Ишди бурхIназир Дахадаевла районна мер-мусаличир ризкьила сабухъуни дурчнила ва мицIираглис дугени хIядурдирнила баркьуди жигарчебли бетурхули саби. ЗяхIматчибани, аргъ-бархIила къулайси манзил пайдалабарили, авлахъличир шила хозяйствола хIянчи демжахъурли сари.

ДуцIрумла замана дирар дубурлантани арши иршути ва кьяркьти дугени хIядурдирути. ХIера, ялчнала гъайли ва машинабала тIамрани авлахъ чебсаргъахъили саби. Мура ва нег учидирхъули, ризкьили машинаби дирцIули зяхIматчиби сакIубли саби. Илкьяйдали дусла бухIнаб бегIлара паргъатагарси манзил сабаиб. Заб-марка дехIдихьайчи сабухъуни дучес хIяжатли биъниличила балулри шимала адамтани.

ГIяхIси къуллукъ гIеббуцили, дакIахъибти ризкьила сабухъра давлачебси бирар. Дахадаевланти гIяхIил бурсибиубти саби заманаличир ва ахъси качествола сабухъуни дурчес.

«Дахадаевла районна ванза бузахъанти Илдани хIядурдарибти мура ва нег мицIираг ункъли дихIес багьандан кумекли детарар. Ризкьила давлачерти сабухъуни дурчнира лебгIеб гIяхIси баркьуди саби. Шила хозяйствола хIянчи заманаличир хъараахъни мягIничебси саби. Гьамадли ахIенси илгъуна баркьудилизир зяхIматчибас сархибдешуни дулгехIе», — балахъули саби шила хозяйствола отделла хIянчизартани.

Районна шила хозяйствола отделла баянти хIясибли, СПК-бани ишбархIилис 3600 тонна мурала хIядурдарили сари, 535 гектарла чIябарличирадли 685 тонна негла, 840 тонна ризкьила сархили сари. Гьанналис авлахъличирти хIянчи демжурли сари ва гIуррара гIяхIти сархибдешуни дирахъниличи вирхес вирар.

Дахадаевла районна администрацияла пресс-служба