ДР-ла культурала министр Зарема Бутаевани Дахадаевла районнизи бузерила архIя дураберкIиб.
Министрли Уркухълизибси районна культурала Юрт, Совет хIукуматла заманаличибадал машгьурси ГIярбукIла художестволашалси комбинат хIердариб, илкьяйдали районнизирти урга даршдусмала памятникуни — ГIярбукIла кIялгIя ва Кьара-Кьурейш чедаиб.
ИшбархIи республикала БекI Сергей Меликовла икьалаличил ГIярбукIла машгьурси предприятие ибкьти аги-кьяйдализибад дурабулхъули ва гьалабяхI башули саби. ГIярбукIла устни жявхIелла мургьи-арцла искусство мяхIкамбирнилизиб, ил машгьурбирнилизиб, жагадеш алкIахънила хъумкартурти тяхIурти «мицIирдирнилизиб» бузули чебиур. Илдани гIядатлати ва ишхIелла жураби пайдаладарили, саби-бегIти матяхIра далкьарахъули сари. Жагати ваяхIли мургьи-арцла базарличибра белгиси мер бурцули, республикализиб башути туристунала чучи пикри битIикIули саби.
ГIярбукIла художестволашалси комбинатлизир илкьяйдали мургьила гьимиртачил някьишдирнила жявхIелла искусствора жигарчебли гьалабяхI башахъес хIяжатти лерилра шуртIри лер. Ил бяхIчибизла кумекличил сабри ГIярбукIла устни-хьунул адамти гьар-мерличиб машгьурбиубти. ХIера, илди лерилра хIянчиличил тянишриуб ДР-ла культурала министр Зарема Бутаевара.
Бузерила архIяла дазурбазир, ил илкьяйдали ГIярбукIла къуббаличира рякьун. Ил Зирехгеранна манзиллизиб тIашбатурси тамашала объект саби. Иличил дархдасунти декIар-декIарти бакьалабира лер. Къараулбируси къубба яра «Ахъайла кIялгIя» или сунес ируси мер гьалаб дявила кьукьяла юрт бирусири. Иличибад ГIярбукIла шила пергер тIабигIят гьаргбирусири. Гьанна ил халкьани-ургабси печатьла графикала «Кубачила къубба» бикIуси биеннале дурабуркIуси юртли бетаурли саби. Ишдусла дуцIрумлизиб ил балбуц авйнайс бетурхар.
ДР-ла культурала министр кьурайшитунала жявхIелла ши – Кьара-Кьурейшлизира рякьун. Ургарти даршдусмала гъятIбиълумала ургар X–XI-ибти даршдусмала саркофагуначилти гIярабла хIябри, XI ибил даршдусла ЖумягI-мижит ва XV–XIX-ибти даршдусмала уцмийтала хIябрачилси мавзолей чедаэс вирар.
ИшбархIи регионна кьадрила культурала букьурла объект «Дагъиста ши» бикIуси этнографияла комплексла – Музей заповедникла хIерудилиуб саби, ил музейла экскурсияби дурадуркIуси программализира каберхахъурли.
