахъиб. Гьанна ну университетлизи карерхурхIели, нуни лукIути назмурти детхIехъахъес къайгъилизирра.
Иринала назмуртани адам жура-журала хIяланази виркахъули сай. Илини дигайличила, гьалмагъдешличила, сунела тухумличила лукIули сари.
«Замана» газетализиб Иринала шиличила, шила тарихличила цаибси макьала дурабухъун. ГIур поэтесса, журналистка ва газетала рахъхIила хIянчизар ПатIимат Кьурбановани иличила жагаси макьала белкIун. Ил макьалаличил дарх илала назмуртира дурадухъун. Ишдус «Гьалмагъдеш» журналлизирра илала сагати назмурти дурадухъун.
Илини гьанна ГТРК-ла даргала передача бузахъули сари. Набзи илини бурни хIясибли, илис сунела назмуртала жуз дуракаэс дигули сари.
Илди кIелра рурсиличила къантIли белкIес хIейрар. СенахIенну илди жагатицун ахIи, духути ва дяхI шалати рурсби саби. Кумек хIяжатли биалли, илдани кумекла някъ гьабурцу. Ил багьандан илдас халаси баркалла викIулра.
Рурсбани даргала цалра я шадлихъ, я гьунибаъни батурси ахIен. Илкьяйдали илдани дарган мезла хIябэсил тотальный диктант дураберкIибхIели, халаси кумек бариб. Ил багьандан илди диктантла оргкомитетла член, Дагъиста писательтала даргала секцияла руководитель Муса БяхIяммадовли ХIурматла Грамоталичил шабагъатлабариб.
ХIурматла рузби, ахъбикIаб хIушала пагьму, бугабикIаб хIушала кьалам!
МяхIяммадшапи Матаев
