Лебтасалра ашкарливан, гIергъити дусмазиб дунъяличир дахъал дархибдешуни, гъузгъалдидеш имцIадиубли сари. Илдигъунти далдуцунала бекIлибиубси мурад – нушала улка усалбикахъни ва бехъни саби. Илдигъунти аги-кьяйдализиб лебилра улкала халкь цабиубли, уржили, ВатIа хъархIерагардеш бихIес чебсира саби. ЦархIил тяхIярли улка хъархIерагарсили ва азадсили калес бируси ахIен. Илис бикьридеш дирути дахъал анцIбукьуни лер нушала улкала тарихлизир.
Наб дила макьалализиб бурес дигуси нушала улкали Украинализиб дурабуркIуси дявила хасси балбуцличила саби. Ил балбуцлизир жигарли бутIакьяндеш дирули сари лебилра Россияла халкьли. Илдала лугIилизиб дагъистанланти гьарилра шайчибад бегIлара гьаларти къяяназиб саби. Илдала ургаб леб, дила шила жагьилтира. Илдазивад гьарил сегъуна-дигара журала шабагъатличи ва хIурматличи лайикьли сай.
Сунечила наб бурес дигуси макьалала игит ГIябдулкаримов МяхIяммад ГIябдулкаримович Къаякентла районна Сагаси Вихърила шилизив акIубси сай. Илала дудеш ГIябдулкарим школала тарихла учитель сайри, неш ПатIиматли хъали–цIаличи ва дурхIначи хIеруди бузахъусири.
МяхIяммад Сагаси Вихърила школализив учIес вехIихьиб. Ил виштIахIейчивад вайсира гIяхIсира ункъли пикрибируси, белчIудиличи гъирачевси дурхIя вири. УрчIемъибил класс белчIунмад, МяхIяммад, дудешлис икьалабарес кьасли, бузерилизи ахъиб. СанигIятлашалси багьуди касес кьас илала дусличиб-дус имцIабикIулри. Ил багьандан МяхIяммад бузерилизивад къябхIердили, бархIехъла школализив учIес даимиуб. Школа ахирличи биркухIели, МяхIяммадли дудешлизи сунес Ярагъладиубти ЦIакьаначил бархбасунси санигIят касес дигниличила аргъахъиб. ИмтихIянтачир сунес керхес гIягIниси белчIудила жураличи хасти балланира касили, ил хIядуриуб. Дудешли ил Санкт–Петербурглизибси маршал С.М.Будёновла уличилси бархбасла (связи) дявиласи Академиялизи учIахъес вархьиб.
2013 ибил дусла августла цаличивад МяхIяммад ил Академиялизив учIес вехIихьиб ва 2018 ибил дуслизиб белчIуди хъараахъур. Академиялизив учIухIелира МяхIяммад гьарра шайчивад цаибтала къяяназив вирусири.
Спортла шайчирра МяхIяммадла гIяхIцад сархибдешуни дири. Школализив учIухIелира илини районна ва республикала кьадрила боксла шайчирти абзаназир гIяхIцад шабагъатуни сархули вири.
Академия белчIунмадан лейтенант М.ГIябдулкаримов Челябинскла областьла Чебаркуль шагьарлизиб мерлабиубси 90– ибил танкабала дивизионна 400–ибил самоходный полкла реактивно – артиллерийский дивизионна взводла командирли узес вехIихьиб. 2019 ибил дуслизив ил батареяла командирли викIибсири. 2020 – ибил дуслизиб старший лейтенантла у бедибсири.
2021 ибил дусла ноябрьличиб МяхIяммадли къуллукъбируси полк бурсидеш ва бяркъ ахъдарес багьандан, Брянскла областьлизи букибсири. Иларра гIяхIцад устадеш ва бурсидешуни касибтири.
2022 ибил дусла февральла 24–личивад МяхIяммад ГIябдулкаримов Украинализиб дурабуркIуси дявила хасси балбуцла бутIакьянчи сай. Илди Чернигов шагьарлизи бархьибтири. Илаб МяхIяммадлис «Гъабзадеш багьандан» бикIуси цаибил медаль бедибсири. Мартла 31–личиб илабад дураили, илди Луганскла областьлизи бархьибтири. Ялепово бикIуси мерличи кабатуртири. Илдала бекIлибиубси хIянчи – бархбас камхIебирахъни. Илар дакIударибти гъабзадеш багьандан МяхIяммад Суворовла медальличи лайикьикибсири.
Сентябрьла авличиб илди Херсонская областьлизи Днепрла итил шайчи арбукибтири. Илди бургъантас бегIлара хIяжатдеш лебси мерличи шурбалтули, бургъули саби илала дивизион. ХIябъибил шабагъатличи, «Асилдеш багьандан» бикIуси 2-ибил даражала медальличи, МяхIяммад лайикьикибси илав сайри.
2023 ибил дуслизив МяхIяммад капитанна уличира лайикьикиб. Илала дурабад М.ГIябдулкаримовли Верховный Главнокомандующийла шайзибадси Грамота касиб.
ГIе, илгъуна сай дила унра урши МяхIяммад. БегIла гIергъи хъалибарг ва бегIти чебаэс вакIибхIели, ну МяхIяммадличил гьуниваира. Илис сунела къуллукъбируси мерличи арукьес ца бархIи сабри калунси. Нуни МяхIяммадличил, къалабахIейкIули, ихтилат дураберкIира ва гIяхIцад суалти хьардаира. МяхIяммадлис адамтачил ихтилатикIес дигахъу, амма иш гьакIлис хасси балбуцличила гъай къантIдирулри. Гьайгьайрагу, илала пикруми аргъесра нушачиб чебси саби. Амма, МяхIяммадла ца пикри умутдешличил нуни аргъира: ВатIайс ва улкалис мардеш. Ну илизи сунела къуллукъличила бурахъес дугьаизурра.
— Пачалихъли дила бегIти ва хала бегIти даршули ва жагали хIербариб. Нушази белчIуди ва гIяхIси бяркъ касахъиб, хIянчиличил гIердуцира. ВатIайс къияндикибхIели, ил батахъес дявилизи керхни гьарил адамла чебла саби. Ил чебла ахъес вирниличи ва биркниличи нуни пахрубирулра. Илдигъунти сари офицерла гIямру.
Илис буили саби МяхIяммадли асилдешличил къуллукъбируси ва шабагъатуначи лайикьикибси.
БегIтачи Баркаллала кагъар бакIибсира, дила пикрили, ил багьандан саби. Ил кагъар газета бучIантасра гьалабихьес дигулра:
«ХIурматла ПатIимат Амирхановна ва ГIябдулкарим ХIябибович!
90 ибил танкабала дивизияла командованиели пахруличил хIушази балахъули саби, хIушала урши МяхIяммад ГIябдулкаримовичли дявила хасси балбуц бехIбихьибхIейчирад гъабзадешличил, урехиагарли ва къайгъиличил хъарарахъули сари дявилати масъулти.
Дивизияла командирла ва дила шайзибад хIушаб баркалла балахъулра илгъуна урши вяркънилис ва вирхулра челябкьлализибра ил ВатIа марси къакъбяхъли вирниличи.
ХIушаб гьарбизуни, чIумаси арадеш ва хъалибарглизиб талихI дулгулра.
ХIурматличил 90 ибил танкабала дивизияла командирла тылла шайчивси заместитель, Тылла начальник – гвардияла полковник Э.Эюбов».
2023 ибил дуслизив М.ГIябдулкаримов капитанна уличи лайикьикиб ва, нуни гьанбушиливан, сунечил барх бургъутала, сай валу-вирхутала ва шантала хIурматличи лайикьикиб. Гьайгьайрагу, МяхIяммадгъунти пергер бургъантала хIурматбарницун камси саби – илдигъунти гъубзначи пахрубирес чебси саби.
МяхIяммад жяв-жявли хасси балбуц чедибдешличил ахирличи бикили, сунела хъалибаргличил хIулкIули хIерирули дигулра. Илис хъулиб баракат, чIумаси арадеш ва талихI дулгулра. Арали ватаби хIу, дила игит унра.
ХIясайни ГIяппаев, Сагаси Вихъри
