Ну бехIбихьудла классуназив учIухIели, директорли узули вири Ахъушала районна МухIела шилизивадси пергер гъабза. Шила жагьти ва халати илис МухIен Кьурбан бикIи. Абзур шила багьа сабукиб илини бускрантала гьалаб. Итди дусмазив ну авъибил класслизив учIусири. ИлхIели наб грамота гибсири. Ил наб бегIлара дурхъасира саби, ну гьалавяхI викуси кьибламара сабри.

Лениннара Сталиннара суратуначилси Похвальная Грамотализибси белкI иш саби:
«Выдана ученику IV-го класса Бускринской НС школы сел. Бускри Дахадаевского района ДАССР Габибуллаеву Багомеду за отличные успехи и примерное поведение. С.Бускри директор школы 8 июня 1949г. Акуртачая учителя 1 подпись, 2 подпись»
Ну ил даражаличи ваахъибси учительтанири. КIиибил класслизив учIухIели, гIякьлу-дагьрила гIинизли ветаурсири Хъярбукла шилизивадси ГIябдулхаликь ХIясанов. Хъарихъли ветаур Меусишан ХIяпизла МяхIяммад. Урус мезличи диги акIахъуб Стрельникова Вера Аверьяновнани.
1956-57-ибил белчIудила дус. Давлачебли бири шагьар техникумтала шайчибра: хIябал педучилище: перводагестанское, женское, аварское; медучилище, кооперетивный, с/хоз, механический, финансовый… чинав учIес дигулрил, гьарглири дягIул унза, чеббикIибси мерличи ацIи ганзличил гьарзал. Гьаланачиб тамашали кабилзи ил бегI гьалаб чебиуси тяхIяр. БегIлара бухъянси Ленинна у бихуси кьакьа ва площадь адамтала урилиуб бири сут-алхIят бурхIнала бархIехъуназиб. ИшбархIира уркIила кисализиб бихулра цаибси дарган мезла дарс. ХIябцIали дуслагъуна вицIиб-вицIибси, гамсти дяхI-някъличилси, ца кIентI катхIел зузбитIахъи малхIямси гъинчIличилси дурхIя класслизи ацIиб. Саламра гили, ибсири: «Наб Айгумов Жалалудин Айгумович бикIар. Нуни дарган мезла дурсри кадирхьути сари. Шагьарла гIямру декIарти сари, дурхIни, хIуша шилизир акIубтирая. Вария, заманаличир хIуша хIердируси мерличи чардулхъес бажардидиркеная. Гьарил адам сунела кьапIалиув гъабза сай, адам мискъилладимайридая. ХIуша дуукъи, чевашуси виалли, илдигъунтира камбирути ахIен, кIантIидеш чемадиахъидая». Шиличи, шантачи, бучIахъути дурхIначи кахIедурхути дигили уркIи бицIибси адам вири,бунагь-хатIа урдуц. ХIямид ХIямидовличил варх уркIи берхIибтала дарули варгаибсири дила учитель.
Жалалудин Айгумовичличил бархбасунси ца биштIаси мисал. Университетлизи керхурсири ну 1962 ибил дуслизив. Нушала корпус итхIели Советский кьакьализиб бири. Ила ухIнаулхъухIели, дурав тIашли Жамалудин Айгумович, саламра гили, ухIнавхъес вализурра. – ХIябибуллаев, сен гьалаклири? Се къуллукъли иша килри? Урузиубра, бикIуливан, лигубачи ваайчи.
— Ишав учIулра, Айгумович.
— Кумек-секIал гIягIнилив?
— Баркалла, бажардииркулра. Ил ми­саллира чебиахъули саби илала адамдеш, малхIямдеш, гьарли-марти дубурландеш. Дарган мезличи ва литератураличи дила диги имцIадиахъуб, гIяпабаркьарти, Сулайба БяхIяммадли, Басир ГIямалаевичли, Албури Албуриевичли. Дарс кабирхьнила шайчив цаибил мерличи дураухъунсири. Илдасра ну ишбархIира «Дила мургьи, дила арц – цIябдеш шалабирул бац» викIуси.
Буйнакъскла педучилищелизив учIухIели шуибил школала кIиибил класслизиб базла практикаличив калунсири. Ил школализив узули вири Дагъистанна Цаибил Игит БяхIяммад ХIяжиевла узи Булач ХIяжиев — хабардерхурси краевед, гIур халкьла учительла уличи лайикьикибси, бамсри хIебалуси, адамтачи дигичевси гъабза, илини гьар акьуухъунхIели, стройлизи каили походличи бикули вири дурхIни. АкьухIели нура варх вашаси. Башу-башукад ахъ-ахъли тIамадири:
— Как настроение!
ДурхIнала жавабра къантIсири:
— Бодрое!
ХIера, илала сипта дила бузерила хIянчилизиб пайдалабарира: ца класс Москвализи букира: Кремль, Ленинна Мавзолей, Бородинское сражение кабикибси анцIбукьличила (гидла гъай хIя­сибли, видимость 3 км саби рикIи) ва… чедаахъес имканбакIиб, ца класс Азер­байжанна Куба шагьарлизи, ца – ка­бар­динтачи.
Ахирлизиб гьанбиркахъути адамтани наб дарс кабихьибси ахIен, амма илдачил тянишиъни, баркь-бац дагьни деркIибти гIямрулизир дарсли детаур.
Мезла кьадри багьурси вири хъярбукан Камал. Сабурла ургьур дямли буцесра бурги гIямал. КIел тIуй ласванбарили, диркьбири балгун супил, дуклабуцили динда, урцахъи гIяшли далай. Стол-алавси къушумра лехIирхъи хIясрат-хIяйрай, чедихьибтиван кьяшум. Камалла сабур ва яхI дарсли детаур набра. Илисра биштIал мисал бурес вирус хIушабра. «Биур, иличи «тахъчи» — иру ХIяжимурадли. Баркь-бацла багьа ахъси вихъран ЗубайрухIяжи, «Арсланна урши Къаплан» бучиб Къянасирагьан уилри пергер дарган — Закаригела ХIяжи. Суратла хIябъибил къяй балгахъи сай илини. Цаибил къяйла ирхъяй гьаргкабиру жавгъатлай — жагал белкIа хIевали жагьрарибси Хадижат — илри курсла методист. 1988 ибил дусла июнь-июль бузрала ишарат саби сурат — итхIели МяхIяммадова, гьанна Хадижат ХIябибова. Илдала хIяракатра дугIли шулумхIеира, мискьалцада биалра чайтайхIи кабихьира. ДелкIести лер гIуррара, дицIарацада хунжи — гъайикIалли, гъай дирар, укъуцад – кахIедурхути гIянжи. Кабатурли биштIал кIант, таманкадирулра кьутI.