Дубурлантани шилизибти жагьилти лебилра шанталайзи буйгIули бирар, сенахIенну гьарил адамла вайра гIяхIра илдани чучи чесили дирар ва гьести гIямрула адамталара илдани чула бегIталаван хIурматбиру. Абзурли ВатIайзибси агира илгъуна саби. КъияндикибхIели жагьилти бирар бегI гьалаб улкала хъархIерагардеш батахъес дурабулхъути. ХIера, илкьяйдали миллатуначи яра динничи хIерхIеили, бургъанти ца хъалибарглизибадти узбиван шанда баруличи шурбухъи, ишхIелла манзиллизибра фашизмаличи къаршили бургъули саби. ГIяхIгъубзнани ВатIайс къуллукъбирухIели, «миллатра» ца саби илдала – «россиялан».

БегI гьалаб наб тамашабизурсири Кубачивадси Анатолий Босулаев ибси у аргъибхIели. Гьаннала жагьилтани уми сегъунти-дигара дургули сари чула дурхIнас, амма фамилия…? ХIера, сегъуна кьисмат буилил игит ургъанна.

Анатолий Босулаев дявила къуллукъличил бархбасунси санигIят касес хьуликIуси ахIенри. Ил халаваибси сай Дахадаевла районна Кубачила шилизив. Ил виштIахIейчивадли адуцалачевси, гIякьлучевси ва ункъли учIуси вири.

Илини 2018 ибил дуслизир ункъли имтихIян дедили, школализиб белчIуди хъараахъур ва ДГУ-ла историяла факультетлизи керхур.

Анатолийла неш ил виштIали левалли ребкIибсири, дудешлис ва цархIилти гъамтас ил хIяжатли ахIенри. Ил сунела виштIал узичил варх дурхIнала Юртлизи ведибсири. БегIти агарти, къиянти гIямрулизибад илди берцахъиб Ибрагьимова ПатIимат ХIяжигIяхIмадовнани. Илини Толяра илала узира, илдала кьайгим ретаурли, Кубачи киб ва илди гьарра шайчибад гIеббуциб. Урус уршбани жявли гIярбукIан мез, гIядатуни дяркъур, чедетаахъили дубурлантала баркь-бац гIерасиб. ВахъхIиагарли ПатIиматли дурхIнала Юртлизивад цагьатIи урши киб. Толяни ва узини ил уршира дигиличил кьабулвариб.

Цабалги ва уржили хIеркабирулри узби ва белчIудилизибра бяркълизибра цархIилтас гIибратли бетаурлири.

ПатIиматлис, гьайгьайрагу, декIси бетахърили бетаур Толя алхни. Илини халаси децIличил иличила баянти дурули рирар: «Ил нуни виштIахIейчивад айкьурси сай. Ил ДГУ-лизив учIули калун. 2020-ибил дуслизив ил гIярмиялизиб къуллукъбарес живарибсири. Мотострелковый полклизиб къуллукъбирули калунсири. Илис ВатIайс къуллукъбирнила санигIят гIяхIбизур ва вягIда къулбасбарили, илав калунсири.

2022 ибил дусла мартличиб мотострелковый полк Украинализи арбукибсири ва дила урши дявила майдайчив вагьарвиубсири. Толя кьяшмазивад вяхъибсири. ЦархIилти дяхъурбира камли ахIенри илала, Санкт-Петербурглизив ва  Калининградлизив больницабазив калунсири. 2022 ибил дусла октябрьла цаличив, отпускличи шилизи вакIибсири. Илизи тиладирикIаси арадеш къулайли ахIенну, хъулив кален или. Амма ил дила гъайличи лехIхIейзур, сунела дявила юлдашуначи чариэс гьалакикIулри. Илала виштIал узи вархли Толяни дурути хабуртачи лехIизурли гIергъи, СВО-лизир бутIакьяндеш дарес укьес хьулухъун. ВатIан багьандан нура ургъес аркьяс викIусири ил.

2023 ибил дусла мартла 21-личиб набзи Толя алхниличила багьахъурхIели, МяхIячкъалализи дила уршбачи рякьунра. Кубачив урши хIяривихьира. Ил бегIла гIергъиси гьунчи гьунивватес бахъал адамти бакIиб. Районна ва шила администрацияла хIянчизарти бархли бакIибтири. Илдани биубсигъуна кумекра гIеббаахъиб, СВО-личил дархдасунти далдуцуначи алхунси ургъанна неш сарливан, ну мурталра жирирулра. Улкала оборонала Министерстволира кумекбариб. ГIурра виштIаси уршира Украинализи укьес дигулра викIулри. Дила тилади илини чесиб ва гьанна МяхIячкъалализив, машинаби далдирули, узули сай. Амма Анатолийли наб халаси дунъя бацIбиахъуб. Ил уркIилавад арвашули ахIен. Ил кахси бетахъри саби нешлис», — бурули сари ПатIиматли.

Анатолий Дмитриевич Босулаев вебкIили гIергъи, Гъабзадешла орденничил ва «Гъабзадеш багьандан» медальличил шабагъатлаварибсири.

Игитван алхунси Анатолийли гъабзадешла чебяхIси хабар гIелаб батур, ВатIайс мардешла ва чIумадешла мисалли ветаур. ЧебяхIси ВатIа дергълизиб сархибси Чедибдеш 78 дус биъниличил бархбасахъи 2023 ибил дусла майла 8-личиб балбуц дурабуркIухIели, СВО-лизир бутIакьяндеш дирули алхунти районнизибадти бургъантала хIурматлис хъумхIертнила уркьли абхьибтири. Кубачибра Анатолий Босулаевлис хасбарибси уркьули гьаргбарибсири. Илкьяйдали Анатолий Босулаевла у даимлис наслубала уркIбазиб кавлан.

ГIярбукIан игит Анатолийлис назмула ишди тугъира пешкешдирулра:

Дунъя жагабиахъес

Аллагьли акIахъубси,

Кубачила устнани

Сипат варакьдарибси.

 

Ванзаличиб даршудеш

Калахъес хъя барибси,

Дявилизир игитдеш

Сайри дакIударибси.

 

Дудешла убзаличиб

УркIи дебшлабарибси,

Нешла малхIямдешличил

ХIяя умударибси.

 

ГIярбукIла шила дайлаб

Мургьили белкIун къала,

ГIяйибри гъятIкабиэс

Бурямтауб манзилла.

 

Усал гъубзна айкьурти

Дергъла цIала дайлизир,

Жагьил жайранна гIямру

ГIяйибри къябаахъес.

 

ХIела талихIла урми —

Узби Расул ва Муслим

Батурри бахъ хIясратли,

ДецIлизиб берцIахъили.

 

АхIерси нешла уркIи

Кахси бяхъли бигахъуб,

Дудешла дагьриличи

Балагьли асарбариб.

 

Тарихла хьулчни дяркъес

Сайригу кьаслизивси,

ЧеалкIуси наслулис

Дагьри дедес дигуси.

 

Гьанна хIури тарихла

БяхIяни сагадиран,

Къяяни гIяхIгъубзнала

Умутли чедирцIахъан.

 

Руркъу хIечила халкьли

Баянти игитдешла,

Байрахъ сайрину чихъси

ХIу бебкIаагардешла.

ПатIимат Кьурбанова