Зубайруева ПатIимат Зубайруевна акIубси сари  Ахъушала шилизир, хIурматла хъалибарглизир.

ПатIиматли сунела гIямрула вархкья  МяхIяммадхIяжичил барх гехIел урши-рурси абикьур.

ГIябдулвагьабхъала МяхIяммадхIяжи бунагь-хатIа урдуцаб сунела, някъла хIянчила уста сайри. Ил  чебетаахъили хIянчи бируси, бузери дигахъуси адам сайри.

Илкьяйдали хIялалли хIянчи бирули, тукейзир рузули  калун ПатIиматра. Сари хIеррируси мер-мусаличир, махьурбазир илис — тукенчи ПатIимат бикIути саби. СенахIенну Шулайчиб, ил Совет хIукуматла  манзиллизир, хIедалтули хьалли, тукен абхьес бажардирикибсири. Илаб хIербирути адамтасра, алавчарти махьурбала халкьлисра халаси гIяхIдеш сабри мякьлаб тукен лебни.

ПатIимат гIяхIси, черетаибси, малхIямси  адам  сари. Илини дигалли халатачил, дигалли биштIатачил гъай дургу.

ПатIиматла  хIябал рурсира,  шел  уршира  лебтири. Амма ца рурси  жявли гIямрулизирад  аррякьун. Илини гехIелра урши-рурси гIямрула дякьличи дураиб.

ПатIиматла рузи Сакинатлира, бунагь-хатIа урдуцаб сунела, гехIел урши-рурси абикьуртири. Илдала узби ГIиса (сунела бунагь-хатIа урдуцаб) ва Шамил Ахъушала шилизиб ва районна бухIнабцунра ахIенну, лебилра республикализибра халаси хIурмат сархибти адамти саби.  Жагали чула  хъалибаргунира бекIдарили, дурхIнира абикьурли, илдас гIяхIси бяркъра бедили, чебяхIси даражала багьудира касахъили, илди гIямрула бархьси дякьличира дураибти.

Гьаннала  гIергъира чула дурхIнани ва  илдачибад  акIубтани разибирули хIербиэс  кьадарбиаб чус.

С.ГIябдуллаева