Лавашала районна Сулайбакентла шилизиб хIябдарш мерличилси школа тIашбалтнила хIянчи ахтардидариб «Цаси Россия» партияла мерличибси отделениела исполнительный секретарь ХIясан Ибрагьимовли, районна депутатунала собраниела председательла заместитель СултIан ХIяжимяхIяммадовли ва Хъарлябхъула шила бекI Сагид ГIялиевли.
«ИшбархIилис гIяхIцад хIянчи дурадеркIес имканбакIили саби, заманаличир илди хъарарахъниличи бирхаудира леб. Мякьлаб бусягIятла замана бузуси школа лебнира пикрилизи касили, сагаси школа лушнила хIянчи детурхути мер-муса алавдарибти сари, чилра бузерилис бекIмаххIевхъахъес багьандан», — багьахъур ХI.Ибрагьимовли.
Багьудила учреждение тIашбатес пикрибарибси саби школабазир хIябал смена хIедиахъес ибси кьасличил. Сагаси школа лушнила хIянчи ириъ дехIдихьибтири, илди ишдусла декабрь базлис ахирличи дикахъес пикри леб.
Лавашала районна администрацияла пресс-служба
