Африкализибси бегI­лара ахъ­си ду­бу­ра— Кили­ман­д­жа­ро Да­гъис­тан­ни­зибадти кIел тух­турлис му­тIигI­бакIиб. Ну­ша­­ни балуливан, бегI гьа­лаб Ки­­ли­манджаро гьарахъти дарш­дусмазиб бяркъурсири. Илала ахъдеш 5895 метр­личи абиркули саби. Ил дунъяличиб бегI­лара машгьурси бишунси вулкан саби.

Гьанна биалли, лебил дунъяличибад гьар дус азирцад турист ил бускаунси вулкан чебаэс башули саби. Амма бегIлара хъарличи чебяхIяхъес бирутала лугIи дебали камли саби. Илгъуна имканбакIиб нушала дагъистанлантасра.
Илди саби: рес­публикала медицинала бе­хIем­цIунала Центрла руководитель, тухтур ГIябдуллагь МяхIяммадов ва илала гьалмагъ Адам Хайруллаев – хирург эндоскопист.
ГI.МяхIяммадов гьар бархIи адамтала жан уцахъули узуси сай. ХIянчилизивад акьуси замана илини ахъанайти чедидирхъули вирар. ГIябдуллагьла илгъуна иштяхI акIубсири ца-кIел дус гьалав Эльбрус дубураличи чевяхIяхъибхIели.
КIинайс биалли, иличил Адамра вархикиб ва кIилилра Дагъистаннизиб саби хIебаибси цалра дубура хIебатур. Гьанна илдани Африкализибси бегIлара ахъси дубураличи абацIес кьасбариб.
«Москвализи детаили гIер­гъи, бу­ся­гIятла манзил дунъяличир кадиркути анцI­­бу­кьуни багьандан, нушала гIергъиси рейс убкасни багьурхIели, хъули чарду­хъес би­летуни асира. Хапли, цархIилти ша­гьуртазирад ва улкназирад дукьес асу­хIе­би­русив гьатIи, ибси пикри ба­кIиб. Дубай — Кения — Тазания шагьурти чер­ди­кIи­ли, би­­летуни асира», — буриб ГI.Мя­­­хIям­­мадовли.
«Гьуни гIеркъаси сабри. ГьачамхIели вацIурби, кIинайс халати авлахъуни, дубурти, буцIардеш ва бугIярдеш яргадикIулри. Вулканна удиб 30 градусла ванадеш биалри, хъарличиб – 25 градусла бугIярдеш. Илди аги-хIяйчи чарх бурсибиахъес замана аги. Ил багьандан чеди че­ря­хIи­хъухIели, бекI изескабииб, уркIи гъудурдикIесдииб…
Амма халалгъуна гьуни ахъили гIергъи, сеналра чардиэс асухIебири», — иб А.Хай­рул­лаевли.
Гьар бархIи 10 километрла гьуни ихъули, илди авэсил бархIи гIянручI, дубурла бегIлара хъарличи абацIиб.
Гьанна биалли, Килиманджарола хъарличир мурул адамтани дарибти делхъ видеолизир кавлули сари. Илди суратуни ва видеоби мурул адамтани лебилра чучи хIерти гьалмагъунази ва гъамтази чедаахъиб.
Нуша гIуррара дукьес дигути мер-муса дахъал сари или бурули саби илдани.