ВатIайс къияндикибхIели шан­да баруван ил берцахъес гьа­лабилзути, чучи къакъ­бя­­хъес­ти гIяхIгъубзни Дагъистайзиб ба­хъал са­би. Илдигъунтазивад ца сай Явнус Рабазанович Жамбалаевра – ДР-ла Дя­ви­ла комиссариатла жагьилти дя­­вила къуллукъличи жибирнила ва хIя­дур­бирнила шайчибси отделла начальникла заместитель, офицер, подполковник, суненира 17 дус декIар-декIарти дявила къуллукъуни тамандирули калунси. Илала дявила къул­лукъличибси бузерила гьуни гьаргбирути макьалаби нушала газетала бяхIяназир чуйнара дурадухъун, амма иличила чуйна белкIалра, черяхIти, гапла дугьбачи лайикьси адам сай Явнус Ра­базанович. Илдигъунти кабизалачебти, чучи пахрубарести, жагьилтас гIибратли биэсти гIяхIгъубзначил гьаман гьуни­баъ­ниби, ихтилатуни дурадуркIнили иш­хIелла наслуличира манпагIятси асар хIе­барили кахIевлан.

ХIера, иш гьакIлизибра Явнус Рабазановичличил жагьилти дявила къуллукъличи жибирнила ва хIядурбирнила шайчибси хIяракатличила ихтилат дура­беркIира. ВатIайс къуллукъ­бар­никIун гьарил гражданинна чебла саби.

Биографияла баянти:

Я.Р.Жамбалаев Сергокъалала районна Къянасирагьила шилизив, 1964 ибил дуслизив февральла 15-личив акIубси сай. Къянасирагьила урга даражала школализир 8 класс делчIи гIергъи, ил МяхIячкъалала СПТУ-14-лизи керхурсири. 1982 ибил дуслизиб училище таманаибхIели, Явнус Рабазанович «СМУ-8» бикIуси хъулри лушнила ва далдирнила управлениелизив узес вехIихьиб. Иличивли виаркахIейили, Я.Р.Жамбалаев 1982 ибил дуслизив Одессализибси чебяхIси даражала артиллерийский командный училищелизи керхурсири ва 1987 ибил дуслизиб ил хъараахъурсири.

Я.Р.Жамбалаев, белчIуди хъараахъурхIели, декIар-декIарти мераначив дявила къуллукъуни тамандирули калун.

2000-ибил дуслизив ДГУ-ла дявила кафедрала начальникла заместительла, белчIудила шайчивси начальникла къуллукъличи катурсири.

2002-ибил дуслизиб ДГУ-ла юридический факультет таманаиб. 2005-ибил дусличивад ДГУ-ла дявила кафедрала начальник ветаур. Ил дусла октябрь базлизиб РФ-ла МВД-ла Волгоградла академиялизиб «Институт особого государственно-правового режима Рос­сийской Федерации» бикIуси тема хIясибли кандидатдешла диссертация защититьбариб.

Я.Р.Жамбалаев дявила авдехI анцIбукьуназир бутIакьяндеш дирули калун: Афганис­тайзир, Таджикистайзир, Дагъис­тайзир, Чечняла Республикализир.

Явнус Рабазанович «ХIунтIена Зубари» орденничил, «Арцла къанч» орденничил ва дахъал цархIилти орденти-медальтачил шабагъатлаварибси сай, илдала лугIилизив — Крым чарбарнилис «Патриот России» бикIуси медальличилра.

Жагьилтас бяркъ бедлугнила шайчив хIурматла насихIятчи сай. 2018 ибил дуслизиб, жагьилти дявила къуллукъличи хIядурбирнила шайчибси бузери багьандан, илизи РФ-ла Президентли баркалла багьахъурсири.

2009-ибил дусличивад 2020-ибил дусличи бикайчи Явнус Рабазановичли ДР-ла Дявила комиссариатла жагьилти дявила къуллукъличи жибирнила ва хIядурбирнила шайчибси отделла начальникла къуллукъ бузахъули калун. Гьанна биалли, Я.Р.Жам­ба­лаев баягъи отделла начальникла заместительла къуллукъличив сай.

— Явнус Рабазанович, ишдусла апрельла цаличибад жагьилти гIярмиялизи жибирнила ва хIядурбирнила шайчибси хIяракат бехIбихьили саби, сецадхIи бухъян­билтIусив ил? Нушани балуливан, ишдусла хIебличибад гIярмиялизи жибирутала дусми дарсдирниличила закон цIакьлизи каберхурли саби. ХIукуматли кадизахъурти тIалабуни хIясибли, нушала республикализибад гIярмиялизи чум адам бархьес гIягIнити?

— 1998 ибил дусла мартла 28-личибадси «Дявила чеблаличила ва дявила къуллукъличила» бикIуси (№53 ибил-ФЗ) Федерацияла закон ва РФ-ла Президентла 2024 ибил дусла мартла 31-личибадси №222 ибил ХIукму хIясибли, 2006-1994-ибти дусмала бухIнаб акIубти жагьилти гIярмиялизи хIеблизиб жибирни, апрельличиб бехIбихьили, июльла 15-личи бикайчи бухъянбилтIан. Белгиси лугIилашал Дагъистан Республикалис кадизахъурти тIалабуни хIясибли, 2024 ибил дусла апрельличибад июльличи бикайчи гIярмиялизи 3800 адам бархьес гIягIнити саби. Бурес чебиркур, нушала гIярмицуни илдала лугIилизиб Россияла ФСБ-ла дазу балтахъантала (пограничникунала) гIяскуртазира бурхьути саби, ил бегI гьалаб саби бируси.

Илкьяйдали ишдусла апрельла бехIбихьудличирад медициналашалти комиссиябира чула бузерилизи ахъили сари. Гьанналис гьалар нушани жагьилти дявила  къуллукъличи жибарайчи дарес хIя­жатти лерилра хIядурдешла далдуцуни дурадеркIилра.

—  Жагьилти гIярмиялизи жибирнила шайчибси ишхIелла хIяракат селичибли де­кIар­булхъулив гьаларти дусмазирад?

—  Гьайгьайрагу, ишдусла хIеблизиб жа­гьилти гIярмиялизи жибирнила хIя­ра­кат белгити хасдешуначил декIар­бул­хъули саби.

2024 ибил дусла январьла 1-личибад гIярмиялизи жибарес хIяжатти адамтала дусми 30 дусличи бикайчи ахъдарили сари. Дявила къуллукъличи жибирути 27 дус биубтачила гъайвикIалли, дявилашалси хIисаблизи касибти ва 2024 ибил дусла январьла 1-личи бикайчи 27 дус биубти гIярмиялизи арканти, кадизахъурти низам-кьяйда хIясибли, дявила комиссариатунани гIярмиялизи жибирантала дявилашалси хIисаблизибад убкасиб ва запаслизи бедиб. ИлхIелира 2024 ибил дуслизиб 27 дус биубти Россияла Федерацияла гражданинтасра ВатIан балтахънила шайчибси конституциялашалси чебла ахъес имканбакIиб.

30 дусличи абикайчи гIярмиялизи жибарес хIяжатти гражданинтази халбирути саби, сабира 27 дус биубли гIергъи 2024 ибил дуслизиб дявилашалси хIисаблизи касибти (гIядатлибиубливан, илди саби РФ-ла гражданиндеш касибти, дурала улкализиб 6 базличиб имцIали калунти ва чарбухъунти адамти).

—  Цаибилгъуна, гIярмиялизи жибарибти жагьилтази Россияла Федерацияла законодательство хIясибли, чус чебаахъибси заманаличиб дявила комиссариатунази дугьабилзахъес бурес дигулра. Илкьяйдали биралли, гIярмиялизи жибирниличил дархдасунти лерилра далдуцуни заманаличир бекIдарес гьамадли бирар, илдала лугIилизиб медициналашалси цахIнабси ахтарди дураберкIесра.

— ВатIайс къуллукъбарахъес жибирути жагьилтас имцIаливан сегъунти гIяскуртазиб къуллукъбарес дигулив, илдазиб ихтияр лебсив чус дигуси мер яра гIяскурти декIардарес?

— Белгити гIяскуртазиб къуллукъбарес дигути жагьилтази хаслира заманаличиб мерличирти дявила комиссариатунази дугьабилзахъес маслигIятбирулра. ГIярмиялизи жибирантала комиссияли къуллукъличи бурхьути жагьилтала пикри, хьулани хIерудила дурар далтути ахIен. Амма аргъахъес чебиркур, белгиси журала гIяскуртази илди бурхьни гIяхIцад шуртIразибад дигахъуси саби. Цаибилгъуна, гIярмиялизи жибирантала комиссияли сегъунти гIяскуртазиб къуллукъбиранти имцIали хIяжатлил хIисаблизи кайсуси саби. КIиибилгъуна, гIярмиялизи живируси жагьил адам сунела арадешла, белчIудила даража, белгиси санигIятлашалси хIядурдеш, хIял-тIабигIятла  хасиятуни хIясибли, белгити гIяскуртазиб къуллукъбарес вирнила имканти хIисаблизи кайсути сари. ГьатIира аргъахъили буралли, белгиси журала гIяскуртала, илдала гьаларти мурадуни ирзнила шайчир чучи хасти тIалабунира дирути сари.

— ГIярмиялизи жибарибти жагьилтани вягIда хIясибли къуллукъбарни чеб­бикIес бирару?

— ГIе, гIярмиялизи аркантани чучи ба­кIибси дявиласи жила мерлаб вягIда хIя­сибли къуллукъбарни чеббикIес бирар. Амма ишар цацадехI хасдешуни хIи­саблизи касес чебиркур. «Дявила чеб­лаличила ва дявила къуллукъличи­ла» бикIуси №53 ибил ФЗ-личил дархдасунти. «Дявила къуллукъличи живарес хIяжатси гражданин (илизибад акьубатурти хIисаблизи кахIесили), су­ненира дявила комиссариатлизибад дявила къуллукъличи живируси повестка кахIесибси, кIел жумягIла ухIнав Федеральный законни сунес кабизахъурси замана чесабаайчи, дявила комиссариатлизи гьаввакIес гIягIниси сай дявилашалси хIисаблизи каснила баянти цугдуцес багьандан». СенахIенну сагаси закон хIясибли, сунес гIярмиялизи живируси повестка бакIибкъира, дявила комиссариатлизи хIевакIибси гражданинничи гIякIа чебирхьуси саби. Илкьяйдали вягIда хIясибли къуллукъбарес дигусилисра сунела хьулличила дявила комиссариатлизи вякьи, багьахъес чебиркур. ЦархIилван, 10 азир къурушличибад 30 азирличи бикайчи гIякIа чебирхьуси саби.

— ГIярмиялизи жибирути жагьилти дявила хасси балбуц дурабуркIути мер-мусаличи къуллукъбарахъес бурхьутив? (Иш суал бегIтала уркIби ряхIятдиахъес багьандан хьарбиулра)

— ВатIайс къуллукъбарахъес жибарибти жагьилти дявила хасси балбуцлизир бутIакьяндеш дарахъес арбикути ахIен. Илкьяйдали илди сагати регионтазира бурхьути ахIен (Донецк, Луганск ва цархIилти). 2023 ибил дусла гIебшнилизирра ДР-ла дявила комиссариатла бархьаначиси линиялизи илдигъунти суалтачил дахъал зянкъ дакIибтири. Лебилра кьакьабикIутири чула дурхIни дявила хасси балбуцлизир бутIакьяндеш дарахъес арку или. Амма гIуррара бурулра, гIярмицуначи дявила балбуц къячбилкуси ахIен. ДР-ла дявила комиссариатла бархьаначиси линия апрельла 13-личибад бузули саби. Се-биалра багьес дигусини гIергъити номерти хIясибли зянкъдяхъили хьарбаэс вирар: ­8-872-267-88-86, ­8-872-268-16-07.

— Явнус Рабазанович, хIела дявиласи къуллукъ чинабад бехIбихьибсирив? ХIела пикрили, гъабзадешла ва цIакьла лишантази сегъунти къиликъуни халдарес вирара?

— Дила дявила къуллукъличибси гьуни Афганистайзиб лейтенантли виру­хIели бехIбихьибсири, илис гIергъи, Тад­жикистайзиб, Чечнялизиб… иличила гьанбушибсири. Гъабзадешла мисалти кьяйдали, нушала ВатIан гъармукабазибад балтахъули бургъути мурул адамти гьанбушес вирар, чулира дявила хасси балбуцлизир бутIакьяндеш дирули, дявилати хъарбаркьуни детурхахъути. Дила узила урши Исламлира СВО-лизир бутIакьяндеш дирули калун, ил Гъабзадешла орденничил шабагъатлавариб.

— ИшхIелла гIярмиялизи жибирантази се бурес вируда?

— ГIярмиялизи жибарибти жагьилтас биалли, ВатIайс марси, гIяхIси къуллукъбарни булгулра. ВатIайс къуллукълис кадизахъурти 12 базла бухIнаб кабизалачердеш чедаахъили, чули дяркъес гIягIнити дявила техника, гIягIниахълумира гIяхIил дяркъурли, ярагъличил пайдалабикIесра бурсибиубли, чула бегIтачи хIулкIули чарбухъаб.

П.Сулайбанова