ГIебшнила манзил жагьилти гIярмияла къяяназиб къуллукъбарахъес жибирнила дазурбазиб Ахъушала ва Сергокъалала районтала дявила комиссариатли 6 адамлизибад цалабикибси цаибил кьукья МяхIячкъалализи бархьиб.
КIелра районтала дявила комиссар Шамил Чупалаевли буриливан, гIебшнила призыв гьалаб кьяйдали бетурхуси саби. Гьаланачи лебилра жагьилти республикала сборный пунктлизиб ахтардибиру. КIинайс, санигIят хIясибли декIарбарили, гIярмияла къяянази бурхьути саби. Илала гIергъи, хасти частаназир жагьилтази дявила устадеш кайсахъу. Илди дявила хасси балбуц (СВО) бетурхуси мер-мусаличи бурхьути ахIен.
НасихIятла дугьбачил жагьилтачи Сергокъалала районна бекIла заместитель Баркакьади Мажидов, бузерила, дергъла ветерантала ва халатала Советла председатель МяхIяммадсалам МяхIяммадов, ца гIярмицла хала дудеш Мухтар МяхIяммадов дугьабизур.
Сергокъалала районна культурала Центрла гIяртистунани гIярмицунас концертла программа гьалабихьиб.
