Чи сейкIалра, дургъби адил­кьу­та­­чиб убяхIти адамти лебти ахIен. Илдас адамти саби ви­кIесра гьамадли ахIен. Ишцад гьалабяхI арбякьунси ва даршули хIердиэс лерилра улк­нала имканти лерси дунъяличи дургъбала цIабикьес хьулбухъунтала, мар­­лира, бекIла мехIе дерхIибти сари. Ну­шала улка чисалра диргалабулхъуси ахIен. Амма илала паргъатдеш буахъес ди­гути камбирули ахIен. Гьанна се ди­гули НАТО-ла улкнас нушазибадли? Ну­ша­чи дявличил вакIибсилис нушала ул­ка­лантани кIантIидеш чехIедиахъу. Ярагъ­личил бакIибти ярагълизибад улхни хIе­балути нажасуни саби нушала дурхъаси ван­за ганзбарес хьулбухъунти. ВатIа хъар­хIерагардеш датахъес дура­бу­хъунти рос­сияланти-ургаб да­гъис­танлантира камли ахIен. Илдани игитти ва гIяхIгъабзадешла бар­кьудлуми дура­дуркI­ни­личила даим баянтира иргъулра нушани. Сепайда, гIязиз жан кьурбандирутира камли ахIен кьадин.

БегIла къугъати гIямруличибти нартани дергълизи бурхьули кьакьадикIути нушачи рах-магли бургъанти делхълизи кабухъи касибти видеобира диули сари. Бархьаначи бурасли, илдачи хIеррикIесра дигулра ва хIулби черасес тяхIярра агара илди дубурла чIакнала къугъати чарх-бекIличирад. Амма хIулбазирад гердикIути нургъбира тIашаэс рирули ахIенра кьадин. Агь, сунела вегIебш, илди нартани дергълизи бархьесира замана бакIахъибгу нажасунани. ИлдикIун чула ва чула зилантала мукърачиб булхъес, шадли гIямру деркIес хьулбикIули хIербирути саби. ВегIла ВатIан жибикIалли, селичилра хIерхIеили, илди гIяхIгъубзни ил батахъес цабиубли дурабулхъулигу. Илдала хала бегIтанира усалдеш дарибти ахIенри. Илди бургъантазирра дунъяличиб бегIлара хабардерхурти игитунала хIи дургъули сари. Чула рузис батарти, лебилра черикIлали чеббикIибтиван жагатира сабигу илди. Илдала къугъати шикьатIай ва разити дяхI-сипатли нушази балахъули саби игитсун бургъули вайберхунира тIутIу-кьякьябарили, чедибдешличил нушачи чарбухъес хIядурли биъниличила.
Ишгъуна къиянси манзиллизир адам­та­ла уркIби хIили кIантIдикIухIели, илди гьарли-марти къарчигъабани ну­ша ур­кIи­чердирулра, илдала къугъати уркI­ба­ла гьав­ли декIти пикруми гьарахъдиркахъули сари.
Чина лехIизаллира, телефонтазирти гъай дучIаллира, цауркIли лебилра гIялам бяхIчикабикили, ЧевяхIсилизи булгули саби илди иш дунъяличир нушаб бегIлара дурхъати жагьил жайрунтала жан балагьлизирадли дерцахъа или, ара-сагъли чула нешаначи, рузбачи, дурхIначи гIямрула гьалмагъуначи, гелешмешуначи, чучи хIерти гIялам халкьличи чарбухъахъес багьандан. Чарбухъаб чула уркIбиван къугъали, чула хьуланиван шалали. Украинала ванзаличибра булхъулицун бамсесли биаб. Илдачи дяхIчииути ярагъра сигли дуцаб, илди някъбази дурцанти душмантира чIичIлумала агъули белкъаб, бахъ урхIла давла-масли белкъес хIебирулину.
ХIуша разили чедибдешличил чарду­хъун­­хIели, хIушачи сабурагарли хIертира бул­­хъесил замана бакIаб! Дулхъеная, хIу­ша­ла тазати чурхрани дунъя мерсливан гар­дарбаресли, хIушала сахъси хIера­на­зи­бад вайнукьаби вацниван гьаббулхъесли!