Ишди бурхIназиб Гьал­­магъдешла Юрт­лизиб халкьани-ургабси динна гIя­лим­тала конференция бе­тер­хур.
Илизир бутIакьяндеш да­риб Россияла регионтала муф­тийтани, пачалихъла орган­тала хIянчизартани, динна, политикала ва жамигIятла хIяракатчибани ва гIяхIлани.

Гьаланачи регионтазибад бакIибти муфтийтала бутIа­кьян­­дешличил Дагъистанна бекI­лидиубти вузаназир кон­фе­­ренцияби дурадеркIиб. ГIур лебилра гIяхIли МяхIяч­къалала бекIлибиубси Жу­мягI­ла мижитлизи баиб ва хIясилти каэс Гьалмагъдешла Юртлизиб цалабикиб. Илаб ахъбуцибси масъала дебали аргъбаибсири нушала рес­­публикалисцун ахIенну, ара­­­гIеб­ли инсаниятлисра. Ле­рил­ра хъалибаргличил дархдасунти дурхъадешуначи За­­падла улкнани чябхъинти ду­ра­­дуркIули сари. БусягIятла замана урехи алкIули саби нушаб гIядатлатили детаурти хъалибаргла дурхъадешу­нас. Иличил бархбасахъи, динна Идарабала гьабкьянаби ва вакилти МяхIячкъалализиб цахI­набикили, ил шайчирти масъулти арзес кьасбариб. СенахIенну Дагъистаннизиб хъа­либаргла дурхъадешуни че­ряхIдирули, бегIлара гIяхIти гIядатуни хIясибли хIербирути саби. Дигеси саби илди нушала улкала Конституциялизирра кадизахъни. Ил хIясибли мурул адамли ва хьунул адамли чула-ургаб хъалибарг алкIахъули саби, иличибли нушала жагьилтала челябкьла мяхIкамбарес имканбикIур.
ГIядатлибиубливан, балбуц Кьуръа аятуначил бехIбихьиб.
Цалабикибтала гьалав гъайул­хъули, Дагъистанна муфтий, шайх ГIяхIмад Апандини буриб: «…Дебали разилира нушала ванзаличи ишцад гIяхIли бакIниличи. Вирхулра, нушала балбуц мягIничебсили ва баракатчебсили бетарниличи. ЦахIнарти къайгънани кумекбиру ишбархIи ишди масъулти хIердаресра арзесра. Кьуръайзиб халаси пикри бяхIчиаили саби хъалибаргличи. Исламла диннизиб чебаахъили саби гIибратласили биэси хъалибаргла исла, сунезирра мура-хьуна ва бегIталара дурхIналара бархбасуни дурхъадарили. Илкьяйда хъалибарг мяхIкамбарни инсаниятла насаб даимбарни саби. Ара-сагъси хъалибарглизибад саби дигахъуси жамигIятла цахIнабик адаб-хIяялашал арасили бирнира. Хъалибарглизибцун саби адамлис чебетаибси бяркъ бедес вируси. Челябкьлализиб илданира ара-сагъти дурхIни абилкьниличи вирхес вирар. Дин вирхуси адамла гIямрула бутIа саби. Динни лерилра адамтала гIямрула шалуби чедиахъули сари, ва бархьси динни жамигIят уржахъу ва пачалихъ чIумабирахъу. Амма гьарил адамли пачалихъла кумек агарли дин бузахъес хIейрар. Ил багьандан пачалихъличилти бархбасуни чараагарти сари. Нушани чебиулра политикала анцIбукьунира динна дурхъадешунира дарх делсни. Илди дарх дузнили, чеалкIуси наслула гъира имцIабирахъу цалис цали кумекбирахъес ва къуллукъбирахъес. ЧевяхIсини икьалабараб иличибли лебтасалра халаси пайда биахъес».
Северная Осетия-Аланияла муфтий ХIяжимурад Гацалов, сунела яргализив гъайулхъули, викIи: «ИшбархIи гьалаб нушани дигIянбируси ва гIяшли буресра цIахбилзуси тема ахъбурцулра. Нушани балулра ЛГБТ — убяхIси ва цIахси секIал биъни ва цалра динни ил кьабулхIебирни. Гьанна илди нушала унзализи кьутIбикIесбяхIили саби. Аллагьлизибад уруххIекIути адамти гIур чизибад урухкIути?
Дила дагъистанлан юлдашли гьачам хьарбаибсири, сен илцадра цIахси ва убяхIси секIал къадагъахIебируси, пачалихъла хIянчизартани ва СМИ-бани селра хIебирули балтуси или. ИлхIели нура пикриухъунра, илкIун бархьси саби. Илизиб нушалара гIяйиб леб. Чис гьанбиркусири 10 дус гьалаб нушани ил хIукмулизи кабиркахъни, илкIун нушани саби ил даражаличи бикахъибси. Хъалибаргла дурхъадешуначила хъумартес асухIебирар. ИшбархIила манзил магьар дихьибти жагьилти чумал базли декIарбиркули саби. Иличи къаршиси се-биалра нушани пикрибарес гIягIнили саби. СенахIенну жагьилти нушала челябкьла саби ва илди мяхIкамбарес гIягIнили саби. Ишар дурибти пикруми каргьахъурли, нушани цауркIси пикри-резолюция дурасили, улкала БекIличира баахъес чебиркур».
Илди далдуцуни ва гьунибаъниби дебали сабухъчертили дирниличи дилара бирхауди леб. Ил шайчиб икьалавиахъес гьарли-марти бусурманти кьяйда, нуша гьар-мурталраван ЧевяхIсиличи дугьадилзулра.