ГIядатлабиубливан, дусли кIина — гIебшнила ва гьала атхIебла манзилтазиб, гIярмиялизиб къуллукъбарахъес уршби жибирнила балбуц бетурхуси саби. ХIера, ил шайчибси ихтилат бетаур «ХIякьикьат» газетала конференц-заллизибра. Илар 2022 ибил дусла хIебла призывличила гъай детаур. Конференцияличир бутIакьяндеш дариб республикала дявила комиссар Д.М. Мустапаевли, радиола-телевидениела хIянчизартани ва СМИ-бала вакилтани.
«Лебтанилра балуливан, апрельла 1-личибад хIебла призыв бехIбихьили саби. Гьайгьайрагу, призывлиу бикибти лебилра дурхIни гIярмиялизи аркути ахIен. Мерличирти военкоматуназиб илдачил ахтардила хIянчи дурабуркIуси саби. Ил хIясибли, гIярмиялизиб къуллукъбарес балкьаурти саби гьаланачи арбикути. Арбякьунси дуслизиб нушала улкала Президент В.Путинни къулбасбарибси хIукму хIясибли, апрельла 1-личибад июльла 15-личи бикайчи, къалабаси къуллукъбарахъес 134 азирлим 500 адам жибарили бирар. Арбякьунси дуслизиб биалли, призывникунала лугIи 3000-личи абиркулри», — буриб Д.Мустапаевли.
Конференцияла башрилизиб илини журналистунала суалтас жавабти дедлугули цIакьбарили буриб: — «Нушала Президентли буриливан, гьанна Украинализир дурадуркIути хасти далдуцуназир цалра призывникли бутIакьяндеш дирути ахIен. Ил секIал лебтазилра бархьли аргъахъес дигулра. Украинализи арбикути саби гIярмияличил вягIда бигьунти, Росгвардияла ва цархIилти хасти органтала хIянчизарти».
«Нушала дебали халаси улка саби. Ил багьандан гIярмиялизиб къуллукъбарахъес жагьилти Калининградлизи, Севастопольлизи, Сахалиннизи ва цархIилти мераначи бурхьути саби. Масала, Дагъистаннизибад арбукибти гIярмицуни, хъалибарглизир къиянти аги-кьяйда лерти яра дурхIнала бегIти илди регион-алав балтулира бирар», — чеимцIабариб Д.Мустапаевли.
Саби-гIяхIъулали Украинализи букьес дигути жагьилтира камли ахIен. Илди-ургаб имцIаливан гIярмиялизиб къуллукъбарибти яра дявила звание лебти адамти саби илира буриб.
Гьар дус гIярмицунас шуртIри къулайдирули сари. Хурегла, палтарла, умудеш бирути ваяхIла шайчиб илди жагали гIеббуцили саби.
