Край руркъуси ва миллатла литературала отделла учIуси заллизиб багьахънибала сягIят бетерхур, сабира Россияла писательтала Союзла член, даргала поэт Хадижат МяхIяммадовна ХIябибова 75 дус риънилис хасбарибси.
Балбуцличир ДГУ-ла филологияла факультетла студентунани, ДР-ла писательтала Союзла даргала секцияла руководитель Муса БяхIяммадовли, Дагъиста халкьла поэт Аминат ГIябдулманаповани бутIакьяндеш дариб.
Нуни «УркIи-рухIла урунжуни» бикIуси Х.ХIябибовала жузала выставка гьалабихьира.
Хадижат ХIябибова акIубси сари 1949 ибил дуслизир Хайдакьла районна Жавгъатла шилизир, ЧебяхIси ВатIа дергъла ветеран ХIябиб МяхIяммадовла ва мугIяллим ЦIибацI Ражабовала хъалибарглизир. Илини ДГУ-ла филологияла факультет ва КПСС-ла Дагъиста обкомла гьалабси марксизм-ленинизмла университет хъараахъур. Илала гIергъи, сари акIубси шила школализир урус мезла ва литературала мугIяллимли рузес рехIрихьиб. 1987 ибил дусличирад 1991 ибил дусличи бикайчи педагогунала устадеш ахъдурцуси Дагъиста институтлизир дарган мезла ва литературала методистли рузули калун. Шилизи чаррухъи, гIяхIцад дусмазир шила школализир мугIяллимла бузерилизи ахъиб. БусягIятла замана пенсияличир хъулир сари.
Нешли дучIути гардла далуйтани, хала нешли дурути хабуртани, буралабани рурсилизир литератураличи диги адикьур. Хадижат ХIябибова риштIахIейчирадли назмурта лукIес рехIрихьибсири. Илала назмурти «Гьалмагъдеш» журналлизир ва районна «Хайдакьла зяхIматчи» газетализир дурадулхъутири. ИшбархIира Х.ХIябибова назмурта лукIес, халкьла мухIлила пагьму бурчес, дурхIназир халкьла культураличи ва мезличи диги адилкьес даимриубли сари. Дарган мезли илала чумал жуз дурадухъун: «Кьанси гIебшнила бурхIни», «Хайдакьлантала мухIлила пагьму», «УркIи-рухIла урунжуни», «Мари», илкьяйдали мугIяллимтас хасдарибти методикала пособиебира.
М.БяхIяммадовли ва А.ГIябдулманаповани бурни хIясибли, Х.ХIябибовала произведениеби гIямрула пасихIдешли дицIибти сари. Илала уркIила умудеш ва чихъти адабдеш назмуртазир чедаэс вирар. Х.ХIябибовани сунела назмуртазиб ВатIан балтахъанти чебяхIбирули сари. Поэтла назмурти дучIусини, Дагъиста убла ва гьаннала тарихличи пахру хIебарес хIейрар.
Салимат ХIяжиева, ДР-ла Р.ХIямзатовла уличилси Миллатла библиотекала край руркъуси ва миллатла литературала отделла бекIлириубсигъуна библиотекарь
