ММА-ла мушлукья МяхIяммад Ибрагьимов Ибрагьим-ХIяжила хъалибарглизив акIубси сай. Илдала аслу-мина Лавашала районна Буртани-махьила шилизирад дехIдирхьути сари. БусягIятла замана биалли Ибрагьимовхъала хъалибарг Бабаюртла районна Хамаматюртлизиб хIербирули саби. Илала дудеш Ибрагьим-ХIяжи лацла уста сай, неш, Къистаман Пайзуллаевна — школализир дарган мезла мугIяллим сари.
МяхIяммадла халал узи Кьурбанра мушлукья сай. 2016 ибил дуслизив илала санигIятлашалси абз бетерхусири. ГIур илини сунела абзани дархькадатур ва цархIил санигIят чеббикIиб.
2008-ибил дуслизиб Хамаматюртла шилизиб шила дурхIнас хасбарибси спортзал абхьибсири. БегI гьалав сунела дудешли 9 дус виубси МяхIяммад спортзаллизи арукиб. Спортзаллизи ил дебали гъирачевли, иштяхIличил вашусири. Байхъала дусла гIергъи ил районна абзаначи вархьиб. Абзаначиб илини кIиибил мер сархиб. Шилизиб спортзал агархIелира, МяхIяммад тренировкабачи унра шилизи вашулри. Гьачамалра илини ца ити тенировкаби дархьдатурси ахIен, мурталра абзаначи чекайзурли хIядурвикIусири. Илини спортлизир цархIилти журабира ахтардидарибсири: бокс ва кикбоксинг. Амма МяхIяммадлис мушулвашнила жура гIяхIбизур. Камси заманалис илис тренировкаби датес чебуркъубсири, дурусси багьана лебни багьандан. Чедирти классуназив М.Ибрагьимов тренировкабачи чарулхъули сай ва цацали бирхIнила шайчирти декIар-декIарти абзаначи вашес ибси хьул алкIули саби.
М.Ибрагьимов шилизивад Ростов шагьарлизи учIес арякьунсири. ХIера, илабра жагьил адамли спорт лайхIебакIиб. МяхIяммадли илав грепплинглизиб хIялумцIес вехIихьиб. Ил дуслизиб Ростовла областьлизиб «чемпионат» бетерхур. Илав спортсмен чедиикиб ва «bjj»-ла (джиу-джитсу) ири сархиб.
«Ну бокслизив, греплинглизив абзикIухIели, университетла шайзивад Лебил Россияла гьар шайчибси каратэла абзличи вархьира, илаб яргаличилси цаибил мер сархира», — буриб спортсменни.
ГIур 2019-20-ибти дусмазиб Ростовла областьлизиб ММА-ла союзла абз бетурхули саби, иларра М.Ибрагьимовли бутIакьяндеш дирули сай. ИлхIели ил кIина чемпион ветаурсири.
Спортсмен югла шайчибси федеральный округлизи аркьули сай, амма илар касибти багьудлумачил чедииркули ахIен. Иличивли ил умутагар вирули ахIен, гьатIира чедиикес ибси гъира алкIули саби.
ГIергъиси дус МяхIяммад Ибрагьимов студентуни-ургабси Москвализибси Россияла чемпионатла абзличи аркьули сай. Ил абзлизиб МяхIяммадлис спортла мастерла кандидатла у бедибсири. Нушала спортсмен иличив тIашилзули ахIен ва панкратион абзлизив узес вехIирхьули сай. Илабра цаибси мер сархули сай.
М.Ибрагьимовли детурхути лерилра абзаназир бутIакьяндеш дирулри ва цаибти мерани сархулри.
2024 ибил дусла майла 26-личив нушала спортсмен профессиональный абзлизир бутIакьяндеш дарес Москвализи вякьунсири. Къиянси гьуни ахъили, М.Ибрагьимовли гъудурти жураби хIясибли цацали бирхIнилизир (смешанные единоборства) чедибдеш сархиб. Илала ил бегI гьалабси профессиональный абз сабри. КIел баз дикибхIели, МяхIяммад АСА организациялизи абзикIес аркьуси сай. Илаб кIиибил профессиональный абз бетурхуси саби. Нуша дирхулра, ил абзли М.Ибрагьимовлис чедибдеш лебхниличи.
Макьала ахирличи биркахъули, МяхIяммад Ибрагьимовлизи бехIбирхьути спортсментас насихIятла дугьби дурахъес тиладибирулра.
— «БегI гьалаб, илдази нуни уркIичеббиахъес, бехIбуцибси секIал ахирличи биркахъес маслигIятбирулра. Гьарил спортсменна уркIилизиб чедибдеш сархес ибси кьас биэс гIягIниси саби. ИлхIели гьар секIал ункъли детурхар», — викIи нушала белкIла игит.
Нушанира илис спортлизир ва гIямрулизир дахъал сархибдешуни дулгулра!
Нуржагьан Ибрагьимова
