Кубачила шилизиб 500 миллион къуруш харждарибси туркомплекс тIашбалтули саби. Дагъиста ЦУР-ла «бархьаначиси эфирла» дазурбазиб Дахадаевла районна бекI МяхIяммад ГIябдулкьадировлира иличила  буриб.

«БусягIятла замана Кубачила шилизиб вегIдешла инвесторли туризмала комплекс белши таманбирули саби. Илизи декIар-декIарти даражала 35  номер, ресторан, бассейн, сауна, хIямам, конференц-зал кадурхули сари, илкьяйдали 15 коттеджра, сунезирра 4 бамсри ахъес хасдарибти хъали ва гIяхIли кьабулбирути хъулри лерти. Балхунничибад жагаси чебаъ гьаргбирули саби. Баягъи комплекс тIашбатес багьандан 500 миллион къуруш харждиуб. Гъамливан, хIеблизиб ил абхьили бирар», — викIи М.ГIябдулкьадиров.

Илала гъай хIясибли, гIергъиси замана районнизиб туризмала кьяли гьалабяхI башахъниличи халаси пикри бяхIчииули саби.

«Илала дурабад, ИцIарила шилизибра илгъуна туризмала проект бетерхахъес хьул леб, сунесра 200 миллион къуруш харждарили. Илар урцуйзирад дарибти гIяхIлала хъулри,  Кавказла ва Европала берклуми хIядурдируси ресторан, 40 мерла (номер) 4 зубариличилси гIяхIли кьабулбируси юрт (гостиница), 80 мерличилси дурхIнала лагерь, дурхIнас ва халатас хасбарибси спортла майдан дарес кьас леб», — буриб муниципалитетла бекIли.

Кубачи (ургарти даршдусмала Зирехгеран) – Дагъистайзиб гIур сабигъуна агарси ши саби, сабира халкьла художестволати ваяхI дирути устначил, илдани дарибти мургьи-арцла гIягIниахълумачил машгьурбиубси.