Ишди бурхIназир Уркарахъибси «Дахадаев – арена» стадионнизир 1999 ибил дуслизир Дагъистайзи духIнадерхурти къачагъунала кьукьни дарбадягъиндарибхIейчирадли 20 дус дикнилис хасдарибти футболла абзани дурадеркIиб.

Ил балбуцлизир бутIакьяндеш дариб районна бекI Ж.ГIяма­ров­ли, илала заместительти ГI.МяхIяммадовли ва ГI.Жамаловли, муниципалитетла учреждениебалара руководительтани.
Булбуцла замана, гIядлу-зегъа гIердуциб ОМВД-ла хIянчизар­та­ни. Стадионничиб медикунала дежурная бригадара лебри, хIяжатдеш акIубхIели къалабаси медициналашалси кумек гIеббаахъес багьандан бакIили.
Абзани ибхьухIели, муниципалитетла бекIли 1999 ибти дусмазир кадикибти анцIбукьуначила гьанбушиб: «1999 ибил дус­ла августла 7-личиб Дагъистайзи къачагъунала кьукьни духIна­дер­хуртири. Итди къиянти бурхIназир Дагъиста халкьаначи хасти патриотизмала, гъабзадешла, кабизалачебдешла, залумдешла, ВатIан багьандан жан кьурбандарес хIядурдешла къиликъуни дакIударибтири дубурлантани».
Илкьяйдали илав гъайухъун итхIели кадикибти дявила анцIбукьуназир бутIакьяндеш дарибси районна бекIла заместитель ГI.МяхIяммадов. Илини бурни хIясибли, Дагъиста халкьли чула ВатIайчи диги дакIударибтири, виштIал-халал хIеили, гъабзадешличил бургъули, качагъуни тIутIубарибтири.
ГIур цалабикибтала гьалар чула гьунарти чедаахъес жагьил каратистуни дурабухъун.
Абзанала дазурбазир 7 матч дурадеркIиб. Илдала баянти хIясибли, муниципалитетла командализи гIяхIтигъунти футболистуни чеббикIиб ва илдас хасдарибти спортла формаби дедиб.
Балбуцла ахирличир Уркухъла ва Шаласила командаби-ургар финалла хIязани дурадеркIиб. Ил бархIи Шаласилизибадти спортсменти имцIали хIядурбиубтили уббухъун.